టీటీడీ విజిలెన్స్‌ అండ్‌ సెక్యూరిటీ అధికారిగా రామ్‌కుమార్‌

టీటీడీ విజిలెన్స్‌ అండ్‌ సెక్యూరిటీ అధికారిగా ఎన్‌టీవీ రామ్‌కుమార్‌ నియమితులయ్యారు. ఆయన ప్రస్తుతం విజయనగరంలోని ఏపీఎస్పీ 9వ బెటాలియన్‌లో డీఎస్పీగా ఎటాచ్‌మెంట్‌లో ఉన్నారు. రామ్‌కుమార్‌ను టీటీడీకి బదిలీ చేస్తూ డీజీపీ ద్వారకా తిరుమలరావు ఉత్తర్వులు జారీచేశారు. ప్రస్తుతం టీటీడీ విజిలెన్స్‌ అండ్‌ సెక్యూరిటీ అధికారిగా ఉన్న ఎం గిరిధర్‌రావుకు పోస్టింగ్‌ ఇవ్వకుండా పోలీసు ప్రధాన కార్యాలయంలో రిపోర్టు చేయాలని ఆదేశించారు. గత ప్రభుత్వం హయాంలో టీటీడీ వీజీవోగా నియమితులైన బాలిరెడ్డిని బదిలీ చేశారు.. ఆయన స్థానంలో డీఎస్పీ ఏ సురేంద్రని నియమించారు.

మరోవైపు రాజంపేట, తుళ్లూరు డివిజన్ల డీఎస్పీలు వీఎన్‌కే చైతన్య, ఈ.అశోక్‌కుమార్‌ గౌడ్‌లు బదిలీ అయ్యారు. వీరిని డీజీపీ కార్యాలయంలో రిపోర్టు చేయాలని ఆదేశించారు.. ఎక్కడా పోస్టింగ్ ఇవ్వలేదు. పోలీసు ఎస్టాబ్లిష్‌మెంట్‌ బోర్డు సమావేశంలో తీసుకున్న నిర్ణయం మేరకు డీజీపీ సీహెచ్‌ ద్వారకాతిరుమలరావు ఉత్తర్వులు జారీ చేశారు. తాజాగా బదిలీ చేసిన డీఎస్పీలలో చైతన్య, అశోక్‌కుమార్‌లపై గతంలో ఫిర్యాదులు వచ్చాయి. గత ప్రభుత్వ హయాంలో వీరు వివాదాస్పద అధికారులుగా ఆరోపణలు వచ్చాయి.

డీఎస్పీ వీఎన్‌కే చైతన్య తాడిపత్రి డీఎస్పీగా చేసినప్పుడు టీడీపీ నేతలు, కార్యకర్తలపై అక్రమంగా కేసులు నమోదు చేశారనే ఆరోపణలు వచ్చాయి. చైతన్యపై తాడిపత్రికి చెందిన పలువురు 23 ప్రైవేటు కేసులు దాఖలు చేశారు. ఆ తర్వాత ఎన్నికలకు ముందు చైతన్య బదిలీపై రాజంపేట వెళ్లారు. ఎన్నికల పోలింగ్ తర్వాత తాడిపత్రికి విధుల నిమిత్తం వెళ్లారు.. తాడిపత్రిలో టీడీపీ నేత జేసీ ప్రభాకర్‌రెడ్డి నివాసంలోకి చొరబడి టీడీపీ కార్యకర్తలపై లాఠీలతో దాడి చేశారనే ఆరోపణలు వచ్చాయి. జేసీ ఇంట్లో పనిచేసే యువకుడిపై దాడి చేశారనే విమర్శలు వచ్చాయి.

మరోవైపు డీఎస్పీ అశోక్‌కుమార్‌ గౌడ్‌‌పైనా ఆరోపణలు వచ్చాయి. ఆయన నూజివీడు డీఎస్పీగా పనిచేసిన సమయంలో.. టీడీపీ ఎమ్మెల్యే చింతమనేని ప్రభాకర్‌‌ను వేధించారనే విమర్శలు వచ్చాయి. అశోక్‌ను ఎన్నికలకు కొద్ది రోజులు ముందు తుళ్లూరు డీఎస్పీగా బదిలీ చేశారు. ఎన్డీఏ కూటమి విజయం సాధించిన తర్వాత.. రాజధాని ప్రాంతం మందడంలో అమరావతి రైతులు బాణాసంచా కాల్చారు.. అయితేవా వారిపట్ల అశోక్‌కుమార్‌ గౌడ్‌ దురుసుగా ప్రవర్తించారని ఫిర్యాదులు వచ్చాయి. ఇప్పుడు ఆయన్ను కూడా బదిలీ చేసి పోస్టింగ్ ఇవ్వలేదు.