టీటీడీకి కొత్త పాలకమండలి!.. మంత్రి ఆనం రామనారాయణ రెడ్డి

తిరుపతి లడ్డూ వ్యవహారం ప్రస్తుతం దేశవ్యాప్తంగా చర్చనీయాంశమైన సంగతి తెలిసిందే. తిరుమల లడ్డూ తయారీకి వాడిన నెయ్యిలో కల్తీ జరిగిందన్న వార్తలపై ప్రపంచవ్యాప్తంగా ఉన్న హిందువులు ఆందోళన వ్యక్తం చేస్తున్నారు. ఈ నేపథ్యంలో తిరుమల తిరుపతి దేవస్థానం నూతన పాలకమండలి నియామకం చర్చకు వచ్చింది. ఏపీలో వైఎస్సార్ కాంగ్రెస్ పార్టీ ప్రభుత్వం పోయి.. టీడీపీ కూటమి ప్రభుత్వం అధికారంలోకి వచ్చింది. ఈ నేపథ్యంలో టీటీడీ ఛైర్మన్‌గా ఉన్న భూమన కరుణాకర్ రెడ్డి సైతం తన పదవికి రాజీనామా చేశారు. ఇక నూతన పాలకమండలిని నియమించాల్సి ఉంది. ఈ నేపథ్యంలో టీటీడీ పాలకమండలి నియామకం గురించి ఏపీ దేవాదాయశాఖ మంత్రి ఆనం రామనారాయణ రెడ్డి కీలక వ్యాఖ్యలు చేశారు. టీటీడీ బోర్డు నియామకం గురించి సీఎం చంద్రబాబు కసరత్తు చేస్తున్నారన్న మంత్రి.. త్వరలోనే టీటీడీ పాలకమండలిని నియమిస్తామని చెప్పారు,

తిరుమల తిరుపతి దేవస్థానంతో పాటుగా రాష్ట్రవ్యాప్తంగా ఉన్న 27 వేల దేవాలయాలకు పాలకమండళ్లను నియమిస్తామని ఏపీ దేవాదాయశాఖ మంత్రి ఆనం రామనారాయణ రెడ్డి తెలిపారు. తిరుమల లడ్డూ అపవిత్రం అంశం నేపథ్యంలో తిరుమల శ్రీవారి ఆలయం సహా రాష్ట్రంలో ఉన్న ఏడు ప్రధాన దేవాలయాల్లో సోమవారం శాంతి హోమాలు నిర్వహించినట్లు మంత్రి తెలిపారు. ఇక ఈ అంశం గురించి ప్రత్యేక దర్యాప్తు బృందం దర్యాప్తు జరుపుతుందని మంత్రి వెల్లడించారు. సిట్ నివేదిక వచ్చిన తర్వాత కారకులపై ప్రభుత్వం చర్యలు తీసుకుంటుందని మంత్రి స్పష్టం చేశారు. తిరుమల శ్రీవారి బ్రహ్మో్త్సవాలకు విస్తృత ఏర్పాట్లు చేస్తున్నామని.. ఘనంగా నిర్వహిస్తామని వెల్లడించారు. ఇక రాష్ట్రవ్యాప్తంగా ఉన్న దేవాలయాల్లో ప్రసాదాలకు వినియోగించే సరుకుల నాణ్యతను పరిశీలించాలని ఆదేశించినట్లు మంత్రి తెలిపారు.

మరోవైపు తిరుమల లడ్డూ వివాదంపై ప్రత్యేక దర్యాప్తు బృందాన్ని ఏర్పాటు చేయాలని ప్రభుత్వం నిర్ణయం తీసుకుంది. సిట్ ద్వారా ఈ అంశం మీద దర్యాప్తు చేయాలని చంద్రబాబు నిర్ణయం తీసుకున్నారు. ఈ రోజు సాయంత్రంలోగా సిట్ ఏర్పాటుపై జీవో విడుదల అయ్యే అవకాశం ఉంది. సిట్ ఏర్పాటుపై ఇప్పటికే సీఎం చంద్రబాబు నాయడు డీజీపీ సహా ఇతర పోలీస్ ఉన్నతాధికారులతో చర్చలు జరిపారు. సాయంత్రంలోగా దీనిపై స్పష్టమైన ప్రకటనతో జీవో విడుదల అయ్యే అవకాశాలు ఉన్నాయి.