నదిలో మునిగి నలుగురు భారతీయ వైద్య విద్యార్థులు మృతి

రష్యాలో వైద్య విద్యకోసం వెళ్లిన నలుగురు భారతీయ విద్యార్థులు దుర్మరణం చెందారు. సెయింట్ పీటర్స్‌బర్గ్ సమీపంలో నీటి మునిగి ప్రాణాలు కోల్పోయారు. ఈ ఘటన ఎప్పుడు జరిగింది అనేది స్పష్టంగా తెలియరాలేదు. వారి మృతదేహాలను స్వదేశానికి పంపేందుకు రష్యా అధికారులతో భారత రాయబార కార్యాలయం సిబ్బంది టచ్‌లో ఉన్నారు. మృతిచెందిన విద్యార్థుల్లో ఇద్దరు అమ్మాయిలు, ఇద్దరు అబ్బాయిలు కాగా.. వీరంతా వెలికే నోవగోరోడ్ సిటీలోని నోవ‌గోరోడ్ స్టేట్ యూనివర్సిటీ‌లో చదువుతున్నట్టు అధికారులు తెలిపారు.

వోల్ఖోవ్ నది ఒడ్డున ఒక భారతీయ విద్యార్థిని నీటి మునిగిపోతుండగా.. ఆమెను రక్షించేందుకు నలుగురు సహచరులు ప్రయత్నించారని స్థానిక మీడియా నివేదికలు తెలిపాయి. ఆమెను కాపాడే క్రమంలో ముగ్గురు మునిగిపోయారని పేర్కొన్నాయి. ఆమెతో పాటు నలుగురు మునిగిపోగా.. స్థానికుల మరో విద్యార్దిని కాపాడారు.

ఎక్స్‌ (ట్విట్టర్)లో మాస్కోలోని భారత రాయబార కార్యాలయం దీనిపై స్పందిస్తూ.. ‘మృతదేహాలను వీలైనంత త్వరగా కుటుంబసభ్యులకు అందజేయడానికి కృషి చేస్తున్నాం. ప్రమాదంలో ప్రాణాలతో బయటపడిన విద్యార్థికి మెరుగైన వైద్యం కూడా అందిస్తున్నారు.’ అని తెలిపింది. బాధితులంతా వెలికే నోవగోరోడ్ స్టేట్ యూనివర్సిటీల విద్యార్థులని సెయింట్ పీటర్స్‌బర్గ్‌లోని భారత కాన్సులేట్ జనరల్ వెల్లడించారు.

బాధిత కుటుంబాలకు తమ ప్రగాఢ సానుభూతి తెలియజేస్తున్నామని ఆయన అన్నారు. స్థానిక అధికారులను సమన్వయం చేసుకుంటూ మృతదేహాలను స్వదేశానికి పంపేందుకు ప్రయత్నిస్తున్నట్టు తెలిపారు. బాధితులకు అన్ని విధాలుగా సహకారం అందిస్తామని ఆయన చెప్పారు.