20 సెంట్ల స్థలంలోనే ఇంత లాభామా? అమెరికా ప్రతినిధులను ఔరా అనిపించిన పల్నాడు మహిళలు

ఏపీ మహిళలు అమెరికా ప్రతినిధులనే అబ్బురపరిచారు. ఆంధ్రప్రదేశ్‌లోని పల్నాడు జిల్లా మహిళల ప్రతిభ చూసి అమెరికా ప్రతినిధులే ఫిదా అయ్యారు. ప్రకృతి సేద్యంలో పల్నాడు స్వయం సహాయక సంఘాల పనితీరును పరిశీలించిన అమెరికా బృందం.. ఆశ్చర్యపోయింది. అమెరికాలోని ప్రొడ్సూసర్స్ ట్రస్ట్, పెగాసస్ కేపిటల్ అడ్వైజర్‌కు చెందిన ప్రతినిధులు ఆదివారం పల్నాడు జిల్లాలో పర్యటించారు. పల్నాడు జిల్లాలో అనుసరిస్తున్న ప్రకృతి వ్యవసాయం పద్ధతులను పరిశీలించారు. అక్కడి స్వయం సహాయక సంఘాల మహిళలు అనుసరిస్తున్న ప్రకృతి వ్యవసాయం పద్ధతులు, వాటి వెనుక ఉన్న శాస్త్రీయ కోణం తెలుసుకుని అమెరికా బృందం ఆశ్చర్యపోయింది.

మరోవైపు ప్రకృతి వ్యవసాయంలో రైతులు అనుసరిస్తున్న పద్ధతులు, దీని నుంచి వస్తున్న లాభాలు, ఆరోగ్య ప్రయోజనాలు తెలుసుకుని అమెరికా బృందం సంతృప్తి వ్యక్తం చేసింది. 20 సెంట్ల స్థలంలో నెలకు రూ.5 వేల నుంచి రూ.10 వేల వరకూ సంపాదిస్తున్న వైనం తెలుసుకుని ఆశ్యర్యానికి లోనైంది. ఇంత తక్కువ స్థలంలోనే జీవ వైవిద్యానికి ప్రాధాన్యం ఇస్తూ, సహజ పద్ధతుల్లో సాగు వారిని ఆకట్టుకుంది. ఈ సందర్భంగా జిల్లా ప్రాజెక్టు అధికారులు అమెరికా బృందానికి నేచురల్ ఫార్మింగ్ విధానాల గురించి సమగ్రంగా వివరించారు. సేంద్రీయ సాగులో ఉపయోగించే బీజామృతం, ద్రవ జీవామృతం, నీమాస్త్రం వంటివాటిని పరిశీలించారు, రైతులకు, పర్యావరణానికి, నేల ఆరోగ్యానికి అవి కలిగించే ప్రయోజనాలు తెలుసుకున్నారు.

ఇక అమెరికా ప్రతినిధులకు అరటి, కొబ్బరి, బొప్పాయి, జామ, బంతిపూలు, ఆకు కూరలు, కూరగాయలు, దుంపలతో పాటుగా అంతర పంటల ద్వారా తాము ఎలా ఆదాయాన్ని పొంద గలుగుతున్నామనేదీ రైతులు వారికి వివరించారు. నాగిరెడ్డిపాలెం గ్రామంలో పర్యటించిన బృందం నేచురల్ ఫార్మింగ్ ప్రొడక్ట్స్ సెంటర్ సందర్శించింది. అక్కడ ఉన్న స్వయం సహాయక సంఘాల మహిళలతో ముచ్చటించింది. అలాగే వివిధ రకాల అంతర పంటల సాగు, క్లస్టర్ బీన్స్, పెర్ల్ మిల్లెట్, బెండ, మునగ, పచ్చిమిర్చి సాగులను పరిశీలించారు,

మరోవైపు ఏపీలో అనుసరిస్తున్న ప్రకృతి వ్యవసాయానికి అంతర్జాతీయ గుర్తింపు కూడా లభించిన సంగతి తెలిసిందే. ఇటీవలే ప్రతిష్ఠాత్మక గుల్బెంకియన్‌ అవార్డు ఏపీ సమాఖ్య ప్రకృతి వ్యవసాయానికి వరించింది. పోర్చుగల్‌లోని లిస్బన్‌లో జరిగిన కార్యక్రమంలో ఏపీ రైతు సాధికార సంస్థ ఎగ్జిక్యూటివ్‌ వైస్‌ ఛైర్మన్‌ టి.విజయ్‌కుమార్‌, మహిళా రైతు నాగేంద్రమ్మ నెట్టం ఈ పురస్కారాన్ని అందుకున్నారు. 117 దేశాల నుంచి వచ్చిన 181 నామినేషన్లతో పోటీపడి ఏపీసీఎన్‌ఎఫ్‌ ఈ గుల్బెంకియన్‌ అవార్డు దక్కించుకుంది.