వేప చెట్టుకు కాసిన మామిడి పండ్లు.. మంత్రి ఇంట్లో ఇదెక్కడి విచిత్రం

వేప చెట్టుకు మామిడి పండ్లు కాయడం ప్రస్తుతం తీవ్ర చర్చనీయాంశంగా మారింది. తన ఇంట్లో ఉన్న వేప చెట్టుకు మామిడి పండ్లు వచ్చాయంటూ ఓ రాష్ట్ర మంత్రి స్వయంగా సోషల్ మీడియాలో వీడియో పోస్ట్ చేయడంతో ఆ వీడియో కాస్త తెగ వైరల్ అవుతోంది. అది చూసిన నెటిజన్లు ఇదేలా సాధ్యం అంటూ ముక్కున వేలేసుకుంటున్నారు. అయితే మొదట ఆశ్చర్యపోయిన ఆ మంత్రి.. తర్వాత శాస్త్రవేత్తలను పిలిపించి అసలు విషయం తెలుసుకున్నారు. ఈ సంఘటన మధ్యప్రదేశ్‌ రాజధాని భోపాల్‌లో చోటు చేసుకుంది.

మధ్యప్రదేశ్ పంచాయతీ గ్రామీణాభివృద్ధి, కార్మిక శాఖ మంత్రి ప్రహ్లాద్‌ పటేల్‌ నివాసంలో ఉన్న ఓ వేప చెట్టుకు.. మామిడి పండ్లు రావడం ప్రస్తుతం అందర్నీ ఆశ్చర్యానికి గురి చేస్తోంది. వేప చెట్టుకు వేలాడుతున్న మామిడి పండ్లకు సంబంధించిన వీడియోలను తీసిన మంత్రి ప్రహ్లాద్ పటేల్.. దాన్ని సోషల్ మీడియాలో పోస్ట్ చేయడంతో తెగ వైరల్ అవుతోంది. ఆ మామిడి పండ్లను చూసి ఆశ్చర్యపోయిన మంత్రి.. గతంలో నైపుణ్యం కలిగిన తోటమాలి ఈ ప్రయోగాన్ని కొన్ని సంవత్సరాల క్రితం చేసి ఉంటారని పేర్కొన్నారు.

 ఆ వేప చెట్టు సుమారు 20 నుంచి 25 సంవత్సరాల వయస్సు ఉంటుందని.. మంత్రి ప్రహ్లాద్ పటేల్ వెల్లడించారు. మధ్యప్రదేశ్ సీఎం నివాసం తర్వాత అతిపెద్ద ఇల్లు ఇదే కావడం గమనార్హం. బీ-7 బంగ్లా భోపాల్‌లోని ప్రొఫెసర్ కాలనీకి సమీపంలో ఉన్న సివిల్ లైన్స్‌లో ఉంది. ఈ బంగ్లా చుట్టూ భారీగా మొక్కలు నాటారు. ఈ బీ-7 బంగ్లాలో ప్రస్తుతం నిర్మాణ పనులు జరుగుతున్నాయి. ఆ పనులను పరిశీలించేందుకు శనివారం అక్కడికి వెళ్లిన మంత్రి ప్రహ్లాద్ పటేల్‌కు మామిడి పండ్లు చూసి వీడియో తీసి పంచుకున్నారు.

ఆ దృశ్యం చూసి ఒక్కసారిగా ఆశ్చర్యపోయిన మంత్రి.. వెంటనే వ్యవసాయ శాస్త్రవేత్తలకు సమాచారం అందించారు. ఈ వేప చెట్టుకు పరిశీలించిన వృక్షశాస్త్రజ్ఞుడు ప్రతిభా సింగ్.. ఆ చెట్టులో మామిడి చెట్టు పెరిగే అవకాశం ఉందని తెలిపారు. చాలా సార్లు మామిడి గింజలు పెద్ద చెట్ల నుండి పడిపోయినప్పుడు.. మొక్కలుగా పెరుగుతాయని చెప్పారు.