ఒకేసారి అందుబాటులోకి మరో 6 వందే భారత్ రైళ్లు

దేశంలో కొత్తగా మరో ఆరు వందే భారత్ ఎక్స్‌ప్రెస్ రైళ్లు అందుబాటులోకి వచ్చాయి. ఇప్పటికే పలు మార్గాల్లో వందే భారత్ ఎక్స్‌ప్రెస్ రైళ్లు నడుస్తున్నాయి. అయితే రైలు ప్రయాణికుల నుంచి వీటికి లభిస్తున్న ఆదరణ, డిమాండ్ మేరకు భారతీయ రైల్వే కూడా వివిధ మార్గాల్లో ఈ వందే భారత్ రైళ్లు ఏర్పాటు చేస్తోంది. ఈ క్రమంలోనే ఆదివారం ఆరు వందే భారత్ రైళ్లను ప్రధానమంత్రి నరేంద్ర మోదీ ప్రారంభించారు. వాస్తవానికి ఝార్ఖండ్ వేదికగా వందే భారత్ రైళ్ల ప్రారంభోత్సవం కార్యక్రమం ముందుగా షెడ్యూల్ చేశారు. అయితే వాతావరణ పరిస్థితులు అనుకూలించకపోవటంతో ప్రధానమంత్రి మోదీ వర్చువల్‌గా ఆరు వందే భారత్ ఎక్స్‌ప్రెస్ రైళ్లను ప్రారంభించారు.

భాగల్పూర్- హౌరా, రూర్కెలా - హౌరా, గయా - హౌరా, టాటానగర్ - పాట్నా, బ్రహ్మపూర్ - టాటానగర్, డియోఘర్-వారణాసి మార్గాల్లో ఈ ఆరు వందే భారత్ రైళ్లు నడవనున్నాయి. మరోవైపు ఈ ఆరు వందే భారత్ రైళ్లు అందుబాటులోకి రావటంతో.. ఝార్ఖండ్‌లోని ఢియోఘర్‌లో ఉన్న బైద్యనాథ్ ధామ్, వారణాసిలోని కాశీ విశ్వనాథ ఆలయం, కలకత్తాలోని బేలూరు మఠం, కాళీఘాట్ వంటి దర్శనీయ ప్రాంతాలకు సులువుగా ప్రయాణించవచ్చు. ఈ విషయాన్ని రైల్వే మంత్రి అశ్వినీ వైష్ణవ్ తెలిపారు. ఇక ఈ వందే భారత్ రైళ్లు గంటకు 160 కిలోమీటర్ల వేగంతో ప్రయాణిస్తాయి. మరోవైపు తెలుగు రాష్ట్రాల్లోనూ మరో రెండు వందే భారత్ రైళ్లను ప్రధానమంత్రి నరేంద్ర మోదీ రేపు ప్రారంభించనున్నారు. సికింద్రాబాద్ - నాగ్‌పూర్, విశాఖపట్నం- దుర్గ్ మధ్య వందే భారత్ రైళ్లను ప్రధాని రేపు ప్రారంభిస్తారు.

మరోవైపు దేశంలోనే తొలి వందే మెట్రోను కూడా ప్రధానమంత్రి మోదీ రేపు ప్రారంభిస్తారు. గుజరాత్‌లోని అహ్మదాబాద్ వేదికగా జరిగే కార్యక్రమంలో అహ్మదాబాద్‌- భుజ్‌ మధ్య వందే మెట్రో రైలును ప్రధాని రేపు ప్రారంభిస్తారు. వందే భారత్ ఎక్స్‌ప్రెస్ రైలు గంటకు 150 కిలోమీటర్ల వేగంతో ప్రయాణిస్తే.. వందే మెట్రో గరిష్టంగా గంటకు 130 కి.మీ వేగంతో వెళ్తుంది. ఇక వందే మెట్రో పూర్తిగా అన్ రిజర్వ్‌డ్. వందే మెట్రోలో 16 కోచ్‌లు ఉంటాయి. 1150 మంది కూర్చుని, సుమారుగా 2 వేల మంది ప్రయాణికులు నిలబడి ఒకేసారి ప్రయాణించవచ్చు. తక్కువ దూరం ఉన్న పట్టణాల మధ్య ఈ వందే మెట్రోలను తేవాలని రైల్వే శాఖ భావిస్తోంది.