జమ్మూలోని అతిపెద్ద ఆర్మీబేస్‌పై ఉగ్రదాడి.. సైన్యం హైఅలర్ట్

గత కొన్ని నెలలుగా జమ్మూ కాశ్మీర్‌లో వరుసగా ఉగ్రవాద ఘటనలు చోటు చేసుకుంటుండటం తీవ్ర సంచలనంగా మారాయి. ఇప్పటికే జమ్మూ కాశ్మీర్ అసెంబ్లీ ఎన్నికలకు నోటిఫికేషన్ వెలువడగా.. మరికొన్ని రోజుల్లోనే పోలింగ్ జరగనుంది. ఈ క్రమంలోనే ఉగ్రవాద ఘటనలు భద్రతా సిబ్బందికి తీవ్ర తలనొప్పిగా మారాయి. ఇక జమ్మూ కాశ్మీర్‌లో అనుక్షణం అప్రమత్తంగా ఉంటున్నాయి. ఈ నేపథ్యంలోనే తాజాగా మరో భారీ ఉగ్రదాడి చోటు చేసుకోవడం గమనార్హం. జమ్మూలోనే అతి పెద్దదైన సుంజ్వాన్ సైనిక స్థావరంపై ఉగ్రవాదులు కాల్పులు జరిపారు. ఈ ఘటనతో అప్రమత్తమైన ఆర్మీ అధికారులు.. సుంజ్వాన్‌ సైనిక స్థావరానికి తాళం వేశారు. ఈ క్రమంలోనే ఆ కాల్పులు జరిపిన ఉగ్రవాదులను ఏరివేసేందుకు ఉగ్రవాదన నిరోధక ఆపరేషన్‌ ప్రారంభించారు.

ఈ ఘటనతో సుంజ్వాన్ ఆర్మీ బేస్ వద్ద హై అలర్ట్‌ ప్రకటించారు. సైన్యం మాత్రమే కాకుండా స్పెషల్‌ ఆపరేషన్‌ గ్రూప్‌ టీమ్‌లు కూడా రంగంలోకి దిగి ఈ యాంటీ టెర్రర్ ఆపరేషన్‌లో పాల్గొన్నాయి. ప్రస్తుతం సుంజ్వాన్ ఆర్మీ బేస్ వద్ద కాల్పులు జరుగుతున్నట్లు రక్షణ శాఖ వర్గాలు తెలిపాయి. ఉగ్రవాదులు జరిపిన కాల్పుల్లో.. సుంజ్వాన్ ఆర్మీ బేస్ వద్ద కాపలాగా ఉన్న ఓ ఆర్మీ జవాన్ గాయపడినట్లు సంబంధిత వర్గాలు వెల్లడించాయి. ఈ నేపథ్యంలోనే ఉగ్రవాదుల కోసం.. భద్రతా సిబ్బంది ఆ ప్రాంతం మొత్తం తీవ్రంగా గాలింపు చేపట్టారు. ప్రస్తుతం సుంజ్వాన్ ప్రాంతంలో కార్డన్‌ సెర్చ్‌ కొనసాగుతోంది.

ఇక ఈ సుంజ్వాన్ ఆర్మీ బేస్‌పై దాడి జరగడం ఇదేం కొత్త కాదు. 2018 ఫిబ్రవరిలోనూ సుంజ్వాన్‌ మిలిటరీ క్యాంప్‌పై భారీ ఉగ్రదాడి చోటు చేసుకుంది. ఆ ఉగ్రదాడిలో ఆరుగురు జవాన్లతోపాటు ఓ సాధారణ పౌరుడు కూడా ప్రాణాలు కోల్పోయారు. ఇక ఆ దాడికి పాల్పడిన ముగ్గురు ఉగ్రవాదులను పట్టుకున్న భద్రతా దళాలు అక్కడే మట్టుబెట్టాయి.

ఇక జమ్మూ కాశ్మీర్‌ అసెంబ్లీ ఎన్నికలు దగ్గరపడిన వేళ ఈ భారీ ఉగ్రదాడి చోటు చేసుకోవడం అక్కడ తీవ్ర భయాందోళనలకు గురి చేస్తోంది. కేవలం మరో రెండు వారాల్లో ఎన్నికలు జరగనున్న వేళ.. ఈ దాడి అటు ఆర్మీకి కూడా పెను సవాల్‌గా మారింది. జమ్మూ కాశ్మీర్‌లో మొత్తం 3 విడతల్లో ఎన్నికలు జరగనుండగా.. ఈ నెల 18వ తేదీన తొలి విడత పోలింగ్‌ నిర్వహించనున్నారు. జమ్మూ కాశ్మీర్ అసెంబ్లీ ఎన్నికల సందర్భంగా ఆ ప్రాంతంలో ఉగ్రదాడులు జరిగే అవకాశాలు ఉన్నాయని ఇప్పటికే నిఘా వర్గాలు హెచ్చరించాయి. ఈ హెచ్చరికలతో అప్రమత్తమైన భద్రతా బలగాలు.. జమ్మూ కాశ్మీర్‌లో పటిష్ఠ బందోబస్తు, గస్తీ ఏర్పాటు చేశాయి. అయినప్పటికీ ఈ ఉగ్రదాడి చోటు చేసుకోవడం తీవ్ర సంచలనంగా మారింది. ఇక ఇటీవలే కుప్వారా జిల్లాలోని లైన్ ఆఫ్ కంట్రోల్ వద్ద జరిపిన రెండు వేర్వేరు ఎన్‌కౌంటర్లలో ముగ్గురు ఉగ్రవాదులను భద్రతా బలగాలు మట్టుబెట్టాయి.