ఫుల్లుగా తాగి పోలీసులకు ఫోన్ చేసిన మందుబాబు.. ఇంట్లో చోరీ అని ఫిర్యాదు, ఇంతకీ ఏం పోయాయంటే?

మా ఇంట్లో కుక్క దూరింది.. వచ్చి తగిలేయండి అంటూ ఆ మధ్య వరంగల్‌లో ఓ వ్యక్తి 100కి ఫోన్ చేసిన విషయం గుర్తుందా. పదేపదే 100కి డయల్ చేసి విసిగించడంతో ఓ కానిస్టేబుల్ ఆ ఇంటికి వెళ్లి కాస్త ఆగ్రహం వ్యక్తం చేశారు. అయితే, తాజాగా ఓ వ్యక్తి తన ఇంట్లో ఆలుగడ్డలు.. అదే బంగాళా దుంపలు పోయాయంటూ పోలీసులకు డయల్ చేశాడు. తీరా పోలీసులు ఘటనా స్థలానికి వెళ్తే వాళ్లకు దిమ్మతిరిగిపోయింది.

ఉత్తర్ ప్రదేశ్‌లోని హర్దోయి జిల్లా మన్నపుర్వ గ్రామానికి విజయ్ వర్మ అనే వ్యక్తి దీపావళి రోజున రాత్రి యూపీ ఎమర్జెన్సీ హెల్ప్‌లైన్ 112కి ఫోన్ చేశాడు. తన ఇంట్లో దొంగతనం జరిగిందని.. దొంగను వెంటనే పట్టుకోవాలని ఫిర్యాదు చేశాడు. దీపావళి కాబట్టి అప్పటికే అలెర్ట్‌గా ఉన్న పోలీసులు.. విజయ్ వర్మ చెప్పిన అడ్రస్‌కు వెళ్లారు. ఏమైందని వర్మను అడగగా.. తన ఇంట్లో ఆలుగడ్డలు ఎవరో కొట్టేశారని చెప్పాడు. ఎన్ని ఆలుగడ్డలు అని అడిగితే ఓ 250 గ్రాములు ఉండొచ్చని చెప్పాడు.

అసలే వంట కోసం ఆలుగడ్డలను ఉడుకబెట్టానని.. తర్వాత పొట్టు తీసి అక్కడ పెట్టినట్లు చెప్పాడు. అనంతరం బయటికి వెళ్లి మందు తాగి వచ్చేసరికి ఆ ఉడకబెట్టిన ఆలుగడ్డలను ఎత్తుకెళ్లారని పోలీసులతో వాపోయాడు. అంతేకాకుండా వెంటనే ఆ దొంగను పట్టుకుని తన ఆలుగడ్డలు తనకు ఇప్పించాలని పోలీసులను కోరాడు. దీనికి సంబంధించిన వీడియో ప్రస్తుతం సోషల్‌ మీడియాలో తెగ వైరల్‌ అవుతోంది.

అతడు మద్యం సేవించిన మైకంలో ఉన్నాడని గుర్తించిన పోలీసులు.. తాగావా అని అడిగితే.. రోజంతా కష్టపడతాను, సాయంత్రం ఒక చిన్న పెగ్ వేస్తా. అయినా, ఇక్కడ సమస్య నేను తాగిన మందుతో కాదు.. పోయిన బంగాళదుంపలతో అని సమాధానం ఇచ్చాడు. పోలీసులకు నవ్వాలో ఏడ్వాలో తెలియక.. విజయ్ వర్మను ప్రశ్నిస్తూ ఓ చిన్న వీడియో తీశారు. ఆ వీడియో ప్రస్తుతం సోషల్ మీడియాలో వైరల్‌గా మారింది. ఎలాగైనా ఆలుగడ్డల దొంగను పట్టుకోవాలని విజయ్ వర్మ కోరుతున్నాడు.