గోవా వెళ్లేవారికి షాకింగ్ న్యూస్.. ఈ బీచ్‌కు వెళ్లాలంటే రిజర్వేషన్ చేసుకోవాల్సిందే

మన దేశంలో బీచ్‌కు వెళ్లాలంటే చాలా మంది గోవా వైపే చూస్తుంటారు. మన దేశ ప్రజలే కాకుండా ప్రపంచ దేశాల నుంచి కూడా గోవాకు నిత్యం ఎంతోమంది పర్యాటకులు వెళ్తూ ఉంటారు. ఇక గోవాలో రకరకాల బీచ్‌లు ఉంటాయి. అందులో కొన్ని బీచ్‌లు చాలా ఫేమస్‌ అవుతాయి. అయితే గోవాలోని ప్రముఖ బీచ్ అయిన కలంగుట్‌ బీచ్‌కు వెళ్లాలంటే మాత్రం ఇకపై ముందస్తు రిజర్వేషన్‌ తప్పనిసరి కానుంది. ఈ మేరకు స్థానిక పంచాయతీ అధికారులు ఒక తీర్మానం చేశారు. బీచ్‌లకు వచ్చే పర్యాటకులు చేస్తున్న పనుల కారణంగానే ఈ నిర్ణయం తీసుకున్నట్లు స్థానికులు వెల్లడించారు.

దేశ విదేశాల నుంచి సముద్ర తీరంలో సేదతీరేందుకు గోవా వచ్చిన పర్యాటకులు.. కొందరు లేనిపోని సమస్యలు తెచ్చిపెడుతున్నారని స్థానికులు ఆవేదన వ్యక్తం చేస్తున్నారు. మద్యం తాగుతూ, భోజనాలు చేస్తూ.. ఇతర ఆహార పదార్థాలు తిని.. అక్కడి పరిసరాల్లో చెత్తా చెదారం వేసి.. అంతా కలుషితం చేస్తున్నారని.. ఉత్తర గోవాలోని కలంగుట్‌ పంచాయతీ గ్రహించింది. ఇలాంటి పరిస్థితిని అరికట్టేందుకు ముందస్తు చర్యలు చేపట్టింది. కలంగుట్ బీచ్‌కు వచ్చే పర్యాటకులు రిజర్వేషన్లు చేసుకుని రావాలని తాజాగా నిర్ణయించింది. భారీగా వస్తున్న పర్యాటకుల తాకిడిని తట్టుకునేందుకు ఈ నిర్ణయం తీసుకున్నట్లు తెలిపారు. ఇందుకోసం వారి నుంచి అదనపు పన్ను వసూలు చేయాలని నిర్ణయం తీసుకుంది.

ఈ నెల ప్రారంభంలో జరిగిన కలంగుట్ పంచాయతీ సమావేశంలో ఈ సమస్యపై చర్చించి.. నిర్ణయం తీసుకున్నారు. ఎక్కడెక్కడి నుంచో పర్యాటకులు రావడం, అక్కడ ఇష్టం వచ్చినట్లు చెత్తా చెదారం వేయడం.. ఎక్కడపడితే అక్కడే వాహనాలు పార్క్ చేయడం, బహిరంగ ప్రదేశాల్లో వంట చేయడం వంటి వాటిపై సమావేశంలో చర్చించారు. బీచ్‌లో మద్యం సేవించి.. అక్కడే వంట చేసుకుని తిని.. ఆ తర్వాత చెత్త మొత్తం గ్రామంలో పడేస్తున్నారని పేర్కొన్నారు. ఇక కలంగుట్ గ్రామంలో ఉండేందుకు వచ్చిన వారు హోటళ్లలో ఎలాంటి రిజర్వేషన్లు చేసుకోవడం లేదని.. అందుకే తమ గ్రామానికి వచ్చే 5 రూట్లలో చెక్‌ పాయింట్లు ఏర్పాటు చేసేందుకు నిర్ణయం తీసుకున్నారు.

ఇక ఈ రిజర్వేషన్లు లేకుండా వచ్చే పర్యాటకులపై ట్యాక్స్ వేయాలని పంచాయతీ మీటింగ్‌లో తీర్మానం చేశారు. పర్యాటకులు బీచ్‌లో బాధ్యతగా ఉండేందుకే ఈ నిర్ణయం తీసుకున్నట్లు కలంగుట్ గ్రామ సర్పంచ్ జోసఫ్‌ సెకీరియా వెల్లడించారు. ఇప్పటికే పర్యాటకులు గ్రామంలోకి వచ్చే ఐదు మార్గాలను పంచాయతీ సిబ్బంది గుర్తించినట్లు తెలిపారు. ఆ మార్గాల్లో పోలీసులతో చెక్‌ పోస్టులు ఏర్పాటు చేయించాలని జిల్లా కలెక్టర్‌కు లేఖ రాయాలని పంచాయతీ ఏర్పాట్లు చేస్తోందని చెప్పారు. కలంగుట్ పంచాయతీ సిబ్బంది కూడా అక్కడ విధులు నిర్వర్తించేలా సన్నాహాలు చేస్తున్నట్లు వెల్లడించారు.