హాంకాంగ్‌లో మేల్ నర్సింగ్ విద్యార్ధిపై లైంగిక వేధింపులు.. వెలుగులోకి సందీప్ ఘోష్ నిర్వాకం

దేశవ్యాప్తంగా సంచలనం సృష్టించిన కోల్‌కతా ఆర్జీ కర్‌ మెడికల్ కాలేజీ ఆసుపత్రి ట్రెయినీ డాక్టర్ హత్యాచార ఘటనపై సీబీఐ విచారణ కొనసాగిస్తోంది. ఈ కేసులో విచారణ ఎదుర్కొంటున్న మాజీ ప్రిన్సిపల్‌ సందీప్‌ ఘోష్‌ను సీబీఐ గతవారం అరెస్టు చేసింది. ఈ నేపథ్యంలో డాక్టర్ సందీప్‌ ఘోష్‌ గురించి విస్తుగొలిపే విషయాలు వెలుగులోకి వస్తున్నాయి. గతంలో ఓ నర్సింగ్ స్టూడెంట్‌‌పై లైంగిక వేదింపులకు పాల్పడ్డారనే ఆరోపణలపై విదేశాల్లో కేసు నమోదయినట్టు తెలిసింది.

 హాంకాంగ్‌కు చెందిన సౌత్ చైనా మార్నింగ్ పోస్ట్ కథనం ప్రకారం.. 2017లో ముర్షిదాబాద్‌ మెడికల్ కళాశాలలో ఆర్థోపెడిక్‌ డిపార్ట్‌మెంట్‌ చీఫ్‌ ఫిజీషియన్‌గా సందీప్‌ ఘోష్‌ పనిచేశారు. ఈ క్రమంలో హాంకాంగ్‌ యౌ మా టీలోని క్వీన్‌ ఎలిజబెత్‌హాస్పిటల్‌లో 2017 ఏప్రిల్ 8న నిర్వహించిన ఓ క్లినికల్ అటాచ్‌మెంట్ ప్రోగ్రామ్‌కి ఘోష్ హాజరయ్యారు. ఆ సమయంలో హాంకాంగ్‌కు చెందిన ఓ పురుష నర్సింగ్‌ విద్యార్థిపై ఆయన లైంగిక వేధింపులకు పాల్పడ్డారనేది ప్రధాన ఆరోపణ. దీనిపై కేసు నమోదుకావడంతో హాంకాంగ్‌ కోర్టులో ఆయన విచారణను సైతం ఎదుర్కొన్నారు. కానీ, చివరకు ఘోష్‌ నిర్దోషిగా విడుదలయినట్లు తెలుస్తోంది.

నర్సింగ్ విద్యార్ధి తాను హాస్పిటల్‌లోని ఓ గదిలో దుస్తులు మార్చుకుంటుండగా.. సందీప్ ఘోష్ వెనుక నుంచి తనను తాకాడని ఆరోపించారు. తన ఎడమ పిరుదును తడుముతూ... ప్రైవేట్ భాగాలను తాకడానికి ప్రయత్నించాడని ఫిర్యాదులో పేర్కొన్నాడు. అయితే, తాను ఉద్దేశపూర్వకంగా అలా చేయలేదని, పొరపాటున చేయి తగిలడంతో తప్పుగా అర్ధం చేసుకున్నాడని ఘోష్ వివరణ ఇచ్చినట్టు మీడియా కథనాలు వెల్లడించాయి.

ఆగస్టు 9న కోల్‌కతాలో వైద్యురాలి హత్యాచారం ఘటన దేశం మొత్తాన్ని దిగ్భ్రాంతికి గురిచేసింది. అప్పటికి ప్రిన్సిపల్‌‌గా ఉన్న డాక్టర్ సందీప్ ఘోష్‌‌ విచారణకు ఎదుర్కొంటున్నారు. అంతేకాదు, ఆయన ఆర్థిక అవకతవకలకు పాల్పడినట్టు మాజీ డిప్యూటీ సూపరింటిండెంట్ చేసిన ఫిర్యాదు ఆధారంగా సీబీఐ, ఎన్‌ఫోర్స్‌మెంట్ డైరెక్టరేట్ (ఈడీ) కేసు నమోదుచేశారు. దాదాపు రెండు వారాల పాటు సుదీర్ఘంగా ప్రశ్నించిన సీబీఐ.. చివరకు సెప్టెంబరు 2న ఆయనను అరెస్టు చేసింది.