మాజీ భర్తపై ఇలా రివేంజ్ తీర్చుకున్న దుబాయ్ యువరాణి

దుబాయ్ యువరాణి షేక్ మహ్రా అల్ మక్తమ్ విడాకుల ప్రకటన యావత్తు ప్రపంచాన్ని విస్మయానికి గురిచేసిన విషయం తెలిసిందే. పెళ్లైన ఏడాదికే భర్త నుంచి ఆమె విడిపోవడం అందరి దృష్టిని ఆకర్షించింది. తాజాగా సోషల్ మీడియాలో ఆమె పెట్టిన మరో పోస్టు వైరల్ అవుతోంది. పెర్ఫ్యూమ్ వ్యాపారంలోకి అడుగుపెట్టిన ఆమె సొంతంగా ఓ బ్రాండ్‌ను తీసుకొస్తున్నట్టు తెలిపారు. దానికి ఆమె పెట్టిన పేరు ప్రస్తుతం నెట్టింట వైరల్‌గా మారింది. తాను ‘డైవోర్స్’ పేరిట ఒక కొత్త పెర్‌ఫ్యూమ్‌ను తీసుకొస్తున్నట్లు షేక్ మహ్రా ఇన్‌స్టాగ్రామ్ వేదికగా ప్రకటించారు. ‘మహ్రా ఎమ్‌1’ కింద త్వరలో మార్కెట్‌లోకి తీసుకురానున్నట్లు వెల్లడించారు.

దీనికి సంబంధించిన వివరాలను ఇన్‌స్టాలో ఆమె పోస్ట్ చేశారు. అయితే పెర్‌ఫ్యూమ్ ధర ఇతర వివరాలను మాత్రం తెలియజేయలేదు. దుబాయ్‌ పాలకుడు, యూఏఈ ప్రధాని షేక్‌ మొహమ్మద్‌ బిన్‌ రషీద్‌ అల్‌ మక్తూమ్‌ కుమార్తె అయిన షేక్‌ మహ్రా.. బ్రిటన్‌లో ఉన్నత విద్యను అభ్యసించారు. ఇంటర్నేషనల్ రిలేషన్స్‌లో పట్టా అందుకున్న ఆమె.. మహిళా సాధికారికతకు కృషి చేస్తున్నారు. గతేడాది మే 27న దుబాయ్‌కు చెందిన ప్రముఖ వ్యాపారవేత్త షేక్‌ మనాబిన్‌ మొహమ్మద్‌ అల్‌ మక్తూమ్‌ను వివాహం చేసుకున్నారు.

తన మొదటి పెళ్లి రోజున జీవితంలో అత్యంత విలువైన జ్ఞాపకమని పేర్కొంటూ భర్త, కుమార్తె కూడిన ఫొటోలను సోషల్‌ మీడియాలో మహ్రా షేర్‌ చేశారు. కానీ, కొన్ని రోజుల్లోనే ‘మనమిద్దరం మాత్రమే’ అంటూ కూతురితో ఉన్న ఫొటోను పెట్టడం చర్చనీయాంశమైంది. అనంతరం జులైలో విడిపోతున్నట్టు సోషల్ మీడియా ద్వారా ప్రకటించి షాకిచ్చారు. విడాకులు తీసుకోడానికి వేరే మహిళలతో భర్తకు సంబంధాలున్నాయనేది ఆమె ప్రధాన ఆరోపణ.

‘‘ప్రియమైన భర్తకు.. మీరు ఇతరుల సాన్నిహిత్యాన్ని కోరుకున్నందున విడాకులు తీసుకోవాలని నిశ్చయించుకున్నాను. ‘ఐ డైవోర్స్‌ యూ’. టేక్‌ కేర్‌.. మీ మాజీ భార్య’’ అని పోస్ట్ పెట్టారు. ప్రస్తుతం పెర్‌ఫ్యూమ్ బ్రాండ్‌ను పరిచయం చేస్తూ పెట్టిన పోస్ట్‌పై నెటిజన్లు స్పందిస్తూ.. ‘మీలో చాలా మందిలా ఆమె ఆన్‌లైన్‌లో వీడియోలు చేయడం లాంటివి కాకుండా చాలా నిశ్శబ్దంగా ఓ యువరాణిలా.. హుందాగా మహ్రా ఎలా ముందుకెళ్తున్నారో చూశారా? వ్యాపార రంగంలో నిలదొక్కుకుంటున్నారు’ అని ఓ నెటిజన్.. మీరు చాలా క్రియేటివ్.. మీ మాజీ భర్త ఎంతో బాధపడిపోతున్నారో’ ఇంకొకరు కామెంట్ చేశారు.