6 ఏళ్ల బాలికను హత్య చేసిన ప్రిన్సిపల్.. అత్యాచారాన్ని ప్రతిఘటించినందుకు దారుణం

ఇటీవలి కాలంలో స్కూళ్లు, కాలేజీలలో విద్యార్థినులపై లైంగిక దాడులు జరుగుతున్న ఘటనలు తీవ్ర సంచలనంగా మారుతున్నాయి. మొన్నటికి మొన్న మహారాష్ట్ర బద్లాపూర్‌లో 6 ఏళ్ల బాలిక పట్ల సిబ్బంది అసభ్యకరంగా ప్రవర్తించిన ఘటన తీవ్ర దుమారం రేపగా.. తాజాగా అలాంటిదే మరో ఘటన చోటు చేసుకుంది. 6 ఏళ్ల బాలికను ఇంటి నుంచి కారులో స్కూలుకు తీసుకెళ్లే ఆ స్కూల్ ప్రిన్సిపల్.. ఆమెపై అత్యాచారానికి యత్నించాడు. అది అడ్డుకున్న బాలిక.. అరవడం ప్రారంభించింది. దీంతో భయపడిన ఆ ప్రిన్సిపల్ ఆమెను గొంతు నులిమి చంపేశాడు. తర్వాత ఏం తెలియనట్లు నటించగా.. రంగంలోకి దిగిన పోలీసులు అన్ని ఆధారాలు సేకరించి గట్టిగా ప్రశ్నించడంతో చేసిన తప్పు ఒప్పుకున్నాడు. ఈ దారుణ ఘటన గుజరాత్‌లో జరిగింది.

గుజరాత్‌లోని దాహోద్ జిల్లాలో జరిగిన ఈ ఘటన ప్రస్తుతం తీవ్ర దుమారం రేపుతోంది. 55 ఏళ్ల స్కూల్ ప్రిన్సిపల్ గోవింద్ నాథ్.. రోజూ అదే స్కూల్‌లో చదివే 6 ఏళ్ల 1వ తరగతి బాలికను కారులో స్కూలుకు తీసుకువెళ్లేవాడు. ఈ క్రమంలోనే ఇటీవల కూడా అలాగే తన బిడ్డను ఆమె తల్లి ప్రిన్సిపల్ కారులో ఎక్కించింది. అయితే మార్గ మధ్యలోకి వెళ్లిన తర్వాత ఆ బాలికపై అత్యాచారం చేసేందుకు గోవింద్ నాథ్ ప్రయత్నించాడు. అది గమనించిన బాలిక.. అత్యాచారాన్ని అడ్డుకుంది. ఈ క్రమంలోనే కారు దిగి పారిపోయేందుకు ప్రయత్నించగా.. ఆమెను గట్టిగా పట్టుకుని గొంతు నులిమేశాడు. ఊపిరి ఆడకుండా ఆ బాలిక చనిపోయింది.

అనంతరం స్కూలుకు వెళ్లిన ప్రిన్సిపల్ గోవింద్ నాథ్.. కారును లాక్ చేసి పార్క్ చేశాడు. సాయంత్రం 5 గంటలకు స్కూల్ నుంచి పిల్లలు, సిబ్బంది అంతా వెళ్లిపోయిన తర్వాత బాలిక మృతదేహాన్ని కారులో నుంచి తీసి.. స్కూల్ గ్రౌండ్‌లో పడేశాడు. ఆమె షూలు, పుస్తకాలు తరగతి గది సమీపంలో వేశాడు. అయితే ఎంతకీ తన కుమార్తె ఇంటికి రాకపోవడంతో ఆందోళన చెందిన ఆ బాలిక తల్లి స్కూల్‌కు వెళ్లి వెతికింది. అయితే తాను ఆ బాలికను స్కూల్‌లో వదిలేసి వేరే పని మీద వెళ్లినట్లు మొదట ప్రిన్సిపల్ బుకాయించాడు. దీంతో పోలీసులకు ఫిర్యాదు చేయగా.. వారు రంగంలోకి దిగి విచారణ జరిపారు.

స్కూల్ గ్రౌండ్‌లో బాలిక మృతదేహాన్ని గుర్తించి పోస్ట్ మార్టంకు పంపించగా.. ఊపిరి ఆడకుండా చేసి ఎవరో చంపినట్లు తేలింది. దీంతో ప్రిన్సిపల్‌పై అనుమానం వచ్చి పోలీసులు అతని ఫోన్‌ను ట్రాక్ చేయగా.. ఆ రోజు స్కూల్‌లోనే ఉన్నట్లు గుర్తించారు. ఈ క్రమంలోనే ప్రిన్సిపల్‌ను తమదైన స్టైల్‌లో పోలీసులు విచారణ జరిపగా చివరికి చేసిన నేరాన్ని ఒప్పుకున్నట్లు సీనియర్ పోలీస్ ఆఫీసర్ రాజ్‌దీప్ సింగ్ ఝాలా వెల్లడించారు. దీంతో భారతీయ న్యాయ సంహితతోపాటు, పోక్సో చట్టం కింద కేసులు నమోదు చేశారు.

ఈ ఘటనపై గుజరాత్ విద్యాశాఖ మంత్రి కుబేర్ దిండోర్ స్పందించారు. ఇలాంటి ఘటనలు సమాజానికే అవమానకరమని పేర్కొన్నారు. ఈ ఘటన గురించి విని చాలా బాధపడ్డానని.. 3 రోజుల పాటు విచారణ జరిపి స్కూల్ ప్రిన్సిపల్‌ను పోలీసులు అరెస్ట్ చేసినట్లు చెప్పారు. ఇలాంటి దారుణమైన ఘటనను తాను తీవ్రంగా ఖండిస్తున్నానని.. ఇలాంటివి మళ్లీ జరగకుండా కఠిన చర్యలు తీసుకుంటున్నట్లు దిండోర్ వివరించారు.