నెలసరి సెలవులకు జీతం ఇవ్వాల్సిందే.. ఐక్యరాజ్యసమితిలో లేవనెత్తిన భారత మహిళ

మహిళల్లో నెలసరి అనేది.. ఒక సహజ ప్రక్రియ. ఇలాంటి నెలసరి సమయంలో మహిళలు ఉద్యోగాలకు హాజరుకాలేక సెలవులు తీసుకుంటూ ఉంటారు. అయితే వారు తీసుకున్న నెలసరి సెలవులకు జీతం కోత పడుతూ ఉంటుంది. దీంతో కొందరు ఎంత బాధనైనా భరిస్తూ ఉద్యోగాలకు వెళ్తూ ఉంటారు. అయితే ఎంతో మంది మహిళలు, మహిళా సంఘాలు, సామాజిక కార్యకర్తలు మహిళల నెలసరి సెలవులకు వేతనం చెల్లించాలని ఎప్పటినుంచో డిమాండ్లు చేస్తున్నారు. ఈ క్రమంలోనే తాజాగా అంతర్జాతీయ వేదిక అయిన ఐక్యరాజ్యసమితిలో జరిగిన సదస్సులో ఒడిశాకు చెందిన ఓ మహిళ.. మహిళలకు వేతనంతో కూడిన నెలసరి సెలవులు ఇవ్వాలనే వాదనను లేవనెత్తారు.

ఒడిశాకు చెందిన సామాజిక ఉద్యమకారిణి రంజితా ప్రియదర్శిని.. అమెరికాలోని న్యూయార్క్‌లో జరిగిన 79వ సర్వసభ్య ప్రతినిధి సభలో నిర్వహించిన సమ్మిట్ ఆఫ్ ది ఫ్యూచర్ కార్యక్రమంలో పాల్గొని ప్రసంగించారు. నెలసరి సమయంలో మహిళలకు వేతనంతో కూడిన సెలవు ఇవ్వాలని అన్నారు. అప్పుడే మహిళలు తమకు వచ్చే వేతనంలో కోత పడుతుందని ఆలోచించకుండా సెలవు తీసుకోగలుగుతారని వెల్లడించారు. నెలసరి విషయంలో మన సమాజంలో ఉన్న అపోహలను తొలగించేందుకు ఆమె కృషి చేస్తున్నారని వివరించారు.

ఈ సందర్భంగా మాట్లాడిన రంజితా ప్రియదర్శిని.. రెండోసారి ఐక్యరాజ్యసమితి సదస్సుకు హాజరైనందుకు తనకు గర్వంగా ఉందని పేర్కొన్నారు. మహిళలకు నెలసరి రోజుల్లో జీతంతో కూడిన సెలవు ఇవ్వాలన్నదే తన ప్రధాన లక్ష్యమని పేర్కొన్నారు. నెలసరి సమయంలో మహిళలకు ఒకట్రెండు రోజులు వేతనంతో కూడిన సెలవులు ఇవ్వాలని కోరారు. జీతం ఇవ్వకపోతే.. ఏ మహిళ కూడా నెలసరి సమయంలో సెలవు తీసుకోదని రంజితా ప్రియదర్శిని వెల్లడించారు. గతంలో కెన్యాలో జరిగిన ఐక్యరాజ్యసమితి సదస్సులో తొలిసారి పాల్గొని అప్పడే ఈ విషయాన్ని తాను ప్రస్తావించినట్లు గుర్తు చేశారు.

కెన్యా సదస్సు తర్వాత ఒడిశా ప్రభుత్వం మహిళలకు వేతనంతో కూడిన సెలవులు ఇవ్వాలని నిర్ణయం తీసుకుందని రంజిత తెలిపారు. ఈ ఏడాది ఆగస్టు 15వ తేదీ నుంచి పెయిడ్‌ పీరియడ్ లీవ్‌ ఇన్షియేటివ్‌ను ఒడిశా సర్కార్ అమలు చేసినట్లు వెల్లడించారు. అలాగే కర్ణాటక ప్రభుత్వం ఏడాదికి మహిళలకు ఆరు నెలసరి సెలవులు ప్రకటించినట్లు గుర్తు చేశారు. ఈ సందర్భంగా కర్ణాటక ప్రభుత్వం తీసుకున్న నిర్ణయం పట్ల హర్షం వ్యక్తం చేసిన రంజితా ప్రియదర్శిని.. వాటిని 12కు పెంచాలని విజ్ఞప్తి చేశారు.

తాను నెలసరి సెలవుల కోసం ఇంతలా పోరాటం చేయడం వెనుక.. తాను వ్యక్తిగతంగా ఎదుర్కొన్న అనుభవాలే కారణమని రంజితా ప్రియదర్శిని తెలిపారు. తనకు నెలసరి సమయంలో సెలవు కోరినందుకు.. తన మేనేజర్ అవమానించినట్లు గుర్తు చేసుకున్నారు. ఆ తర్వాత తాను ఆ ఉద్యోగానికి రాజీనామా చేశానని వెల్లడించారు.