చంద్రబాబు టార్గెట్.. వైఎస్ షర్మిల ట్వీట్

కాంగ్రెస్ పార్టీ తెలంగాణలో రైతు రుణమాఫీ చేసింది. రేవంత్ రెడ్డి సర్కారు రూ.2 లక్షల వరకూ ఉన్న పంట రుణాలను మాఫీ చేసింది. తొలి విడతలో లక్ష రూపాయల లోపు రుణాలను మాఫీ చేస్తున్నారు. జులై నెలాఖరులోగా లక్షన్నర వరకూ ఉన్న పంట రుణాలను, ఆగస్ట్ 15 లోగా రెండు లక్షల రూపాయల వరకూ రుణాలను మాఫీ చేస్తారు. రూ. లక్ష రుణాల మాఫీ ప్రక్రియ గురువారం సాయంత్రం నుంచి మొదలైంది. ఈ నేపథ్యంలో తెలంగాణలో పంట రుణాల మాఫీని ఆధారంగా చేసుకుని ఏపీ ప్రభుత్వంపై విమర్శలు ఎక్కుపెట్టారు ఏపీ కాంగ్రెస్ చీఫ్ వైఎస్ షర్మిల. పంట రుణాల మాఫీ చేసిన తెలంగాణ ప్రభుత్వాన్ని అభినందిస్తూనే.. ఏపీ ప్రభుత్వాన్ని టార్గెట్ చేశారు. ఈ మేరకు ఎక్స్ వేదికగా సీఎం నారా చంద్రబాబు నాయుడిని ప్రశ్నిస్తూ ట్వీట్ చేశారు.

"15 ఏళ్ళ క్రితం, ఒకే దఫాలో దేశవ్యాప్తంగా రుణమాఫీ చేసి అన్నదాత పట్ల ప్రేమ, వ్యవసాయం పట్ల నిబద్ధత చూపింది నాటి కాంగ్రెస్ ప్రభుత్వం. మళ్ళీ నిన్న తెలంగాణలో రేవంత్ రెడ్డి గారి సారథ్యంలో, సోనియా, రాహుల్ గాంధీ గారి ఆలోచన, ఆదర్శాలకు అనుగుణంగా, ఇంకెప్పుడు అని వెక్కిరించే నోళ్లు మూస్తూ, కాంగ్రెస్ సర్కారు అందించిన రైతు రుణమాఫీ వరం చరిత్ర గర్వించే రోజు. రైతు కళ్ళల్లో ఆనందం తిరిగి తీసుకువచ్చే క్షణం. ఇది రాహుల్ గాంధీ గారు ఎన్నికల వేళ చేసిన వాగ్దానం సాకారమైన రోజు. తెలంగాణ సర్కారుకు మనస్ఫూర్తిగా నా అభినందనలు" అని వైఎస్ షర్మిల ట్వీట్ చేశారు.

ఇక ఇదే ట్వీట్‌లో ఏపీ సీఎం చంద్రబాబును షర్మిల టార్గెట్ చేశారు. ఏపీలోనూ రైతులకు పంట రుణాలు మాఫీ చేయాలని వైఎస్ షర్మిల డిమాండ్ చేశారు. తలసరి అప్పులో దేశంలోనే ఏపీ రైతులు మొదటి స్థానంలో ఉన్నారన్న వైఎస్ షర్మిల.. వారికి ఎందుకు రుణమాఫీ చేయడం లేదని ప్రశ్నించారు. కేంద్రం సహకారం తీసుకుని ఏపీలోనూ రైతు రుణమాఫీ చేయాలని వైఎస్ షర్మిల డిమాండ్ చేశారు. " రైతుల తలసరి అప్పులో, దేశవ్యాప్తంగా మొదటి స్థానంలో ఉన్న ఆంధ్రప్రదేశ్‌లో రైతు రుణమాఫీ ఎందుకు చెయ్యరు. సుమారు 2,45,554 రూపాయల రుణం రాష్ట్రంలోని ప్రతి రైతు నెత్తి మీద కత్తిలా వేలాడుతోంది. గడచినా దశాబ్దంలో అటు కరువు, తుఫానులు, ఇటు పూర్తికాని ప్రాజెక్టులు, సర్కారుల నిర్లక్ష్యం, వెరసి రాష్ట్ర వ్యవసాయం సర్వనాశనం అయిపోయింది. మరి డబుల్ ఇంజిన్ సర్కారు నడుపుతున్న మీరు, కేంద్ర సాయంతో ఎందుకు రుణమాఫీ చేయకూడదు. కాంగ్రెస్ అధికారంలోకి వచ్చి ఉంటే, రెండు లక్షల రూపాయల రుణమాఫీ, ఇచ్చిన మాట ప్రకారం కచ్చితంగా చేసి ఉండేదని గర్వంగా చెప్పగలము. కూటమి సర్కారును అడుగుతున్నాం, రైతు రుణమాఫీ చేయండి, అన్ని విధాలుగా చితికిపోయిన ఆంధ్రప్రదేశ్ రైతులకు చేయూతనివ్వండి. ఇది ఛాయిస్ కాకూడదు, బాధ్యత అనుకోవాలి." అంటూ షర్మిల ట్వీట్ చేశారు.