కొత్త ఎయిర్‌పోర్టులు.. ఆ ప్రాంతాల్లో సర్వే

ఆంధ్రప్రదేశ్ ప్రజలకు శుభవార్త. ఏపీలో కొత్తగా ఏడు ఎయిర్‌పోర్టులు నిర్మించనున్నారు. ఇందుకోసం కేంద్రం ప్రణాళికలు రచిస్తోంది. ఈ క్రమంలోనే కొత్త విమానాశ్రయాల ఏర్పాటుపై.. కేంద్ర పౌరవిమానయాన శాఖ మంత్రి కింజరాపు రామ్మోహన్ నాయుడు కీలక వ్యాఖ్యలు చేశారు. కొత్త ఎయిర్‌పోర్టుల ఏర్పాటు కోసం సర్వే చేయనున్నట్లు తెలిపారు. ఆంధ్రప్రదేశ్‌లోని కుప్పం, శ్రీకాకుళం, అన్నవరం, తాడేపల్లిగూడెం, నాగార్జునసాగర్, ఒంగోలు- నెల్లూరు, అనంతపురం ప్రాంతాల్లో విమానాశ్రయాలను ఏర్పాటు చేయాలని కేంద్ర ప్రభుత్వం భావిస్తోంది. ఇటీవలే ఢిల్లీ పర్యటనకు వెళ్లిన సీఎం చంద్రబాబు నాయుడు కూడా.. కేంద్ర మంత్రి రామ్మోహన్ నాయుడుతో ఇదే విషయమై చర్చించారు. ప్రస్తుతం ఉన్న ఏడు విమానాశ్రయాలకు తోడుగా మరో ఏడు ఎయిర్‌పోర్టులు నిర్మించాలని ప్రతిపాదించారు.

ఈ క్రమంలోనే కొత్త ఎయిర్‌పోర్టుల కోసం సర్వే చేయనున్నట్లు రామ్మోహన్ నాయుడు తెలిపారు. విమానాశ్రయాల ఏర్పాటు కోసం స్థల లభ్యత, ఆ ప్రాంతంలో సాధ్యాసాధ్యాలపై పరిశీలన జరుపుతామని తెలిపారు. అలాగే కేంద్రం ఇటీవల సీప్లేన్ విధానం తీసుకువచ్చింది. ఇందులో భాగంగా ఏపీలోనూ త్వరలోనే సీప్లేన్ కార్యకలాపాలు ప్రారంభిస్తామని రామ్మోహన్ నాయుడు తెలిపారు. ప్రకాశం బ్యారేజీ నుంచి శ్రీశైలం వరకూ మొదటి డెమో నిర్వహిస్తామని అన్నారు. మరోవైపు ఏపీలో కూటమి ప్రభుత్వం అధికారంలోకి వచ్చి చంద్రబాబు నాయుడు ముఖ్యమంత్రి అయిన తర్వాత.. పారిశ్రామికవేత్తల్లో ధైర్యం వచ్చిందని రామ్మోహన్ నాయుడు అన్నారు. ఏపీలో పెట్టుబడులు పెట్టేందుకు ఉత్సాహం చూపుతున్నారని చెప్పారు.

గత వైసీపీ ప్రభుత్వ పాలనలో అన్ని వ్యవస్థలూ నిర్వీర్యమయ్యాయని రామ్మోహన్ నాయుడు ఆరోపించారు. అయితే చంద్రబాబు సీఎం అయిన తర్వాత ఏపీ ఇమేజ్ జాతీయ స్థాయిలో పెరుగుతోందని అభిప్రాయపడ్డారు. మరోవైపు పుణెలో ఇటీవల జరిగిన హెలికాప్టర్‌ ప్రమాదంపైనా కేంద్ర మంత్రి కీలక వ్యాఖ్యలు చేశారు. ఈ ఘటనపై పూర్తిస్థాయి విచారణ జరుపుతున్నట్లు తెలిపారు. విచారణ పూర్తై నివేదిక అందిన తర్వాత ఈ అంశం మీద స్పందిస్తానని చెప్పారు. ఇలాంటి ఘటనలపై దర్యాప్తు జరిపేందుకు పౌరవిమానయాన శాఖలో ప్రత్యేక సంస్థ ఉందని కేంద్ర మంత్రి రామ్మోహన్ నాయుడు వివరించారు.