ఎన్డీయే పక్షనేతగా మోదీ.. చంద్రబాబు నాయుడు కీలక వ్యాఖ్యలు

వరుసగా మూడోసారి కేంద్రంలో బీజేపీ నేతృత్వంలోని ఎన్డీయే కూటమి ప్రభుత్వం ఏర్పాటుకాబోతోంది. ఈ నేపథ్యంలో మోదీని తమ నేతగా ఎన్నుకోడానికి ఎన్డీయే ఎంపీలు ఢిల్లీలోని పాత పార్లమెంటు భవనం సెంట్రల్‌హాల్‌లో శుక్రవారం ఉదయం సమావేశమయ్యారు. ఎన్డీయే పక్షనేతగా మోదీ పేరును కేంద్ర మంత్రి రాజ్‌నాథ్ సింగ్ ప్రతిపాదించగా.. అమిత్ షా, నితిన్ గడ్కరీ, జేడీఎస్ అధ్యక్షుడు హెచ్‌డీ కుమారస్వామి, టీడీపీ అధినేత చంద్రబాబు తదితరులు బలపరిచారు.ఇక, అమిత్ షా మాట్లాడుతూ.. ఎన్డీయే పక్షనేతగా మోదీ మూడోసారి బాధ్యతలు తీసుకోవడం చరిత్రాత్మకమని అన్నారు.

ఈ సందర్భంగా చంద్రబాబు నాయుడు మాట్లాడుతూ.. ప్రదాని మోదీ మూడు నెలల పాటు రాత్రిపగలు తేడా లేకుండా ప్రచారం నిర్వహించి, పార్టీని అధికారంలోకి తీసుకొచ్చారని అన్నారు. దేశ చరిత్రలోనే ఇది అత్యంత ముఖ్యమైన రోజని అన్నారు. గత పదేళ్లలో మోదీ సారథ్యంలో దేశం చరిత్రాత్మక విజయాలు సాధించిందని కొనియాడారు. మేకిన్ ఇండియా కార్యక్రమం చాలా గొప్పదని ప్రశంసించారు. ప్రపంచంలోనే మూడో అతిపెద్ద ఆర్ధిక వ్యవస్థగా భారత్ అవతరిస్తోందని వ్యాఖ్యానించారు. వికసిత్ భారత్ 2047 విజన్ సక్సెస్ అవుతుందని, భారత్ ప్రపంచ ఆర్ధిక శక్తిగా అవతరిస్తుందని ఆశాభావం వ్యక్తం చేశారు.

ప్రచారంలో మోదీ మొదటి రోజు నుంచి చివరి రోజు వరకూ అదే ఉత్సాహంతో ఉన్నారన్నారు. ఏపీలోనూ 3 బహిరంగ సమావేశాలు, ర్యాలీల్లో ప్రధాని పాల్గొన్నారని, మోదీ నేతృత్వంలో 2047 నాటికి భారత్ నంబర్‌ వన్‌గా నిలుస్తుందని అన్నారు. తన రాజకీయ ప్రయాణంలో ఎందరో నేతలను చూశాను కానీ. మోదీ వంటి శక్తివంతమైన నేతను చూడలేదని చంద్రబాబు కొనియాడారు. దేశంలోని యువశక్తి ఐటీ రంగంలో దూసుకెళ్తోందని చంద్రబాబు పేర్కొన్నారు. ఇక, ఏపీ ఎన్నికల్లో టీడీపీ-జనసేన-బీజేపీ కలిసికట్టుగా పనిచేసి 95 శాతం సీట్లును సాధించి అధికారంలోకి వచ్చాయని చంద్రబాబు తెలిపారు.

అనంతరం ప్రసంగించిన ప్రధాని నరేంద్ర మోదీ.. తనకు మద్దతు తెలిపినందుకు ఎన్డీయే నేతలకు ధన్యవాదాలు తెలిపారు. ఎన్నికల సమయంలో లక్షలాది మంది కార్యకర్తలు ఎండ వేడినీ పట్టించుకోకుండా అహర్నిశలు కష్టపడి పనిచేశారని ప్రశంసించారు. పార్లమెంట్‌ వేదిక నుంచి ఆ కార్యకర్తలందరికీ తాను శిరసు వంచి నమస్కరిస్తున్నానని అన్నారు. తనపై విశ్వాసం ఉంచి ఎన్నుకున్నారని అన్నారు. ఎన్నికలకు ముందు కూటమి కట్టి విజయం సాధించడం చారిత్రకమని వ్యాఖ్యానించారు.

ఈ సమావేశంలో మోదీ నాయకత్వానికి లాంఛనంగా ఆమోదముద్ర వేశారు. కొత్తగా ఎన్నికైన 240 మంది ఎంపీలతోపాటు టీడీపీ, జేడీయూ, శివసేన (షిండే), లోక్‌జన్‌శక్తి (రాంవిలాస్‌), ఎన్‌సీపీ, జేడీఎస్, జనసేన, అప్నాదళ్‌ సహా ఇతర మిత్రపక్షాల ఎంపీలు, బీజేపీ పాలిత రాష్ట్రాల ముఖ్యమంత్రులు, ఉప ముఖ్యమంత్రులు హాజరయ్యారు. మోదీ నాయకత్వాన్ని సమర్థిస్తూ ఏకగ్రీవ తీర్మానం చేశారు.