బాలీవుడ్ క్వీన్ కంగనా రనౌత్ గెలుపు.. బ్యాగులు సర్దుకోండి అంటూ ప్రత్యర్థికి కౌంటర్

దేశవ్యాప్తంగా వెలువడుతున్న లోక్‌సభ ఎన్నికల ఫలితాల్లో కమలం పార్టీ అభ్యర్థులు తమ హవా కొనసాగిస్తున్నారు. ఈ క్రమంలోనే బీజేపీ నేతృత్వంలోని ఎన్డీఏ కూటమి మెజార్టీ మార్కు దాటింది. అయితే గతం కంటే భారీగా సీట్లు కోల్పోయిన బీజేపీ.. ఎన్డీఏ కూటమి పార్టీలతో కలిసి కేంద్రంలో మూడోసారి ప్రభుత్వాన్ని ఏర్పాటు చేసే దిశగా అడుగులు వేస్తోంది. ఈ నేపథ్యంలోనే హిమాచల్ ప్రదేశ్‌లో ఉన్న నాలుగు స్థానాల్లో బీజేపీ విజయం సాధించి.. ఆ రాష్ట్రాన్ని క్లీన్‌స్వీప్ చేసింది. ఈ నేపథ్యంలోనే మండి నియోజకవర్గం నుంచి బీజేపీ తరఫున బరిలోకి దిగిన బాలీవుడ్ క్వీన్ కంగనా రనౌత్.. ప్రత్యర్థిని మట్టికరిపించి గెలుపొందారు.

కంగనా రనౌత్‌ తన సమీప ప్రత్యర్థి, కాంగ్రెస్ తరఫున పోటీ చేసిన విక్రమాదిత్యపై 74755 ఓట్ల తేడాతో విజయం సాధించారు. హిమాచల్ ప్రదేశ్ మాజీ ముఖ్యమంత్రి వీరభద్రసింగ్ కుమారుడైన విక్రమాదిత్య సింగ్‌ను చిత్తు చేసి.. కంగనా రాజకీయాల్లో అడుగుపెట్టి పోటీ చేసిన తొలి ఎన్నికల్లోనే గెలిచారు. తన విజయంపై హర్షం వ్యక్తం చేసిన కంగనా రనౌత్.. ప్రధానమంత్రి నరేంద్ర మోదీ పేరు మీదే తాను విజయం సాధించానని చెప్పారు. ఇక ఇదే క్రమంలో మీడియాతో మాట్లాడిన కంగన.. ప్రత్యర్థి విక్రమాదిత్య సింగ్‌కు గట్టి కౌంటర్ ఇచ్చారు.

ఇక కాంగ్రెస్ నేత విక్రమాదిత్య సింగ్ లగేజీ సర్దుకోవాల్సిన సమయం ఆసన్నమైందంటూ కంగనా రనౌత్ విమర్శలు గుప్పించారు. అయితే గతంలో ఎన్నికల ప్రచారం సందర్భంగా విక్రమాదిత్య సింగ్.. కంగనపై చేసిన వ్యాఖ్యలకు కౌంటర్‌గా ఆమె ఈ విమర్శలు చేశారు. మండి నియోజకవర్గంలో జరిగే ఎన్నికల్లో కంగనా రనౌత్ ఓడిపోవడం ఖాయమని.. రిజల్ట్ తర్వాత ఆమె ముంబైకి తిరిగి వెళ్లిపోతారని గతంలో విక్రమాదిత్య సింగ్ కంగనను ఎద్దేవా చేశారు. దీంతో తాజాగా ఆమె ఘన విజయం సాధించడంతో.. ఆ వ్యాఖ్యలను గుర్తు చేసిన కంగనా.. కౌంటర్‌ ఇచ్చారు.

ఒక మహిళను తక్కువ చేసి మాట్లాడడం వల్ల కలిగే పరిణామాలను విక్రమాదిత్య సింగ్ ఖచ్చితంగా చూడాల్సి వస్తుందని కంగన తెలిపారు. తన బిడ్డను అవమాస్తే మండి నియోజకవర్గ ప్రజలు చూస్తూ ఊరుకోరని తెలిపారు. ఇక లగేజీ సర్దుకుని వీలైనంత త్వరగా ఇక్కడినుంచి వెళ్లిపోండి అంటూ విక్రమాధిత్యను ఉద్దేశిస్తూ కంగన వ్యాఖ్యలు చేశారు.