తెలుగు రాష్ట్రాలకు కేంద్రం దసరా కానుక.. ఏకంగా రూ.10,955 కోట్లు విడుదల

రాష్ట్రాలకు కేంద్రం దసరా కానుక ప్రకటించింది. పన్నుల్లో రాష్ట్రాలకు రావాల్సిన వాటాను గురువారం ప్రకటించింది. రాష్ట్రాలకు పన్నుల వాటా కింద మొత్తం రూ.1,78,173 కోట్లను కేంద్ర ఆర్థిక మంత్రిత్వ శాఖ విడుదల చేసింది. గతంలో ముందస్తు చెల్లింపు రూ.89,086.50 కోట్లతో కలిపి రూ.1,78,173 కోట్లు విడుదల చేసినట్టు తెలిపింది. కేంద్రం విడుదల చేసిన నిధుల్లో తెలంగాణకు రూ.3,745 కోట్లు, ఆంధ్రప్రదేశ్‌కు రూ.7,211 కోట్లు ఉన్నాయి. కేంద్రం విడుదల చేసిన వాటాల్లో అత్యధికంగా ఉత్తర్ ప్రదేశ్‌కు రూ.31,962 కోట్లు, తర్వాతి స్థానాల్లో బిహార్ రూ.17,921 కోట్లు, మధ్యప్రదేశ్‌ రూ.13,987 కోట్లు, మహారాష్ట్ర రూ.11,255 కోట్లు, పశ్చిమ్ బెంగాల్ రూ.13,404, ఒడిశాకు రూ.8,068 కోట్లు కేటాయించింది.

‘రాబోయే పండగ సీజన్‌ను దృష్టిలో ఉంచుకుని, రాష్ట్రాల మూలధన వ్యయాన్ని వేగవంతం చేయడానికి, వారి అభివృద్ధి/ సంక్షేమ సంబంధిత వ్యయాలకు ఆర్థిక సహాయం కోసం విడుదలు చేస్తున్నాం’ అని ఆర్దిక శాఖ పేర్కొంది. రాష్ట్రాలకు పన్నుల వాటా కింద 2024-25 ఆర్థిక సంవత్సరంలో మొత్తం రూ.23,48,980 కోట్లను విడుదల చేయనుంది. గత ఆర్ధిక సంవత్సరంతో పోల్చితే 11.9 శాతం వాటా పెంచింది.

2023-24 ఆర్థిక సంవత్సరం కంటే 10.4 శాతం వృద్ధితో 2024-25లో కేంద్రం పన్ను రాబడి నుంచి రాష్ట్రాలకు 12,47,211 కోట్ల రూపాయల కేటాయింపు ఉంటుందని అంచనా. 2023-24 ఆర్ధిక సంవత్సరంలో కేటాయించిన నిధులు రూ. 10,21,448 కోట్ల (10.6 శాతం పెరుగుదల) కంటే రూ. 1,08,046 కోట్లు ఎక్కువగా ఉంటుందని భావిస్తున్నారు. ఈ ఏడాది జూన్‌లో పన్నుల వాటా కింద రూ.1,39,750 కోట్లును కేంద్రం విడుదల చేసింది. అంతకు ముందు ఫిబ్రవరిలో రూ.1.42 లక్షల కోట్లు, అంతకు ముందు అడ్వాన్సుగా రూ.72,961 కోట్లు అందజేసింది. అయితే, పన్నుల వాటాల విడుదలలోనూ వివక్ష చూపిస్తున్నారని, బీజేపీ పాలిత రాష్ట్రాలకే అధికంగా ఇస్తున్నారనే విమర్శలు కూడా ఉన్నాయి. యూపీ, బిహార్, మధ్యప్రదేశ్ వంటి రాష్ట్రాలకే ప్రాధాన్యత ఇస్తోందని, దక్షిణాది నుంచి పన్ను ఆదాయం ఎక్కువగా ఉన్నా నిధులు మాత్రం తక్కవగా ఇస్తోందని కర్ణాటక, తమిళనాడు వంటి రాష్ట్రాలు ఆరోపిస్తున్నాయి.