ఏపీ అసెంబ్లీకి వెనుక గేట నుంచి వెళ్లిన జగన్,,,జగన్ వెళ్లే సమయంలో మావయ్యా అంటూ కేకలు

వైఎస్సార్‌సీపీ అధినేత, మాజీ ముఖ్యమంత్రి వైఎస్ జగన్ ఆంధ్రప్రదేశ్ అసెంబ్లీలో ఎమ్మెల్యేగా ప్రమాణం చేశారు. ప్రొటెం స్పీకర్‌ గోరంట్ల బుచ్చయ్య చౌదరి ఆయనతో ప్రమాణ స్వీకారం చేయించారు. అంతకుముందు తాడేపల్లి నివాసం నుంచి బయల్దేరి వచ్చిన జగన్.. అసెంబ్లీ వెనుక గేటు నుంచి ప్రాంగణంలోకి వెళ్లారు. ముఖ్యమంత్రిగా ఉన్న సమయంలో వైఎస్ జగన్ మోహన్‌రెడ్డి సీడ్‌ యాక్సెస్‌ రోడ్డు నుంచి మందడం మీదుగా సభకు వచ్చేవారు. అయితే ఈసారి మాత్రం రూటు పూర్తిగా మార్చేశారు. దీనికి కూడా కారణాల ఉన్నట్లు తెలుస్తోంది.

వైఎస్ జగన్ అసెంబ్లీకి వచ్చే సమయంలో అమరావతి రైతులు నిరసన తెలుపుతారని భావించారట. అందుకే వేరే మార్గంలో అసెంబ్లీకి వచ్చినట్లు సమాచారం. ముందుగా అసెంబ్లీ ప్రాంగణంలోకి వచ్చినా.. జగన్ మాత్రం లోపలికి వెళ్లలేదు. ఆయన సభ ప్రారంభమైన ఐదు నిమిషాల తర్వాత లోపలికి వెళ్లారు. జగన్ సభలోకి వచ్చి ప్రమాణం చేసేందుకు సమయం ఉండటంతో చివరి బెంచ్‌లో ఐదు నిమిషాల పాటూ కూర్చున్నారు. ఆయనతో పాటు పక్కనే వైఎస్సార్‌సీపీ ఎమ్మెల్యేలు వారి, వారి స్థానాల్లో కూర్చొన్నారు.

జగన్ పక్కనే పెద్దిరెడ్డితో పాటుగా మిగిలిన వైఎస్సార్‌సీపీ ఎమ్మెల్యేలు ఉన్నారు. వైఎస్ జగన్ ప్రమాణం చేసేందుకు వస్తున్న సమయంలో అందరికీ నమస్కారం చేస్తూ వెళ్లారు. ముఖ్యమంత్రి నారా చంద్రబాబుకు కూడా జగన్ నమస్కరించడంతో.. ఆయన కూడా ప్రతి నమస్కారం చేశారు. అంతకముందు వైఎస్ జగన్ పార్టీ ఎమ్మెల్యేలు, నేతలతో అసెంబ్లీలోని ఛాంబర్‌లో సమావేశం అయ్యారు. అసెంబ్లీలో అనుసరించాల్సిన వ్యూహాలపై చర్చించారు. తన ప్రమాణస్వీకార సమయం వచ్చినపుడు జగన్‌ సభలోకి అడుగుపెట్టారు.. ప్రమాణం చేసిన తర్వాత ఆయన సభలో ఉండకుండా ఛాంబర్‌కు వెళ్లిపోయారు. ఆ తర్వాత అసెంబ్లీ నుంచి బయల్దేరి తాడేపల్లి నివాసానికి వెళ్లిపోయారు. ఇదిలా ఉంటే.. వైఎస్ జగన్ అసెంబ్లీలోకి వెళ్లే సమయంలో.. కొందరు ఆకతాయిలు జగన్ మావయ్యా అంటూ పెద్దగా కేకలు వేశారు. ఈ వీడియో సోషల్ మీడియాలో వైరల్ అవుతోంది.

మరోవైపు వైఎస్ జగన్‌కు ప్రతిపక్ష హోదా లేకపోవడంతో అసెంబ్లీ లోపలికి ఆయన కారు అనుమతించకూడదు. అయితే వైఎస్సార్‌సీపీ రిక్వెస్ట్‌తో ఆ నిబంధనను పక్కనపెట్టి.. జగన్ కారును అసెంబ్లీ ప్రాంగణంలోకి అనుమతించినట్లు మంత్రి పయ్యావుల కేశవ్ తెలిపారు. అది ఆయనకు ఇచ్చిన గౌరవం అన్నారు.. ముఖ్యమంత్రి చంద్రబాబు కూడా ఇలాంటి చిన్న, చిన్న విషయాలు పట్టించుకోవాల్సిన అవసరం లేదని తమతో చెప్పారన్నారు. అందుకే వైఎస్ జగన్ కారును అసెంబ్లీ ఆవరణలోకి అనుమతించినట్లు పయ్యావుల కేశవ్ క్లారిటీ ఇచ్చారు. మొదటిరోజు అసెంబ్లీ ప్రొటెం స్పీకర్ గోరంట్ల బుచ్చయ్య చౌదరి సభ్యులతో ప్రమాణంచేయించారు. అనంతరం సభ వాయిదా పడగా.. శనివారం స్పీకర్ ఎన్నిక జరగనుంది.