కాశ్మీర్‌లో మోదీ పర్యటన.. 42 ఏళ్ల తర్వాత దొడాకు ప్రధాని

 సెప్టెంబర్ 18వ తేదీన జమ్మూ కాశ్మీర్‌లో తొలి దశ అసెంబ్లీ ఎన్నికలు జరగనున్నాయి. ఈ క్రమంలోనే జమ్మూ కాశ్మీర్‌ ఎన్నికల ప్రచారంలో భాగంగా ప్రధానమంత్రి నరేంద్ర మోదీ.. ఇవాళ ఆ రాష్ట్రంలో పర్యటించనున్నారు. దొడా జిల్లాలో జరిగే ఎన్నికల ర్యాలీలో ప్రధాని మోదీ పాల్గొననున్నారు. 1982లో చివరిసారి భారత ప్రధానమంత్రి దొడా జిల్లాలో పర్యటించగా.. ఆ తర్వాత ఇప్పుడే భారత ప్రధాని హోదాలో నరేంద్ర మోదీ.. అక్కడ అడుగుపెట్టనున్నారు. ఇక 10 ఏళ్ల తర్వాత జమ్మూ కాశ్మీర్‌లో అసెంబ్లీ ఎన్నికలు జరుగుతుండటంతో హిమాలయ రాష్ట్రంలో పొలిటికల్ హీట్ పెరుగుతోంది. ఈ క్రమంలోనే ఎన్నికల ప్రచారం కోసం ప్రధాని మోదీ జమ్మూ కాశ్మీర్‌లో పర్యటించనున్నారు.

అయితే 42 ఏళ్ల క్రితం అప్పటి భారత ప్రధాన మంత్రి ఇందిరా గాంధీ చివరిసారిగా దోడాలో పర్యటించారు. ఆ తర్వాత ఇప్పుడు ప్రధాని మోదీ.. దోడాలో తన మొదటి ఎన్నికల సమావేశాన్ని నిర్వహించనున్నారు. 1982లో దోడాలో అప్పటి ప్రధాన మంత్రి చివరిసారిగా పర్యటించారని కేంద్ర మంత్రి, జమ్మూ కాశ్మీర్‌కు బీజేపీ ఎన్నికల ఇన్‌ఛార్జ్‌గా ఉన్న కిషన్‌ రెడ్డి వెల్లడించారు. అయితే జమ్మూ కాశ్మీర్‌ అసెంబ్లీ ఎన్నికలు నిర్వహించాలని నిర్ణయించినప్పటి నుంచి అక్కడ ఉగ్ర కదలికలు పెరిగిన నేపథ్యంలో.. ఇవాళ ఆ రాష్ట్రంలో ప్రధాని మోదీ పర్యటిస్తున్నారు. దీంతో భారీగా అక్కడ బందోబస్తు ఏర్పాటు చేశారు. దోడా, కిష్త్వార్‌ జిల్లాల్లో అధికారులు భద్రతను మరింత కట్టుదిట్టం చేశారు. ప్రధాని మోదీ చేపట్టే ఎన్నికల ర్యాలీని శాంతియుతంగా నిర్వహించేందుకు భారీగా సైన్యం, పోలీసులను మోహరించారు.

మరోవైపు.. గత కొంతకాలంగా జమ్మూ కాశ్మీర్‌లో ఉగ్రవాద దాడులు పెరిగిపోతుండటం తీవ్ర ఆందోళన కలిగిస్తోంది. ఇక గత 24 గంటల్లోనే కథువా, కిశ్త్వార్ సహా పలు జిల్లాల్లో జరిగిన ఉగ్రదాడుల్లో మొత్తం ఐదుగురు ఉగ్రవాదులను భద్రతా బలగాలు మట్టుబెట్టాయి. ఇక ఈ ఉగ్రదాడుల్లో ఇద్దరు సైనికులు అమరులు అయ్యారు. మరో ఇద్దరు జవాన్లకు గాయాలు కాగా.. వారు ఆస్పత్రిలో చికిత్స పొందుతున్నారు. అసెంబ్లీ ఎన్నికలు దగ్గరపడుతున్న వేళ.. వరుసగా ఉగ్రవాద దాడులు చోటు చేసుకుంటుండటంతో తీవ్ర కలవరం మొదలైంది.

మణిపూర్‌లో మళ్లీ హైటెన్షన్ 5 రోజులు ఇంటర్నెట్ కట్

జమ్మూ కాశ్మీర్‌ అసెంబ్లీకి మొత్తం 3 దశల్లో ఎన్నికలు నిర్వహించనున్నారు. సెప్టెంబర్‌ 18వ తేదీన తొలి విడత.. 25వ తేదీన రెండో విడత.. అక్టోబర్‌ 1వ తేదీన మూడో విడతలో పోలింగ్ జరగనుంది. ఇక అక్టోబర్‌ 5వ తేదీన హర్యానా అసెంబ్లీకి ఎన్నికలు జరగనుండగా.. ఆ రెండు రాష్ట్రాల్లో అక్టోబర్‌ 8వ తేదీన ఓట్ల లెక్కింపు చేపట్టి ఫలితాలను వెల్లడించనున్నారు. మోదీ దోడా పర్యటన తర్వాత హర్యానాలోని కురుక్షేత్రలో నిర్వహించనున్న ఎన్నికల ర్యాలీలో పాల్గొననున్నారు.