ప్రమాణం చేయకుండానే చిక్కుల్లో పడ్డ కొత్తగా ఎన్నికైన ఎంపీ!

లోక్‌సభ ఎన్నికల్లో గెలిచిన ఓఎంపీ.. ప్రమాణం చేయకుండానే చిక్కుల్లో పడ్డారు. వ్యాపారం సజావుగా సాగాలంటే తనకు రూ.కోటి ఇవ్వాలని, లేకుంటే చంపుతానని ఎన్నికైన ఎంపీ బెదిరించాడని పోలీసులకు ఓ వ్యాపారి ఫిర్యాదు చేశాడు. దీంతో ఆయనపై పోలీసులు కేసు నమోదయ్యింది. ఆయనే బిహార్‌‌కు చెందిన రాజేశ్ రంజన్ అలియాస్ పప్పూ యాదవ్‌. పోలీసులు తెలిపిన వివరాల ప్రకారం.. పూర్ణియా జిల్లాలో ఓ వ్యక్తి కొన్నేళ్లుగా ఫర్నిచర్‌ వ్యాపారం చేస్తున్నాడు. పూర్ణియా లోక్‌సభ స్థానం నుంచి ఎన్నికైన పప్పూ యాదవ్‌.. తనకు రూ. కోటి ఇవ్వాలంటూ డిమాండ్‌ చేశాడని అతడు ఫిర్యాదు చేసినట్టు తెలిపారు.

ఎంపీగా తాను ఐదేళ్లు ఉంటానని.. ప్రశాంతంగా వ్యాపారం చేసుకోవాలనుకుంటే కోరినంత ఇవ్వాలని, లేదంటే చంపేస్తానంటూ బెదిరించినట్టు ఆరోపించారు. ఎన్నికల ఫలితాలు విడుదలైన జూన్ 4న ఈ ఘటన జరిగిందని, ప్రాణ భయంతో వ్యాపారి పప్పూ సహా అతడి వ్యక్తిగత సహాయకుడి అమిత్ యాదవ్‌పై పోలీసులకు ఫిర్యాదు చేశాడని పేర్కొన్నారు. గతంలోనూ పప్పూ యాదవ్ ఇలాగే బెదిరింపులకు పాల్పడ్డినట్టు ఆరోపణలు ఉన్నాయని, బాధితుడి ఫిర్యాదు మేరకు కేసు నమోదు చేసినట్టు పోలీసులు వెల్లడించారు. దీనిపై దర్యాప్తు చేపట్టామని చెప్పారు.

అయితే, ఈ ఆరోపణలపై పప్పూ యాదవ్‌ ఎక్స్ (ట్విట్టర్)‌ వేదికగా స్పందించారు. ‘‘నాపై ప్రజలకు అభిమానం పెరుగుతోంది.. రాష్ట్ర, దేశ రాజకీయాల్లో తనకు పెరుగుతున్న ఆదరణను ఓర్వలేక వారు కుట్రలు చేస్తున్నారు.. పూర్ణియాలో ప్రత్యర్థులు, అధికారులు నాపై చేస్తున్న కుట్రలను త్వరలోనే బయటపెడతా.. సుప్రీంకోర్టు సమగ్ర విచారణ జరిపి దోషులను ఉరి తీసే రోజు వస్తుంది’’ అని ట్వీట్ చేశారు. లోక్‌సభ ఎన్నికలకు ముందు కాంగ్రెస్ పార్టీలో చేరిన జన్‌ అధికార్ పార్టీ అధినేత పప్పూ యాదవ్‌.. పూర్ణియా నుంచి టిక్కెట్ ఆశించి భంగపడ్డారు. స్వతంత్ర అభ్యర్థిగా బరిలోకి దిగిన ఆయన.. జేడీ(యూ) అభ్యర్థి సంతోశ్‌ కుష్వాహాపై 23 వేలకు పైగా ఓట్ల మెజార్టీతో విజయం సాధించారు.