ఎన్నికల వేళ కాశ్మీర్‌లో 2 ఎన్‌కౌంటర్లు.. ఇద్దరు సైనికులు వీరమరణం

ఈనెల 18వ తేదీన జమ్మూ కాశ్మీర్ అసెంబ్లీ ఎన్నికలు ప్రారంభం కానున్నాయి. 2019లో ఆర్టికల్ 370ని రద్దు చేస్తూ కేంద్ర ప్రభుత్వం నిర్ణయం తీసుకున్న తర్వాత తొలిసారి ఆ రాష్ట్రంలో అసెంబ్లీ ఎన్నికలు జరుగుతుండటం తీవ్ర ఆసక్తిని కలిగిస్తున్న వేళ.. గత కొన్ని నెలలుగా జమ్మూ కాశ్మీర్‌లో వరుసగా ఉగ్రవాద దాడులు, ఎన్‌కౌంటర్లు జరగడం తీవ్ర ఆందోళనను కలిగిస్తోంది. తాజాగా కథువా, కిశ్త్వార్ జిల్లాల్లో జరిగిన రెండు వేర్వేరు ఎన్‌కౌంటర్లలో ఇద్దరు ఆర్మీ జవాన్లు నేలకొరిగారు. మరో ఇద్దరు జవాన్లు గాయపడినట్లు అధికారులు వెల్లడించారు. ఇక ముగ్గురు ఉగ్రవాదులు హతం అయ్యారు. ఇంటెలిజెన్స్ వర్గాల నుంచి వచ్చిన సమాచారంతో రంగంలోకి దిగిన భారత సైన్యం.. ఉగ్రవాదులను చుట్టుముట్టి మట్టుబెట్టింది.

శుక్రవారం రోజున జమ్మూ కాశ్మీర్‌లోని కథువా, కిశ్త్వార్ జిల్లాల్లో రెండు ఎన్‌కౌంటర్లు జరిగాయి. కథువా జిల్లాలో జరిగిన ఎన్‌కౌంటర్‌లో ముగ్గురు ఉగ్రవాదులను భారత సైన్యం మట్టుబెట్టింది. ఇక కిశ్త్వార్‌ జిల్లాలో ఉగ్రవాదులు సంచరిస్తున్నారని.. ఇంటలిజెన్స్‌ అధికారులు భారత సైన్యానికి సమాచారం అందించారు. దీంతో అలర్ట్ అయిన ఇండియన్ ఆర్మీ.. జమ్మూ కాశ్మీర్‌ పోలీసులతో కలిసి ప్రత్యేక ఆపరేషన్‌ చేపట్టింది. శుక్రవారం మధ్యాహ్నం మూడున్నర గంటలకు.. ఉగ్రవాదులు ఉన్న ప్రాంతాన్ని సైన్యం, పోలీసులు గుర్తించి చుట్టుముట్టాయి. ఈ విషయం తెలుసుకున్న ఉగ్రవాదులు కాల్పులు జరిపారు.

వెంటనే స్పందించిన సైన్యం, పోలీసులు.. వారిపై ఎదురుకాల్పులకు దిగింది. ఈ ఎన్‌కౌంటర్‌లో నలుగురు సైనికులు గాయాల పాలయ్యారు. దీంతో ఆ గాయపడిన సైనికులను సమీపంలోని కమాండ్‌ సెంటర్‌కు తరలించిన చికిత్స అందించాయి. వీరిలో ఇద్దరు చికిత్స పొందుతూ వీరమరణం పొందారు. అనంతరం ఆ ప్రాంతంలో ఉగ్రవాదుల కోసం గాలింపు చేపట్టాయి. జులై నెలలో దోడా జిల్లాలో జరిగిన ఉగ్రదాడిలో ఈ ఉగ్రవాదుల హస్తం ఉందని సైన్యం అనుమానిస్తోంది. ఆ ఘటనలో నలుగురు సైనికులు వీరమరణం పొందారు.

చీనాబ్ లోయలోని దోడా, కిశ్త్వార్, రాంబన్‌ జిల్లాల్లో మరికొన్ని రోజుల్లోనే అసెంబ్లీ ఎన్నికలు జరగనున్నాయి. ఇలాంటి సమయంలో ఆ ప్రాంతాల్లో వరుసగా ఎన్‌కౌంటర్లు చోటుచేసుకుంటుండటంతో స్థానికులు తీవ్ర భయాందోళనకు గురవుతున్నారు. దక్షిణ కాశ్మీర్‌‌లోని అనంత్‌నాగ్‌, పుల్వామా, షోపియన్‌, కుల్గాం జిల్లాల్లోని 16 అసెంబ్లీ నియోజకవర్గాలకు ఈనెల 18వ తేదీన తొలి విడత అసెంబ్లీ ఎన్నికలు జరగనున్నాయి. మొత్తం 3 విడతల్లో జమ్మూ కాశ్మీర్ అసెంబ్లీకి ఎన్నికలు జరగనున్నాయి.