పల్నాడు జిల్లాలో హైటెన్షన్..వైసీపీ మాజీ ఎమ్మెల్యే కారుపై దాడి

ఈ మధ్యకాలంలో పల్నాడు జిల్లా అంటేనే ఉద్రిక్తతలకు అడ్రస్‌గా మారిపోతోంది. 2024 అసెంబ్లీ ఎన్నికల నాటి నుంచి పల్నాడు జిల్లాలో ఎక్కడో ఓ చోట ఉద్రిక్త పరిస్థితులు తలెత్తుతూనే ఉన్నాయి. ఎన్నికల సమయంలో మాచర్ల నియోజకవర్గంలో వైసీపీ, టీడీపీ శ్రేణులు పరస్పర దాడులకు కూడా అందరికీ తెలిసిన విషయమే. తాజాగా పల్నాడు జిల్లాలో మరోసారి ఉద్రిక్త వాతావరణం తలెత్తింది. వైసీపీకి చెందిన ఓ మాజీ ఎమ్మెల్యేపై టీడీపీ శ్రేణులు దాడికి యత్నించాయి. ఈ ఘటనలో మాజీ ఎమ్మెల్యే కారు అద్దాలు పగిలిపోయాయి. పోలీసులు సకాలంలో అక్కడకు చేరుకుని పరిస్థితిని చక్కదిద్దారు.

అసలు విషయానికి వస్తే పెదకూరపాడు మాజీ ఎమ్మెల్యే నంబూరు శంకరరావు కారుపైన టీడీపీ శ్రేణులు దాడి చేశాయి. వరద ప్రభావిత ప్రాంతాల్లో పర్యటన కోసం మాజీ ఎమ్మెల్యే నంబూరు శంకరరావు బయల్దేరారు. అయితే ఆయన పర్యటనను నిరసిస్తూ టీడీపీ శ్రేణులు ఆందోళనకు దిగాయి. వైసీపీ నేతల వరద ప్రభావిత ప్రాంతాల పర్యటనను అడ్డుకోవాలనే ఉద్దేశంతో నంబూరు శంకరరావు కారును అడ్డగించాయి. ఈ క్రమంలోనే కొంతమంది టీడీపీ కార్యకర్తలు నంబూరు శంకరరావు కారుపై దాడిచేశారు. కర్రలతో దాడి చేయడంతో కారు ధ్వంసమైంది. అద్దాలు పగిలిపోయాయి. అయితే విషయం తెలుసుకుని అక్కడకు చేరుకున్న పోలీసులు.. టీడీపీ కార్యకర్తలను అడ్డుకున్నారు. పరిస్థితిని అదుపులోకి తీసుకువచ్చారు.

మరోవైపు నంబూరు శంకరరావు విషయానికి వస్తే 2018లో ఆయన వైఎస్సార్ కాంగ్రెస్ పార్టీలో చేరారు. అనంతరం 2019లో ఎన్నికల్లో వైఎస్ జగన్ ఈయనకు.. పెదకూరపాడు అసెంబ్లీ నియోజకవర్గం టికెట్ కేటాయించారు. ఈ ఎన్నికల్లో టీడీపీ అభ్యర్థి కొమ్మాలపాటి శ్రీధర్‌పై నంబూరు శంకరరావు.. 14104 ఓట్ల మెజారిటీతో గెలిచి తొలిసారి ఎమ్మెల్యేగా అసెంబ్లీలో అడుగుపెట్టారు. అయితే 2024 ఎన్నికల్లో మరోసారి ఎమ్మెల్యే అవుదామన్న ఆయన ఆశలకు గండిపడింది. రాష్ట్రవ్యాప్తంగా కూటమి వేవ్ కొనసాగడంతో 2024 ఎన్నికల్లో పెదకూరపాడు నుంచి వైసీపీ తరుఫున పోటీ చేసిన నంబూరు శంకరరావు ఓడిపోయారు. నంబూరు శంకరరావు మీద టీడీపీ అభ్యర్థి భాష్యం ప్రవీణ్ కుమార్ 21 వేల ఓట్ల తేడాతో గెలుపొందారు.