చంద్రబాబు ప్రమాణ స్వీకారానికి తారక్‌కు ఆహ్వానం.. చిక్కేంటంటే

ఆంధ్రప్రదేశ్ నూతన ముఖ్యమంత్రిగా టీడీపీ అధినేత చంద్రబాబు నాయుడు రేపు ( జూన్ 12న) ప్రమాణ స్వీకారం చేయనున్నారు. ఈ కార్యక్రమానికి ప్రధానమంత్రి నరేంద్ర మోదీ సహా వివిధ రంగాలకు చెందిన పలువురు ప్రముఖులు హాజరుకానున్నారు. అలాగే చంద్రబాబు ప్రమాణం స్వీకారానికి ఆహ్వానిస్తూ ఇప్పటికే రాజకీయ, సినీ రంగాలకు చెందిన పలువురికి ఆహ్వానాలు అందాయి. తాజాగా జూనియర్ ఎన్టీఆర్‌కు సైతం ఆహ్వానం పంపారు. బుధవారం కేసరపల్లి ఐటీ పార్క్ వద్ద జరిగే చంద్రబాబు నాయుడు ప్రమాణ స్వీకారానికి రావాల్సిందిగా తారక్‌కు ఆహ్వానం అందింది.

అయితే జూనియర్ ఎన్టీఆర్ ప్రస్తుతం దేవర షూటింగ్‌తో బిజీగా ఉన్నారు. ప్రస్తుతం గోవాలో దేవర మూవీ షూటింగ్ జరుగుతోంది. చంద్రబాబు ప్రమాణ స్వీకారానికి రావాలంటూ ఆహ్వానం అందటంతో ఇప్పుడు తారక్ ఆ కార్యక్రమానికి వెళ్తారా అనేది ఆసక్తికరంగా మారింది. ఇక ఏపీ ఎన్నికల్లో టీడీపీ కూటమి ఘన విజయం తర్వాత తారక్.. చంద్రబాబుకు అభినందనలు తెలియజేశారు. ప్రియమైన మావయ్యకు అభినందనలు అంటూ.. చంద్రబాబుతో పాటుగా ఎన్నికల్లో గెలిచిన నందమూరి బాలకృష్ణ, నారా లోకేష్, శ్రీభరత్, పురందేశ్వరిలకు శుభాకాంక్షలు తెలియజేశారు.

గత కొంతకాలంగా టీడీపీ శ్రేణులకు, జూనియర్ ఎన్టీఆర్ అభిమానులకు మధ్య పొసగడం లేదు. చంద్రబాబు అరెస్టైన సమయంలో, ఎన్టీఆర్ విశ్వవిద్యాలయం పేరు మార్పు సమయంలోనూ తారక్ సరిగా స్పందించలేదని తెలుగు తమ్ముళ్లు గుర్రుగా ఉన్నారు. అయితే ఫలితాల తర్వాత ఎన్టీఆర్.. చంద్రబాబుకు శుభాకాంక్షలు తెలియజేయడం.. ఆయన రిప్లై ఇవ్వటంతో కాస్త దగ్గరైనట్లు తెలుస్తోంది. ఇప్పుడు ప్రమాణ స్వీకారానికి రావాలంటూ తారక్‌కు ఆహ్వానం పంపటంతో .. ఆయన గోవా నుంచి వస్తారా అనేది ఆసక్తికరంగా మారింది.

మరోవైపు చంద్రబాబు నాయుడు ప్రమాణ స్వీకారంలో పాల్గొనేందుకు పలువురు సినీ ప్రముఖులు విజయవాడ చేరుకుంటున్నారు. మెగాస్టార్ చిరంజీవి.. తన తనయుడు గ్లోబల్ స్టార్ రామ్ చరణ్‌తో కలిసి ఇప్పటికే చేరుకున్నారు. అలాగే సూపర్ స్టార్ రజినీకాంత్ కూడా ప్రమాణ స్వీకారానికి వస్తున్నారు. మోహన్ బాబు, అల్లు అర్జున్ వంటి సినీ సెలబ్రిటీలు కూడా ఈ కార్యక్రమానికి వస్తున్నట్లు తెలిసింది. ఈ క్రమంలోనే ఎన్టీఆర్ కూడా వస్తే.. తారా తోరణంతో సభా ప్రాంగణం వెలుగులీననుంది.