ఏపీ వరద బాధితులకు.. మెఘా సంస్థ కళ్లు చెదిరే మొత్తం

ఆంధ్రప్రదేశ్‌లో భారీ వర్షాలు, వరదలతో నష్టపోయిన బాధితులకు అండగా నిలిచేందుకు ఎంతోమంది ముందుకు వస్తున్నారు. సినీ, రాజకీయ, వ్యాపార ప్రముఖులు, విద్యా సంస్థలు మానవత్వాన్ని చాటుకుంటున్నారు.. భారీగా విరాళాలు అందజేస్తున్నారు. సోమవారం ముఖ్యమంత్రి చంద్రబాబుకు, విద్య, ఐటీ శాఖల మంత్రి లోకేష్‌కు పలువురు చెక్కుల్ని అందించారు. ఆంధ్రప్రదేశ్‌ ముఖ్యమంత్రి సహాయ నిధికి మేఘా (ఎంఈఐఎల్‌) సంస్థ రూ.5 కోట్ల విరాళం ఇచ్చింది. మేఘా సంస్థ ఎండీ పీవీ కృష్ణారెడ్డి చెక్కు అందించారు. అంతేకాదు మేఘా సంస్థ.. విజయవాడలో వరద బాధితులకు మూడు రోజుల పాటు అల్పాహారం, మధ్యాహ్నం, రాత్రి పూట భోజనం, మంచినీళ్ల సీసాలను మేఘా సంస్థ పంపిణీ చేయగా.. బుడమేరు గండ్ల పూడ్చివేసేందుకు సహాకారం అందజేసింది.

జీఎమ్మార్‌ సంస్థకూడా రూ. 2.5 కోట్ల విరాళమిచ్చింది.. ఆ సంస్థ ఎగ్జిక్యూటివ్‌ డైరెక్టర్‌ చల్లా ప్రసన్న, సీఈవో మనోమేరాయ్‌తో కలిసి ఆ‌ చెక్కును ముఖ్యమంత్రి చంద్రబాబుకు అందజేశారు. ఏషియన్‌ ఇన్‌స్టిట్యూట్‌ ఆఫ్‌ గ్యాస్ట్రో ఎంటరాలజీ (ఏఐజీ) సీఎం సహాయనిధికి రూ.కోటి విరాళాన్ని అందజేసింది. ఈ మేరకు ఏఐజీ హాస్పిటల్స్‌ ఛైర్మన్‌ డా.డి.నాగేశ్వరరెడ్డి వైస్‌ ఛైర్మన్‌ పీవీఎస్‌ రాజు ఆన్‌లైన్‌ ద్వారా సీఎం సహాయనిధికి విరాళాన్ని బదిలీ చేశారు. అలాగే మెప్మా (పట్టణ పేదరిక నిర్మూలనా సంస్థ) తరఫున ఐఏఎస్‌ తేజ్‌భరత్‌ రూ.కోటి విరాళాన్ని అందజేశారు. టీడీపీ జాతీయ అధికార ప్రతినిధి కొమ్మారెడ్డి పట్టాభిరామ్, ఆయన మిత్రులు కలిసి రూ.50 లక్షల విలువైన వివిధ రకాల సామగ్రిని సమకూర్చారు.

సిద్ధార్థ ప్రభుత్వ వైద్య కళాశాల పూర్వ విద్యార్థుల సంఘం ముఖ్యమంత్రి సహాయ నిధికి రూ.15 లక్షల విరాళం అందించింది. వరద బాధితుల సహాయార్థం బీజేపీ ఎమ్మెల్యేలు నెల జీతాన్ని అందజేయనున్నట్లు ఆ పార్టీ శాసనసభా పక్ష నాయకుడు విష్ణుకుమార్‌రాజు తెలిపారు. శ్రీకాకుళం జిల్లా పాతపట్నం నియోజకవర్గ ఎమ్మెల్యే మామిడి గోవిందరావు సీఎం సహాయ నిధికి రూ.10 లక్షల విరాళం అందజేశారు. పరవాడ ఫార్మాసిటీలోని రక్షిత్‌ డ్రగ్స్, సాయినార్‌ గ్రూప్‌ ఆఫ్‌ కంపెనీల ఛైర్మన్‌ సి.హెచ్‌.ఎ.పి.రామేశ్వరరావు సీఎం సహాయ నిధికి రూ.10 లక్షల విరాళం ప్రకటించారు. అలాగే మరికొందరు ముఖ్యమంత్రి సహాయ నిధికి విరాళాలు అందజేశారు.