సల్మాన్ ఖాన్ సినిమాలో పాట పాడిన.. పంజాబీ సింగర్ నివాసంపై కాల్పులు
national | Suryaa Desk | Published : Tue, Sep 03, 2024, 10:06 PM
కెనడాలో నివాసం ఉంటోన్న ప్రముఖ పంజాబీ గాయకుడు ఏపీ ధిల్లాన్ నివాసం వెలుపల కాల్పులు కలకలం సృష్టించాయి. ఈ ఘటన వెనుక లారెన్స్ బిష్ణోయ్ గ్యాంగ్‌కు చెందిన రోహిత్ గోద్రా ఉన్నట్టు గుర్తించారు. కాల్పులు అనంతరం గోద్రా సోషల్ మీడియాలో పోస్ట్ చేసిన వీడియో ప్రస్తుతం వైరల్ అవుతోంది. బాలీవుడ్ నటుడు సల్మాన్ ఖాన్ సినిమాలో పాట పాడినందుకే ఈ చర్యలకు దిగినట్టు సమాచారం. వాంకోవర్‌లోని విక్టోరియా ఐలాండ్‌లో ధిల్లాన్ నివాసం వెలుపల ఆదివారం రాత్రి తుపాకితో నిందితుడు కాల్పులు జరిపాడు.
తాజాగా, ఈ ఘటనపై గాయకుడు స్పందించారు. తాను సురక్షితంగా ఉన్నట్టు ధిల్లాన్ వెల్లడించారు. ‘నేను, నావాళ్లు సురక్షితంగా ఉన్నాం.. అంతా మీ అభిమానం వల్లే.. నా క్షేమం కోరుకున్న ప్రతి ఒక్కరికీ పేరు పేరున ధన్యవాదాలు.. ’ అని ఇన్‌స్టాగ్రామ్‌లో పోస్ట్ పెట్టారు. లార్సెన్‌ బిష్ణోయ్ గ్యాంగ్‌కు చెందిన రోహిత్ గోద్రా.. సల్మాన్‌ఖాన్‌ చిత్రానికి గానం చేసినందునే ధిల్లాన్ నివాసంపై కాల్పులు జరిపినట్టు తన పోస్ట్‌లో వెల్లడించాడు. అంతేకాదు, ధిల్లాన్‌ను చంపుతానని బెదిరింపులకు దిగాడు.
ఏపీ ధిల్లాన్ 80ల కాలం నాటి సింథ్-పాప్‌ శైలిని పంజాబీ సంగీతంతో మిళితం చేసి పాటల పాడటంతో గుర్తింపు పొందారు. 'బ్రౌన్ ముండే', 'ఎక్స్‌క్యూస్‌లు', 'సమ్మర్ హై', 'విత్ యు', 'దిల్ ను' 'ఇన్‌స్నే' వంటి ఆల్బమ్‌తో అంతర్జాతీయగా మంచి పేరు వచ్చింది. గతేడాది నవంబరులో మరో గాయకుడు గిప్పీ గ్రేవాల్ నివాసం వద్ద కాల్పులు చోటుచేసుకున్నాయి. ఈ కాల్పులకు లారెన్స్ బిష్ణోయ్ గ్యాంగ్ బాధ్యత వహించింది.
ఇక, బాలీవుడ్ నటుడు సల్మాన్ ఖాన్‌తో ధిల్లాన్‌కు స్నేహపూర్వక సంబంధాలు ఉన్నాయి. ఈ ఘటనపై ఇప్పటివరకు పోలీసులు అధికారికంగా ఎటువంటి ప్రకటన చేయలేదు. కాగా.. ఈ ఏడాది ఏప్రిల్‌లో ముంబయిలోని సల్మాన్‌ఖాన్‌ ఇంటి వద్ద కాల్పుల ఘటన కలకలం సృష్టించిన సంగతి తెలిసిందే. ద్విచక్రవాహనంపై వచ్చిన ఇద్దరు దుండగులు ఆయన నివాసంలోని బాల్కనీపై నాలుగు రౌండ్ల కాల్పులు జరిపారు. దీంతో పోలీసులు లారెన్స్ బిష్ణోయ్, గోల్డీ బ్రార్‌పై ఎఫ్‌ఐఆర్‌ నమోదు చేశారు. వీరి నుంచి సల్మాన్ ఖాన్‌కు ప్రాణహాని ఉందని గతంలో ఎన్‌ఐఏ హెచ్చరించింది. ఈ క్రమంలోనే కెనడాలో గాయకుడి నివాసంపై కాల్పులు చర్చనీయాంశంగా మారాయి.
|
|