పాలాహర్డ్‌తో ప్రేమాయణంపై తొలిసారి నోరు విప్పిన బిల్ గేట్స్

అపర కుబేరుడు, మైక్రోసాఫ్ట్ సహ వ్యవస్థాపకుడు బిల్ గేట్స్ గురించి దేశవ్యాప్తంగా ఉన్న ప్రజలకు ప్రత్యేకంగా చెప్పాల్సిన అవసరం లేదు. 69 ఏళ్ల వయసులోనూ యువకులతో పోటీ పడుతూ మరీ అద్భుతమైన ఆలోచనలు చేస్తుంటారు. కొన్నేళ్ల క్రితమే భార్యకు విడాకులు ఇచ్చిన ఈయన ఓ మహిళతో ప్రేమలో కూడా పడ్డారు. గత కొంతకాలంగా ఇందుకు సంబంధించి అనేక వార్తలు వస్తున్నా ఆయన స్పందించలేదు. కానీ తొలిసారి ఆయన తన ప్రేయసి గురించి వెల్లడించారు. తాను నిజంగానే పాలా హర్డ్‌ను ప్రేమిస్తున్నానని.. తనే నా సీరియస్ గర్ల్‌ఫ్రెండ్ అంటూ చెప్పుకొచ్చారు. ఆ పూర్తి వివరాలు మీకోసం.

1955వ సంవత్సరంలో జన్మించిన బిల్ గేట్స్.. 1994లో మెలిందా ఫ్రెంచ్ గేట్స్‌ను పెళ్లి చేసుకున్నారు. అయితే చాలా ఏళ్ల పాటు హాయిగా కలిసి జీవించిన వీళ్లకు ముగ్గురు పిల్లలు కూడా పుట్టారు. అయితే 27 ఏళ్ల పాటు అన్యోన్యంగా సాగిన వీరి దాంపత్య జీవితానికి స్వస్తి పలుకుతూ 2021లో విడాకులు తీసుకున్నారు. అప్పటి నుంచి బిల్ గేట్స్ ఒంటరిగానే జీవిస్తున్నారు. అయితే కానీ ఆయన పాలా హర్డ్‌తో ప్రేమలో ఉన్నట్లు చాలా రోజులుగా వార్తలు వస్తున్నాయి. వీరిద్దరూ కలిసి డేటింగ్ కూడా చేస్తున్నారంటూ పెద్ద ఎత్తున పుకార్లు వచ్చాయి.

ఒరాకిల్ సీఈరో మార్క్ హర్డ్ భార్య అయిన పాలా హర్డ్ వయసు ఇప్పుడు 60 సంవత్సరాలు. అయితే 2019లోనే ఈమె భర్త చనిపోగా.. అప్పటి నుంచి ఇద్దరు కుమార్తెలను చూసుకుంటూనే జీవిస్తున్నారు. అయితే ఈమెతోనే బిల్ గేట్స్ ప్రేమలో పడ్డట్లు సమాచారం. ముఖ్యంగా వీరిద్దరూ కలిసి 2023 జనవరి నెలలో ఆస్ట్రేలియా ఓపెన్ టెన్నిస్ టోర్నీ సందర్భంగా కలిసి వెళ్లి మరీ మ్యాచ్ చూశారు. ఇద్దరూ పక్క పక్కనే కూర్చుని ప్రేమగా చూసుకోవడం గమనించిన కొందరు వీరిద్దరూ రిలేషన్‌లో ఉన్నారంటూ వార్తలు రాసుకొచ్చారు. అయితే ఇంత కాలం దీనిపై ఏ ఒక్కరూ స్పందించలేదు. కనీసం ఆ వార్తలను కూడా ఖండించలేదు.

కానీ తాజాగా ఈ వార్తలపై బిల్ గేట్స్ తొలిసారిగా స్పందించారు. పాలా హర్డ్ తన సీరియస్ గర్ల్‌ఫ్రెండ్ అని చెప్పుకొచ్చారు. పాలా తనకు పరిచయం అవ్వడం తన అదృష్టం అని వివరించారు. తామిద్దరూ కలిసే ఉంటున్నట్లు వెల్లడించిన ఆయన.. కలిసే పని చేసుకుంటామని, హాయిగా మ్యాచ్‌లు చూస్తామని పేర్కొన్నారు. ఆమెలాంటి మంచి వ్యక్తిని ఇప్పటి వరకు తాను చూడ లేదని పాలా హర్డ్‌పై తనకున్న ప్రేమను వెల్లడించారు బిల్ గేట్స్.