చిన్నారుల ఆస్పత్రిలో అగ్ని ప్రమాదం.. ఏడుగురు శిశువులు సజీవదహనం

గుజరాత్‌ రాజ్‌కోట్‌ గేమింగ్ జోన్‌లో జరిగిన అగ్ని ప్రమాదం 9 మంది చిన్నారులు సహా మొత్తం 27 మందిని బలి తీసుకోగా.. ఢిల్లీలో మరో భారీ ఫైర్ యాక్సిడెంట్ చోటు చేసుకుంది. ఢిల్లీలోని చిన్న పిల్లల ఆస్పత్రిలో జరిగిన ఘోర అగ్ని ప్రమాదంలో అప్పుడే పుట్టిన ఏడుగురు శిశువులు సజీవ దహనం అయ్యారు. మరికొంతమంది చిన్నారులను ఫైర్ సిబ్బంది వచ్చి రక్షించడంతో మృతుల సంఖ్య భారీగా పెరగకుండా అడ్డుకున్నారు. కొందరు చిన్నారులు గాయపడ్డారని.. వారి పరిస్థితి తీవ్ర విషమంగా ఉన్నట్లు అధికారులు పేర్కొన్నారు.

ఢిల్లీలోని వివేక్ విహార్‌లోని రెండంతస్తుల డే కేర్ సెంటర్‌లో శనివారం రాత్రి ఈ భారీ అగ్ని ప్రమాదం జరిగింది. ఈ డే కేర్ సెంటర్‌లో మొత్తం 19 మంది నవజాత శిశువులు చేరగా.. అందులో ఏడుగురు చనిపోయారు. మిగిలిన 12 మందిని రెస్క్యూ సిబ్బంది సురక్షితంగా బయటికి తీసుకువచ్చారు. ఆస్పత్రిలో షార్ట్ సర్క్యూట్ జరిగిందని.. దాంతో ఆక్సిజన్ సిలిండర్ పేలిపోయిందని ప్రాథమికంగా నిర్ధారించారు. ఆక్సిజన్ సిలిండర్ పేలడం వల్ల ఒక్కసారిగా మంటలు ఆస్పత్రిలో వ్యాపించినట్లు చెప్పారు.

అగ్ని ప్రమాదం జరిగిందని సమాచారం అందుకున్న ఫైర్ సిబ్బంది.. వెంటనే స్పందించి అక్కడికి చేరుకోవడంతో భారీగా ప్రాణ నష్టం కాకుండా అడ్డుకున్నారు. గాయపడిన వారిని వెంటనే అంబులెన్స్ ద్వారా సమీపంలోని గుప్తా నర్సింగ్ హోమ్, తూర్పు ఢిల్లీ అడ్వాన్స్‌డ్ నర్సింగ్ హోమ్‌లో చేర్చారు. వెంటనే అక్కడికి చేరుకున్న పోలీసు బృందాలు, రెస్క్యూ టీమ్ చేరుకుని పలువురు నవజాత శిశువులను రక్షించారు.

ఫైరింజన్లను రంగంలోకి దించిన అగ్నిమాపక సిబ్బంది.. గంట పాటు శ్రమించి మంటలను అదుపులోకి తీసుకువచ్చారు. ప్రమాదం తర్వాత బేబీ కేర్ సెంటర్ నిర్వాహకులు, ఉద్యోగులు పరారీ కావడం తీవ్ర దుమారం రేపుతోంది. ఈ ప్రమాదంపై కనీసం బాధితుల తల్లిదండ్రులకు కూడా సమాచారం ఇవ్వకపోవడం గమనార్హం. ఘటనాస్థలానికి చేరుకున్న పోలీసులు, తల్లిదండ్రుల ఆచూకీ కోసం ప్రయత్నిస్తున్నారు. శనివారం రాత్రి 11:30 గంటలకు బేబీ కేర్ సెంటర్‌లో అగ్నిప్రమాదం జరిగినట్లు సమాచారం అందిందని పోలీసులు తెలిపారు.

మొదట బేబీ కేర్ సెంటర్ గ్రౌండ్ ఫ్లోర్ నుంచి పొగలు రావడం ప్రారంభించింది. ఆ కొద్దిసేపటికే మంటలు పై అంతస్తులకు చేరి.. బిల్డింగ్ మొత్తం వ్యాపించాయి. దీంతో రంగంలోకి దిగిన అగ్నిమాపక సిబ్బంది, పోలీసులు.. బిల్డింగ్ వెనుక వైపు అద్దాలు పగులగొట్టి.. శిశువులను బయటికి తీసుకువచ్చారు. ఆ ఆస్పత్రి భవనాలకు కూడా మంటలు వ్యాపించాయి. అగ్ని ప్రమాదం సంభవించడంతో ఆస్పత్రిలో ఉంచిన ఆక్సిజన్ సిలిండర్లు ఒక్కసారిగా పేలిందని... ఈ ఘటనతో ఆ బిల్డింగ్‌కు 100 మీటర్ల దూరంలో ఉన్న ఐటీఐ క్యాంపస్‌లో ఒక సిలిండర్ పేలడంతో స్థానికులు తీవ్ర భయాందోళనకు గురైనట్లు పోలీసులు వెల్లడించారు.