చంద్రబాబుకు కృతజ్ఞతలు చెప్పిన చెవిరెడ్డి భాస్కర్ రెడ్డి

చంద్రగిరి మాజీ ఎమ్మెల్యే చెవిరెడ్డి భాస్కర్ రెడ్డి తనయుడు, వైసీపీ లీడర్ చెవిరెడ్డి మోహిత్ రెడ్డిని శనివారం రాత్రి అరెస్ట్ పోలీసులు అరెస్ట్ చేశారు. బెంగళూరు ఎయిర్ పోర్టులో తిరుపతి పోలీసులు చెవిరెడ్డి మోహిత్ రెడ్డిని అదుపులోకి తీసుకున్నారు. అనంతరం 41ఏ కింద నోటీసులు ఇచ్చి విడిచిపెట్టారు. అయితే తనయుడు చెవిరెడ్డి మోహిత్ రెడ్డి అరెస్ట్ తర్వాత.. చెవిరెడ్డి భాస్కర్ రెడ్డి చేసిన ట్వీట్ ప్రస్తుతం వైరల్ అవుతోంది. కొడుకు అరెస్ట్ అయ్యాడని తెలిసిన తర్వాత.. చెవిరెడ్డి సీఎం చంద్రబాబుకు కృతజ్ఞతలు తెలియజేశారు. అదేంటీ.. అరెస్ట్ అయితే కృతజ్ఞతలు ఏంటీ అని ఆశ్చర్యపోతున్నారా..?

బెంగళూరులో మోహిత్ రెడ్డిని తిరుపతి పోలీసులు అదుపులోకి తీసుకున్నారని తెలిసిన వెంటనే చెవిరెడ్డి భాస్కర్ రెడ్డి రియాక్టయ్యారు. ఇది అక్రమ అరెస్ట్ అంటూ మండిపడ్డారు. తన కొడుకు వయస్సు 25 ఏళ్లని.. విదేశాల్లో ఉన్నత విద్యను అభ్యసించి ప్రజా జీవితంలోకి వచ్చాడని చెవిరెడ్డి భాస్కర్ రెడ్డి ట్వీట్ చేశారు. అక్రమ కేసులో తన కుమారుణ్ని అరెస్ట్‌ చేయించారని ఆరోపించారు. విదేశాల్లో చదివిన నా కొడుకుని వీధి పోరాటాలకు సిద్ధం చేస్తున్నారన్న చెవిరెడ్డి.. ఇందుకు చంద్రబాబుకు కృతజ్ఞతలు అంటూ ట్వీట్ చేశారు.

తాను విద్యార్థి దశ నుంచే ఉద్యమాలతో పెరిగినవాడినని.. నాకన్న మించి నా కొడుకు ప్రజల పక్షాన నిలబడి ప్రజా పోరాటాలు ఎలా ఉంటాయో ఈప్రభుత్వానికి, ఈ పోలీసు అధికారులకు రుచి చూపిస్తారంటూ భాస్కర్ రెడ్డి అభిప్రాయపడ్డారు. ప్రజల పక్షాన ఏ స్థాయి పోరాటానికైనా పూర్తిస్థాయిలో సిద్ధంగా ఉన్నామని స్పష్టం చేశారు.

మరోవైపు ఎన్నికలు పూర్తైన తర్వాత ప్రస్తుత చంద్రగిరి ఎమ్మెల్యే , అప్పటి టీడీపీ అభ్యర్థి పులివర్తి నానిపై పద్మావతి మహిళా యూనివర్సిటీలో దాడి జరిగింది. ఈ దాడికి సంబంధించి హత్యాయత్నం కేసు నమోదు చేసిన పోలీసులు.. విచారణ చేపట్టారు. ఇప్పటికే పలువురిని అదుపులోకి తీసుకున్నారు. ఇదే కేసులో చెవిరెడ్డి మోహిత్ రెడ్డిని చేర్చిన పోలీసులు.. శనివారం రాత్రి దుబాయ్‌ వెళ్లబోతున్న ఆయనను బెంగళూరు ఎయిర్ పోర్టులో అరెస్ట్ చేశారు. అనంతరం తిరుపతికి తీసుకువచ్చిన పోలీసులు.. కాసేపు విచారించి 41ఏ నోటీసులు ఇచ్చి వదిలేశారు. విదేశాలకు వెళ్లకూడదని షరతులు విధించారు.

మరోవైపు మోహిత్ రెడ్డిని పోలీసులు విచారిస్తున్నంత సేపు ఆయన తండ్రి భాస్కర్‌రెడ్డి ఎస్వీ యూనివర్సిటీ వద్ద ఫుట్ పాత్ మీదే కూర్చొని ఉన్నారు. పోలీసులు ఇచ్చిన 41ఎ నోటీసు తీసుకుని మోహిత్ రెడ్డి వచ్చిన తర్వాత కొడుకుతో కలిసి భాస్కర్ రెడ్డి మీడియాతో మాట్లాడారు. తన కొడుకుని అన్యాయంగా అరెస్ట్ చేశారని.. మోహిత్‌కి ఏ పాపం తెలియదని భాస్కర్ రెడ్డి అన్నారు. దీనిపై న్యాయ పోరాటం చేస్తామని.. తామేంటో చూపిస్తామని సవాల్ చేశారు.