తగ్గేదేలే అంటున్న వైద్యులు,,,సుప్రీంకోర్టు ఆదేశాలు బేఖాతరు

వైద్యురాలిపై జరిగిన హత్యాచారానికి నిరసనగా ఆందోళనల చేస్తున్న డాక్టర్లు మంగళవారం సాయంత్రం 5 గంటల్లోపు విధుల్లోకి చేరాలని, లేకుంటే కఠిన చర్యలు తప్పవని సుప్రీంకోర్టు సోమవారం హెచ్చరించింది. అయితే, వైద్యులు మాత్రం తగ్గేదేలే అంటున్నారు. తమ ఆందోళనలు కొసాగిస్తామని తేల్చిచెప్పారు. ఇది ప్రజా ఉద్యమమని, ప్రభుత్వంగానీ. సర్వోన్నత న్యాయస్థానం గానీ ఈ విషయాన్ని మరిచిపోరాదని పేర్కొన్నారు. సుప్రీంకోర్టు సోమవారం నాటి విచారణ తమను తీవ్ర నిరుత్సాహానికి గురిచేసిందని ఆందోళనలు చేస్తోన్న వైద్యుల ప్రతినిధి అన్నారు.

‘సుప్రీంకోర్టు విచారణ మమ్మల్ని తీవ్ర నిరాశకు గురిచేసింది.. కేసును హైకోర్టు నుంచి సుప్రీంకోర్టుకు.. రాష్ట్ర పోలీసుల నుంచి సీబీఐకి బదిలీ చేశారు.. కానీ, ఇప్పటి వరకూ న్యాయం మాత్రం జరగలేదు’ అని ఆర్జీ కర్ ఆసుపత్రి జూనియర్ డాక్టర్ల ప్రతినిధి వ్యాఖ్యానించారు. న్యాయస్థానానికి బెంగాల్ ప్రభుత్వం తప్పుడు సమాచారం ఇచ్చిందని ఆరోపించారు. ఆరోగ్య వ్యవస్థ కుప్పకూలిందనే విషయం సరికాదని పేర్కొన్నారు. సుప్రీంకోర్టుకు రాష్ట్ర ప్రభుత్వం సమర్పించిన అఫిడ్‌విట్‌లో వైద్యులు విధులకు దూరంగా ఉండటం వల్ల ఆగస్టు 9 నుంచి 23 మంది రోగులు ప్రాణాలు కోల్పోయారని పేర్కొంది.

మరోవైపు, జూనియర్ వైద్యులు ఏ నిర్ణయం తీసుకున్నా సంపూర్ణ మద్దతు ఉంటుందని ఇండియన్ మెడికల్ అసోసియేషన్ బెంగాల్ విభాగం ప్రకటించింది. ‘క్రూరమైన నేరాన్ని దృష్టిలో ఉంచుకుని మేము సానుకూల ఫలితాన్ని ఆశించాం.. అయినప్పటికీ కోర్టు, సీబీఐ చర్యలతో పూర్తిగా నిరుత్సాహపడ్డాం.. మా తోటి వైద్యురాలికి న్యాయం చేయడానికి త్వరిత విచారణ కోసం ఎటువంటి చర్యలు తీసుకోలేదు. అది కూడా ఆసుపత్రుల్లో జరిగిన కొన్ని మరణాలకు జూనియర్ డాక్టర్లను బాధ్యులుగా చిత్రీకరించిన తీరు పూర్తిగా అవాస్తవం.. జూనియర్ వైద్యుల కారణంగా ఆసుపత్రుల్లో సేవలు పూర్తిగా నిలిచిపోయినట్టు చెప్పడం దిగ్భ్రాంతికరం’ అని జూడాలు మండిపడ్డారు.

కాగా, సోమవారం నాటి విచారణ సందర్భంగా భారత ప్రధాన న్యాయమూర్తి జస్టిస్‌ డీవై చంద్రచూడ్, జస్టిస్‌ జేబీ పార్దీవాలా, జస్టిస్‌ మనోజ్‌ మిశ్రాల ధర్మాసనం హెచ్చరించింది. ‘విధులను విస్మరించి నిరసనలు, ఆందోళనలు చేయడం సరికాదు. తక్షణమే వైద్యులు విధుల్లోకి చేరి రోగులకు సేవలందించాలి. క్షేత్రస్థాయిలో ఏం జరిగిందో మాకు తెలుసు.. మీ భద్రతకు జవాబుదారిగా జిల్లా కలెక్టర్లు, ఎస్పీలు ఉంటారు.. మంగళవారం సాయంత్రం 5 గంటల్లోపు విధులకు హాజరైన వారిపై ఎలాంటి క్రమశిక్షణ చర్యలు ఉండవు. కొనసాగిస్తే మాత్రం కఠిన చర్యలు తప్పవు’ అని న్యాయస్థానం స్పష్టం చేసింది. రాష్ట్ర ప్రభుత్వం కూడా ఆందోళనలు చేస్తోన్న వైద్యులపై ఎటువంటి చర్యలు తీసుకోబోమని కోర్టుకు తెలియజేసింది.