వాయుగుండం తీరం దాటినా, ఈ జిల్లాల్లో భారీ వర్షాలు

ఆంధ్రప్రదేశ్‌లో వర్షాలు కొనసాగుతున్నాయి. బంగాళాఖాతంలో ఏర్పడిన తీవ్ర వాయుగుండం ఒడిశాలోని పూరీ సమీపంలో తీరం దాటింది. ఇది వాయవ్య దిశగా ఒడిశా మీదుగా ప్రయాణిస్తూ వాయుగుండంగా బలహీనపడనుందని వాతావరణ శాఖ తెలిపింది. ఈ వాయుగుండం రాబోయే 24 గంటల్లో ఛత్తీస్‌గఢ్‌ మీదుగా ప్రయాణిస్తుంది అంటున్నారు. ఆంధ్రప్రదేశ్, తెలంగాణ, ఒడిశా, పశ్చిమ బెంగాల్, జార్ఖండ్, ఛత్తీస్‌గఢ్‌ ప్రభుత్వాలను కూడా అలర్ట్ చేశారు. ఈ ప్రభావంతో ఇవాళ ఉత్తర కోస్తాలో భారీ వర్షాలు, దక్షిణ కోస్తా, రాయలసీమ జిల్లాల్లో తేలికపాటి నుంచి ఓ మోస్తరు వర్షాలకు అవకాశం ఉందంటున్నారు.

ఇవాళ శ్రీకాకుళం, విజయనగరం, పార్వతీపురం మన్యం, అల్లూరి సీతారామరాజు, విశాఖపట్నం జిల్లాల్లో భారీ వర్షాలు కురుస్తాయని అంచనా వేస్తున్నారు. వాయుగుండం ప్రభాంతో సముద్రం అలజడిగా ఉంటుందని.. మత్స్యకారులు బుధవారం వరకు వేటకు వెళ్లొద్దని హెచ్చరించారు. అలాగే కళింగపట్నం, విశాఖపట్నం, భీమిలి, గంగవరం, కాకినాడ పోర్టులకు మూడో నంబరు హెచ్చరికలు కొనసాగుతున్నాయి. అలాగే మచిలీపట్నం, నిజాంపట్నం, కృష్ణపట్నం పోర్టులకు ఒకటో నంబరు హెచ్చరికలు కొనసాగిస్తున్నారు. అయితే సోమవారం శ్రీకాకుళం జిల్లా కవిటిలో అత్యధికంగా 62.75 మిల్లీమీటర్ల వర్షపాతం నమోదైంది. శ్రీకాకుళం, విజయనగరం, అల్లూరి సీతారామరాజు, అనకాపల్లి జిల్లాల్లో భారీ వర్షాలు పడ్డాయి.

రెండు రోజులుగా భారీ వర్షాలు ఉత్తరాంధ్ర జిల్లాలను ముంచెత్తాయి. శని, ఆదివారాల్లో కురిసిన వర్షాలకు వాగులు, వంకలు పొంగి ప్రవహిస్తున్నాయి. వరద నీటి ఉద్ధృతికి పలుచోట్ల రోడ్లు తెగిపోయాయి. కల్వర్టులు కొట్టుకుపోవడంతో పలు గ్రామాలకు రాకపోకలు నిలిచిపోయాయి. అల్లూరి సీతారామరాజు, విశాఖ, అనకాపల్లి జిల్లాల పరిధిలో పలుచోట్ల కొండచరియలు విరిగిపడ్డాయి. ఆంధ్ర-ఒడిశా సరిహద్దుల్లో కుండపోత వర్షాలకు అల్లూరి సీతారామరాజు జిల్లా పరిధిలోని పిల్లిగడ్డ అంతర్రాష్ట్ర వంతెన కొట్టుకుపోవడంతో రాకపోకలు నిలిచిపోయాయి. అక్కడ కొత్త వంతెన నిర్మాణం సమయంలో ఐదుగురు కూలీలు వరద ఉద్ధృతిలో చిక్కుకుపోగా స్థానికులు రక్షించారు.

ఒడిశాలో కురుస్తున్న వర్షాలతో శ్రీకాకుళంలోని వంశధార, నాగావళి, బాహుదా నదుల్లో భారీగా వరద చేరుతోంది. విశాఖలోని మేఘాద్రి జలాశయం నీటిమట్టం పెరగడంతో అధికారులు అప్రమత్తమయ్యారు.

అల్లూరి సీతారామరాజు, అనకాపల్లి జిల్లాల్లో 3,508 హెక్టార్లు, శ్రీకాకుళం జిల్లాలో 1,223 హెక్టార్లు, విజయనగరం జిల్లాలో వెయ్యి ఎకరాల్లో వరి, పత్తి, మొక్కజొన్న పంటలు నీట మునిగాయి. శ్రీకాకుళం జిల్లాలో వర్షాలకు 38 ఇళ్లు దెబ్బతిన్నాయి. 17 చెరువులకు గండ్లు పడగా, 8 మూగజీవాలు చనిపోయాయి. విజయగనగరం జిల్లాలో రాష్ట్ర హైవే 68 కిలో మీటర్లు, అలాగే ఆర్‌అండ్‌బీ రోడ్లు 67 కి.మీ దెబ్బతినగా.. పార్వతీపురం మన్యం జిల్లాలో రాష్ట్ర రహదారులు 55 కి.మీ, ఆర్‌అండ్‌బీ రహదారులు 108 కిలోమీటర్ల మేర దెబ్బతిన్నాయి. విజయనగరం సర్కిల్‌ పరిధిలో విద్యుత్‌ స్తంభాలు కూలిపోవడంతో రూ. 21 లక్షల నష్టం వాటిల్లిందని అధికారులు చెబుతున్నారు.