ఢిల్లీలో కలకలం.. పార్లమెంటులోకి చొరబాటుకు యత్నించిన ముగ్గురు దుండగులు

గతేడాది చివర్లో ఢిల్లీలోని పార్లమెంటు భవనంలోకి ఆగంతకులు చొరబడి ఎంపీలపై స్మోక్ దాడులు చేసిన ఘటన యావత్ దేశాన్ని ఎంత కలవరపెట్టిందో అందరికీ తెలిసిందే. ఈ ఘటన ఇంకా మరిచిపోకముందే తాజాగా మరో సంఘటన చోటు చేసుకుంది. శుక్రవారం ఉదయం ముగ్గురు దుండగులు.. పార్లమెంటులోకి ప్రవేశించేందుకు ప్రయత్నించారు. అయితే ఆ ముగ్గురిపై పార్లమెంటు భద్రతా సిబ్బందికి అనుమానం రావడంతో వారిని పట్టుకుని అరెస్ట్ చేశారు. ఆ ముగ్గురి వద్ద నకిలీ ఆధార్ కార్డులు ఉండగా వాటిని స్వాధీనం చేసుకున్నారు.

అయితే ఆ ముగ్గురు ఆగంతకులు గేట్ నెంబర్ 3 నుంచి పార్లమెంటులోకి ప్రవేశించేందుకు యత్నించగా.. అనుమానం వచ్చి భద్రతా సిబ్బంది విచారణ జరిపి అతడ్ని అరెస్ట్ చేశారు. అయితే ఆ ముగ్గురు వ్యక్తులను ఉత్తర్‌ప్రదేశ్‌కు చెందిన ఖసిం, మోనిస్, షోయాబ్‌గా గుర్తించారు. వారు ముగ్గురు ఉత్తర్‌ప్రదేశ్‌కు చెందిన కూలీలుగా గుర్తించారు. ఆ ముగ్గురు వ్యక్తులను అరెస్ట్ చేసి.. పోలీస్ స్టేషన్‌కు తరలించారు. నకిలీ ఆధార్ కార్డులను ఉపయోగించి హై-సెక్యూరిటీ పార్లమెంట్ కాంప్లెక్స్‌లోకి ప్రవేశించేందుకు ప్రయత్నించిన ఆ ముగ్గుర్ని సీఐఎస్ఎఫ్ సిబ్బంది అరెస్ట్ చేసి పలు సెక్షన్ల కింద కేసులు నమోదు చేశారు.

ఇటీవలె లోక్‍‌సభ ఎన్నికల ఫలితాలు వెలువడగా.. దేశవ్యాప్తంగా కీలక రాజకీయ నేతలు అంతా ఢిల్లీలోనే తిష్ఠ వేశారు. అంతేకాకుండా శుక్రవారం ఢిలీలో పలు కీలక సమావేశాలు, ఎంపీలతో ఎన్డీఏ కూటమి సమావేశం ఉన్న నేపథ్యంలో పార్లమెంటు సెక్యూరిటీ అధికారులు అప్రమత్తం అయ్యారు. దీంతో పార్లమెంట్ పరిసర ప్రాంతాల్లో కట్టుదిట్టమైన భద్రతను ఏర్పాటు చేశారు. ఇక గత ఏడాది డిసెంబర్ 13 వ తేదీన ఇద్దరు యువకులు పార్లమెంటులోని ప్రేక్షకుల గ్యాలరీ నుంచి ప్రజాప్రతినిధులు ఉన్న గ్యాలరీలోకి దూకి.. కలర్ స్మోక్‌ను విడుదల చేయడం తీవ్ర దుమారం రేపింది. దాంతో ఆ సమయంలో పార్లమెంటు హాలు మొత్తం పొగతో నిండిపోయింది. ఆ సంఘటన జరిగినప్పటినుంచి పార్లమెంట్‌ ఆవరణలో భద్రతను పెంచారు.