కూటమి అభ్యర్థులతో చంద్రబాబు భేటీ.. కౌంటింగ్‌పై కీలక సూచనలు

ఏపీ ఎన్నికల కౌంటింగ్‌కు సర్వం సిద్ధమైంది. మరికొన్ని గంటల్లో ఎన్నికల ఫలితాలు వెల్లడికానున్నాయి. ఇక శనివారం సాయంత్రం వెల్లడైన ఎగ్జిట్ పోల్ ఫలితాలలో జాతీయ సంస్థలు టీడీపీ కూటమికి పట్టం కట్టాయి. ఈ నేపథ్యంలోనే కూటమి అభ్యర్థులతో టీడీపీ అధినేత చంద్రబాబు నాయుడు టెలీ కాన్ఫరెన్స్ నిర్వహించారు. ఈ సందర్భంగా ఎన్నికల్లో కూటమి తిరుగులేని విజయం సాధిస్తుందని అభిప్రాయపడిన చంద్రబాబు.. విజయం కోసం మూడు పార్టీల నేతలు, కార్యకర్తలు మంచి సమన్వయంతో పనిచేశారని అన్నారు. పవన్ కళ్యాణ్, పురందేశ్వరితో పాటుగా నేతలు, కార్యకర్తలు కష్టపడ్డారని అభినందించారు. మరోవైపు ఈ జూమ్ మీటింగ్‌లోనే కౌంటింగ్ సందర్భంగా తీసుకోవాల్సిన జాగ్రత్తలపై చంద్రబాబు దిశానిర్దేశం చేశారు.

కౌంటింగ్ ప్రక్రియలో తీసుకోవాల్సిన జాగ్రత్తలు, చర్యలపై మూడు పార్టీల నేతలకు చంద్రబాబు పలు సూచనలు చేశారు. ఎగ్జిట్ పోల్స్ అన్నీ కూటమివైపే మొగ్గు చూపాయన్న చంద్రబాబు.. కేంద్రంలో, రాష్ట్రంలో ఎన్డీయే కూటమి ప్రభుత్వాన్ని ఏర్పాటు చేయబోతోందని ధీమా వ్యక్తం చేశారు. అభ్యర్థి ఎవరైనా ఓట్లు బదిలీ కావాలన్న ఉద్దేశ్యంతో మూడు పార్టీల నేతలు, కార్యకర్తలు కష్టపడి పని చేశారని కొనియాడారు. ఓటమి భయంతో కౌంటింగ్ గురించి వైసీపీ అర్థం లేని ఆరోపణలు చేస్తోందని .. ఓటమికి కారణాలు వెతుక్కునే పనిలో వైసీపీ ఉందని విమర్శించారు.

 పోస్టల్ బ్యాలెట్ ఓట్లకు సంబంధించి ఎన్నికల సంఘం ఇచ్చిన ఆదేశాలపైనా కోర్టుకు వెళ్లి హంగామా చేశారని.. కౌంటింగ్ రోజు కూడా అనేక అక్రమాలు, దాడులకు తెగబడే అవకాశం ఉందని చంద్రబాబు హెచ్చరించారు. కౌంటింగ్ రోజు ఏజెంట్లు, అభ్యర్థులు అప్రమత్తంగా ఉండాలని సూచించారు. కౌంటింగ్ ఏజెంట్లు, చీఫ్ ఎలక్షన్ ఏజెంట్లు సమయానికల్లో కౌంటింగ్ కేంద్రానికి చేరుకోవాలని సూచించారు. అలాగే అధికారులు నిబంధనలు పాటించేలా ఏజెంట్లు పని చేయాలన్నారు. స్ట్రాంగ్ రూమ్‌ల నుంచి ఈవీఎంలను తెచ్చే సమయంలో జాగ్రత్తగా ఉండాలని.. పూర్తి స్థాయి ఫలితాలు వచ్చే వరకూ ఎవరూ అశ్రద్ధ వహించవద్దంటూ కూటమి అభ్యర్థులకు సూచించారు.

కౌంటింగ్ పూర్తయ్యే వరకూ ఏజెంట్లు అందరూ కౌంటింగ్ కేంద్రాల్లోనే ఉండాలని చంద్రబాబు సూచించారు. ఆర్వో వద్ద డిక్లరేషన్ తీసుకున్న తర్వాతే కౌంటింగ్ రూమ్ నుంచి బయటకు రావాలని చంద్రబాబు కూటమి అభ్యర్థులకు సూచించారు. మరోవైపు కౌంటింగ్ సమయంలో వైసీపీ ఘర్షణలకు దిగే అవకాశం ఉందని.. అభ్యర్థులు లీగల్ టీమ్‌లను అందుబాటులో ఉంచుకోవాలని సూచించారు.