జూనియర్ ఎన్టీఆర్‌‌కు టీడీపీలో పదవి.. పిఠాపురం వర్మ వ్యాఖ్యలకు తారక్ ఫ్యాన్స్ స్ట్రాంగ్ కౌంటర్

జూనియర్ ఎన్టీఆర్ పొలిటికల్ ఎంట్రీపై సోషల్ మీడియాలో మరోసారి చర్చ జరుగుతోంది. పిఠాపురం మాజీ ఎమ్మెల్యే వర్మ ఇటీవల చేసిన వ్యాఖ్యల వీడియో వైరల్ అవుతోంది.. ఓ న్యూస్ ఛానల్‌ డిబేట్‌లో వర్మ ఆసక్తికర ఈ కామెంట్స్ చేశారు. డిబేట్‌లో వైఎస్సార్‌సీపీ నేత జూనియర్ ఎన్టీఆర్ ప్రస్తావన తేవడంతో వర్మ స్పందించారు.. జూనియర్ ఎన్టీఆర్ తెలుగు దేశం పార్టీలోకి రావొచ్చన్నారు. లోకేష్, జూనియర్ ఎన్టీఆర్ గురించి పోల్చి చూస్తున్నారని.. జూనియర్ ఎన్టీఆర్‌ను కూడా రమ్మనండి.. సినిమాలు మానేసే ఫుల్ టైమ్ వస్తే.. పార్టీలో ఏదొక పదవి ఇచ్చి కూర్చోబెడతామన్నారు.

ఈ విషయంలో లోకేష్‌తో పోలిక ఏముందని.. లోకేష్ సిన్సియర్‌గా పార్టీ కోసం పనిచేస్తున్నారన్నారు వర్మ. లోకేష్ ఆధ్వర్యంలో 60 లక్షల సభ్యత్వాలు పూర్తయ్యాయని.. ఆయన పార్టీ కోసం అహర్నిశలు కష్టపడుతున్నారన్నారు. లోకేష్ పార్టీలోరి టెక్నాలజీని తీసుకొచ్చారని.. కార్యకర్తలు ఎవరైనా చనిపోతే ఇన్స్యూరెన్స్ తీసుకొచ్చి డబ్బులిచ్చే విధానాన్ని అమలు చేశారన్నారు. ఆయన తెలుగు దేశం పార్టీలో కీలకంగా మారారని.. ఎవరైనా పనిచేస్తేనే గుర్తింపు వస్తుందన్నారు. పనిచేయకుండా ఇంట్లో కూర్చుని నేనేదో పనిచేసుకుంటాను.. పదవి ఇవ్వమంటే ఎలా ఇస్తారని ప్రశ్నించారు.

పార్టీ కోసం త్యాగం చేయాలని.. త్యాగం చేయాలంటే రమ్మనండి.. వస్తే పదవి ఇప్పిస్తానన్నారు పిఠాపురం మాజీ ఎమ్మెల్యే. మొత్తం సినిమాలను క్లోజ్ చేసుకుని జూనియర్ ఎన్టీఆర్ రావాలని.. ఆయన ఎప్పుడొచ్చినా పార్టీలో అవకాశం ఉంటుందన్నారు. నందమూరి హరికృష్ణకు రాజ్యసభ ఇచ్చారని.. నందమూరి బాలకృష్ణ ఎమ్మెల్యేగా ఉన్నారని. రాజకీయాల్లోకి రావాలని ఆ కుటుంబంలో ఉండేవారికి ఆసక్తి ఉండాలని.. ఆ కుటుంబానికి లేని బాధ మిగతావాళ్లకు ఎందుకని ప్రశ్నించారు. చంద్రబాబు కూడా ఆ కుటుంబ సభ్యుడన్న విషయాన్ని గమనించాలన్నారు. వర్మ వీడియో సోషల్ మీడియాలో వైరల్ అవుతోంది.

వర్మ తీరుపై జూనియర్ ఎన్టీఆర్ ఫ్యాన్స్ ఆగ్రహం వ్యక్తం చేస్తున్నారు. వర్మకే ఎన్నికల్లో టీడీపీ టికెట్ ఇవ్వలేదని.. ఆయన జూనియర్ ఎన్టీఆర్‌కు పదవి ఇప్పిస్తానని మాట్లాడటం విడ్డూరంగా ఉందన్నారు. జూనియర్ ఎన్టీఆర్ సినిమాలు మానేసి రాజకీయాల్లోకి రావాలని వర్మ అంటున్నారని.. మరి పవన్ కళ్యాణ్ రాజకీయాల్లో ఉంటూ ఇంకా సినిమాలు ఎందుకు చేస్తున్నారో చెప్పాలన్నారు. అలాగే లోకేష్ పార్టీ కోసం ఏం చేశారని 2014 ఎన్నికల తర్వాత ఎమ్మెల్సీని చేసి మరీ మంత్రి పదవి ఇచ్చారో కూడా చెప్పాలని ప్రశ్నించారు. తెలుగు దేశం పార్టీనే నందమూరి కుటుంబానిదని.. ఒకరు వాళ్లకు పదవులు ఇచ్చేది ఏంటని కొందరు కామెంట్స్ చేస్తున్నారు. మాజీ ఎమ్మెల్యే వర్మ చేసిన వ్యాఖ్యలపై సోషల్ మీడియా వేదికగా జూనియన్ ఎన్టీఆర్ ఫ్యాన్స్ మండిపడుతున్నారు.