అప్పుడు జగన్ చేసిన తప్పునే ఇప్పుడు చంద్రబాబు చేస్తున్నారు.. షర్మిల

 వైఎస్ షర్మిల.. తన ట్వీట్‌తో మరోసారి ఆంధ్రప్రదేశ్‌లో అధికార విపక్షాలపై తీవ్ర స్థాయిలో మండిపడ్డారు. నారా చంద్రబాబు నేతృత్వంలోని తెలుగుదేశం, జనసేన, బీజేపీ కూటమి ప్రభుత్వం.. విద్య, వైద్య సంస్థలకు ఉన్న వైఎస్‌ఆర్‌ పేరును తొలగించడాన్ని ఏపీ పీసీసీ అధ్యక్షురాలు వైఎస్‌ షర్మిల తీవ్రంగా తప్పుబట్టారు. గతంలో ఎన్టీఆర్ పేరును తొలగించి.. మాజీ సీఎం వైఎస్‌ జగన్‌ మోహన్ రెడ్డి.. ఆనాడు చాలా పెద్ద తప్పు చేశారని ఆమె మండిపడ్డారు. రాష్ట్రంలో మెడికల్ కాలేజీలకు, ఆస్పత్రులకు దివంగత ముఖ్యమంత్రి వైఎస్ రాజశేఖర్ రెడ్డి పేరును తొలగించడాన్ని.. ప్రస్తుత ప్రభుత్వ ప్రతీకార చర్యగా కాంగ్రెస్ పార్టీ భావిస్తోందని షర్మిల వెల్లడించారు.

గతంలో అధికారంలో ఉన్నపుడు విద్యా, వైద్య సంస్థలకు ఉన్న ఎన్టీఆర్ పేరును తొలగించి.. జగన్ అప్పుడు పెద్ద తప్పు చేస్తే.. ఇప్పుడు అదే తప్పును చేస్తూ చంద్రబాబు అదే బాటలో నడుస్తున్నారని వైఎస్ షర్మిల కీలక వ్యాఖ్యలు చేశారు. దివంగత ముఖ్యమంత్రులు ఎన్టీఆర్ అయినా, వైఎస్సార్ అయినా ఉమ్మడి ఆంధ్రప్రదేశ్ రాష్ట్ర అభివృద్ధికి పాటుపడిన వాళ్లే అని షర్మిల తెలిపారు.

వారు తమ పాలనతో ప్రజల ఆశీర్వాదం పొంది.. రాష్ట్ర అభివృద్ధిలో తమదైన ముద్ర వేశారని తెలిపారు. రాజకీయాలకు అతీతంగా ఎన్టీఆర్, వైఎస్సార్‌లను చూడాలి తప్పితే.. వారికి నీచ రాజకీయాలు ఆపాదించడం సమంజసం కాదని మండిపడ్డారు. జగన్ నడిచిన బాటలోనే చంద్రబాబు నడుస్తున్నారని షర్మిల ట్విట్టర్‌ వేదికగా ఘాటుగా స్పందించారు.

గతంలో ఉమ్మడి రాష్ట్ర ముఖ్యమంత్రిగా పనిచేసిన వైఎస్సార్ అమలు చేసిన ఆరోగ్య శ్రీ, ఫీజు రీయంబర్స్‌మెంట్, రైతు రుణమాఫీ, రైతులకు ఉచిత కరెంట్, పెన్షన్లు ఇలా ప్రతి పథకం మొత్తం భారతదేశానికే ఆదర్శమని ఈ సందర్భంగా వైఎస్ షర్మిల కొనియాడారు. అయితే వైఎస్సార్ ఏదో ఒక్క పార్టీకి సొంతం కాదని.. ఆయన తెలుగు వారి ఆస్తి అని తెలిపారు. తెలుగు వారి గుండెల్లో వైఎస్సార్ స్థానం ఇప్పటికీ పదిలమేనని తేల్చి చెప్పారు. ఇక వైసీపీ మీద ఉన్న కోపాన్ని వైఎస్సార్ మీద రుద్దడం ప్రస్తుత ప్రభుత్వానికి సరికాదని తెలిపారు. వైసీపీలో వైఎస్సార్‌ లేరని.. అది ఎన్నటికైనా వైవీ సుబ్బారెడ్డి, సజ్జల రామకృష్ణారెడ్డి, విజయసాయి రెడ్డి పార్టీనే అంటూ వైఎస్ షర్మిల తీవ్రస్థాయిలో విరుచుకుపడ్డారు.