రిజర్వడ్ కోచ్‌లో ప్రయాణికుడి బ్యాగు చోరీ.. రైల్వేకు రూ.4.7 లక్షలు జరిమానా

రైల్లో ప్రయాణికుల సామాన్లకు భద్రత కల్పించాలని, వారు వస్తువులు చోరీకి గురైతే అందుకు పూర్తి బాధ్యత రైల్వేదనని జాతీయ వినియోగదారుల వివాదాల పరిష్కార కమిషన్ స్పష్టం చేసింది. 2017లో చోరీకి గురయిన ఓ వ్యక్తి బ్యాగుకు రైల్వేశాఖ బాధ్యత వహిస్తుందని పేర్కొంటూ.. బాధితుడికి రూ.4.7లక్షలు పరిహారం చెల్లించాలని ఆదేశించింది. ప్రయాణికుడి తన లగేజీని భద్రపరచడానికి సహేతుకమైన జాగ్రత్తలు తీసుకున్నప్పటికీ, రిజర్వ్ చేసిన కోచ్‌లోకి అనధికారిక ప్రయాణికులు ప్రవేశించకుండా నిరోధించడంలో టిక్కెట్ కలెక్టర్ విఫలమయ్యారని గుర్తించామని కమిషన్ పేర్కొంది.

వివరాల్లోకి వెళ్తే.. 2017 మే 9న అమర్‌కంటక్ ఎక్స్‌ప్రెస్‌లో దిలీప్ కుమార్ చతుర్వేది అనే వ్యక్తి తన కుటుంబంతో కలిసి ప్రయాణించారు. కట్నీ నుంచి దుర్గ్‌కు స్లీపర్ క్లాస్ టిక్కెట్ బుక్ చేసుకుని వారంతా రైలెక్కారు. దాదాపు తెల్లవారుజామున 2.30 గంటల సమయంలో వారి లగేజీ చోరీకి గురయ్యింది. రూ.9.3 లక్షలు విలువైన వస్తువులు, నగదుతో ఉన్న బ్యాగుతో దొంగలు పరారయ్యారు. దీనిపై జిల్లా వినియోగదారుల కమిషన్‌లో ఫిర్యాదు చేసిన చతుర్వేది.. ఈ చోరీకి టీటీఈ నిర్లక్ష్యమే కారణమని ఆరోపించారు. అనధికారిక వ్యక్తులను రిజర్వ్ కోచ్‌లోకి అనుమతించడం వల్లే తన బ్యాగు చోరీకి గురైందని పేర్కొన్నారు.

ఈ ఫిర్యాదపుపై విచారణ చేపట్టిన వినియోగదారుల కమిషన్.. ప్రయాణికుడికి జరిగిన నష్టానికి అధికారులే బాధ్యత వహించి, ఆ మొత్తాన్ని చెల్లించాలని రైల్వే శాఖను ఆదేశించింది. దీనిని రాష్ట్ర వినియోగదారుల కమిషన్‌లో రైల్వే సవాల్ చేయగా.. అక్కడ వారికి చుక్కెదురయ్యింది. దీంతో ఎన్సీడీఆర్సీని ఆశ్రయించారు. రైల్వే చట్టంలోని సెక్షన్ 100 ప్రకారం ప్రయాణికులు లగేజీకి తమది బాధ్యత కాదని వాదించింది. అయితే, ఈ వాదనలను తోసిపుచ్చిన జాతీయ వినియోగదారుల కమిషన్ న్యాయమూర్తి జస్టిస్ సుదీప్ అహ్లువాలియా.. రైల్వేశాఖ బాధ్యత వహిస్తుందని తీర్పునిచ్చారు.

రిజర్వ్ చేసుకున్న కోచ్‌లలో ప్రయాణికులు, వారి వస్తువులకు రైల్వేశాఖ బాధ్యత వహించాలని జస్టిస్ అహ్లువాలియా స్పష్టం చేశారు. అదేవిధంగా ఈ చోరీకి రైల్వే అధికారులు ముఖ్యంగా టీటీఈ నిర్లక్ష్యం స్పష్టంగా కనిపిస్తోందని వ్యాఖ్యానించారు. అనంతరం బాధితుడికి పరిహారంగా రూ.4.7 లక్షలు చెల్లించాల్సిందేనని తీర్పునిచ్చారు. అంతేకాదు, మాససిక క్షోభకు గురిచేసినందకు బాధితుడికి అదనంగా మరో రూ.20 వేలు చెల్లించాలని ఆదేశించారు.