ఏపీ వరద బాధితులకూ కుమారి ఆంటీ సాయం.. ఎంతంటే?

ఏపీలోని వరద బాధితులకు విరాళాలు కొనసాగుతున్నాయి. ఈ క్రమంలోనే పలువురు ప్రముఖులు సీఎం చంద్రబాబు నాయుడుని కలిసి ముఖ్యమంత్రి సహాయనిధికి తమ విరాళాలు అందిస్తున్నారు. వరద బాధితులకు అండగా ఉండేందుకు తమ వంతు సాయం చేస్తున్నారు. తాజాగా ఏపీలోని వరద బాధితుల కోసం ఎంప్రెడా మైన్స్ అండ్ మినరల్స్ చైర్మన్ ఏ ఎస్ విక్రమ్ కోటి రూపాయలు విరాళం అందించారు. ముఖ్యమంత్రి నారా చంద్రబాబు నాయుడును కలిసి విరాళం తాలూకూ చెక్ అందజేశారు. ఈ సందర్భంగా ఆయనను సీఎం అభినందించారు. మరోవైపు తెలుగు రాష్ట్రాల్లో ఫేమస్ అయిన కుమారి ఆంటీ కూడా ఏపీలోని వరద బాధితులకు తన వంతు సాయం చేశారు. వరద బాధితుల సహాయం కోసం కుమారి ఆంటీ రూ.50 వేలు విరాళం రూపంలో అందించారు. చంద్రబాబును కుటుంబంతో సహా కలిసిన కుమారి ఆంటీ విరాళం అందజేశారు. ఈ సందర్భంగా రాష్ట్రం కోసం సాయం చేసిన కుమారి ఆంటీని చంద్రబాబు అభినందించారు.

గుడివాడకు చెందిన కుమారి ఆంటీ స్థానిక ఎమ్మెల్యే వెనిగండ్ల రాముతో కలిసి క్యాంపు కార్యాలయంలో ఉన్న చంద్రబాబు వద్దకు వచ్చారు. విరాళం అందించిన తర్వాత కుమారి ఆంటీతో చంద్రబాబు కాసేపు ముచ్చటించారు. యోగక్షేమాలు అడిగి తెలుసుకున్నారు. ఇక కుమారి ఆంటీ ఇప్పటికే తెలంగాణ వరద బాధితులకు కూడా విరాళం అందించిన సంగతి తెలిసిందే. తెలంగాణ ముఖ్యమంత్రి రేవంత్ రెడ్డిని కలిసి.. విరాళం తాలూకు చెక్ అందించారు కుమారి ఆంటీ. దీంతో కుమారి ఆంటీని రేవంత్ రెడ్డి అభినందించిన సంగతి తెలిసిందే.

గుడివాడకు చెందిన దాసరి సాయి కుమారి 2011లో హైదరాబాద్‌లో స్ట్రీట్ ఫుడ్ సెంటర్ స్టార్ట్ చేశారు. మాదాపూర్‌లో స్టాల్ ఏర్పాటు చేయగా.. తర్వాత కుమారి ఆంటీగా ఫేమస్ అయ్యారు. నాన్ వెజ్, వెజ్ వంటకాలతో ఫేమస్ అయిన కుమారీ ఆంటీ వీడియోలకు యూట్యూబ్‌లో దుమ్ము రేపుతుంటాయి. మరోవైపు కుమారి ఆంటీ చేతి వంట రుచిచూసేందుకు కుమారి ఆంటీ ఫుడ్ స్టాల్ వద్దకు జనం క్యూ కడుతుంటారు. దీంతో అప్పట్లో ట్రాఫిక్ సమస్యలు కూడా వచ్చిన సంగతి తెలిసిందే. దీంతో పోలీసులు ఈ స్టాల్ తొలగించే ప్రయత్నం చేయగా.. స్వయంగా సీఎం రేవంత్ రెడ్డి కూడా జోక్యం చేసుకున్నారు. స్టాల్ అక్కడే ఉండేలా చర్యలు తీసుకున్నారు. దీంతో రెండు తెలుగు రాష్ట్రాల్లో ఫేమస్ అయ్యారు కుమారి ఆంటీ.