ఒడిశా-ఛత్తీస్‌గఢ్‌ సరిహద్దుల్లో మళ్లీ భారీ ఎన్‌కౌంటర్‌,,,పోలీస్ క్యాంపుపై నక్సల్స్ దాడి

ఒడిశా-ఛత్తీస్‌గఢ్ బోర్డర్‌లో పోలీసులు, మావోయిస్టులకు మధ్య భారీగా ఎదురుకాల్పులు చోటు చేసుకున్నాయి. ఇటీవలి కాలంలో మావోయిస్టులకు వరుసగా భారీ ఎదురుదెబ్బలు తగులుతున్న వేళ.. ఒక్కసారిగా పోలీసులపైకి నక్సల్స్ ఎదురుతిరిగారు. ఈ క్రమంలోనే ఏకంగా పోలీసుల బేస్ క్యాంప్‌పై మావోయిస్టులు ఒక్కసారిగా విరుచుకుపడ్డారు. సుక్మా జిల్లాలో జరిగిన ఈ దాడికి వ్యతిరేకంగా భద్రతా బలగాలు మావోయిస్టులపైకి ఎదురుకాల్పులు చేశారు. దీంతో ఇరువర్గాల మధ్య భీకర కాల్పులు చోటు చేసుకున్నాయి. దీంతో ఈ ఎదురుకాల్పుల్లో ఒక మావోయిస్ట్ మృతి చెందినట్లు అధికారులు తెలిపారు.

మావోయిస్ట్ కమాండర్ హిడ్మా స్వస్థలం అయిన ఛత్తీస్‌గఢ్‌ సుక్మా జిల్లాలోని పూర్వాతి గ్రామంలో ఉన్న పోలీసుల బేస్‌ క్యాంపుపై ఈ దాడి జరిగిందని పోలీసులు వెల్లడించారు. జాగుర్‌గుండా పోలీస్ స్టేషన్ పరిధిలోని పోలీసుల బేస్ క్యాంప్‌పై మావోయిస్ట్‌లు మెరుపు దాడులకు దిగినట్లు సుక్మా ఎస్పీ కిరణ్‌ చవాన్‌ తెలిపారు. శుక్రవారం రాత్రి పోలీస్ క్యాంప్ సమీపంలో కాపు కాసిన మావోయిస్టుల బృందం.. ఒక్కసారిగా 15- 20 సార్లు అండర్‌ బారెల్‌ గ్రానెడ్‌ లాంచ్‌ దాడికి దిగినట్లు సుక్మా ఎస్పీ పేర్కొన్నారు. అయితే మావోయిస్టులు దాడి మొదలుపెట్టగానే.. క్షణాల్లో స్పందించిన పోలీసులు, భద్రతా దళాలు ఎదురు కాల్పులు జరిపినట్లు వివరించారు. పోలీసులు చేసిన దాడులతో మావోయిస్టులు దండకారణ్యంలోకి పారిపోయినట్లు పేర్కొన్నారు.

ఈ ఘటనతో అలర్ట్ అయిన భద్రతా బలగాలు.. శనివారం తెల్లవారుజాము నుంచి సుక్మా జిల్లా అటవీ ప్రాంతంలో భారీ సెర్చ్ ఆపరేషన్‌ను చేపట్టాయి. బస్తర్‌ ఫైటర్లు, డీఆర్జీ పోలీసులు కలిసి ఈ అడవిలో మావోయిస్టుల కోసం వేటను ప్రారంభించాయి. ఈ క్రమంలోనే మరోసారి మావోయిస్టులు.. పోలీసులపైకి కాల్పులు జరిపారు. అనంతరం పోలీసులు ఎదురుకాల్పులు జరపగా.. ఓ మావోయిస్టు మృతి చెందినట్లు పోలీసులు వెల్లడించారు. సంఘటనా స్థలంలో పెద్ద ఎత్తున ఆయుధాలు, భారీగా మందుగుండు సామగ్రి, మావోయిస్టుల వస్తువులను స్వాధీనం చేసుకున్నట్లు వివరించారు. అనంతరం ఆ ప్రాంతంలో మావోయిస్టుల కోసం ఇంకా భద్రతా బలగాలు గాలింపు చర్యలు చేపట్టాయి.