ఇచ్చిన అప్పు తీర్చమని అడిగితే.. మాచర్ల ఎమ్మెల్యే బావమరిదిపై మూక దాడి

అప్పుగా ఇచ్చిన డబ్బులు తిరిగి చెల్లించాలని అడిగితే.. ఎమ్మెల్యే బావమరిదిపై అప్పుతీసుకున్న వ్యక్తులు దాడికి పాల్పడ్డారు. అంతేకాకుండా అతడి బైక్, కారును ధ్వంసం చేశారు. ఈ ఘటన గుంటూరు జిల్లా మాచర్లలో చోటు చేసుకుంది. పోలీసులు తెలిపిన వివకాల ప్రకారం.. ఉమ్మడి గుంటూరు జిల్లా మాచర్ల ఎమ్మెల్యే జూలకంటి బ్రహ్మానందరెడ్డి బావమరిది కృష్ణారెడ్డి.. తన స్నేహితులు వీహెచ్‌పీ నేత అనిల్‌ సహా స్నేహితులకు కొంత మొత్తం అప్పుగా ఇచ్చారు. అయితే, తనకు డబ్బులు అవసరం పడిందని, తాను ఇచ్చిన అప్పును తిరిగి చెల్లించాలని వారిని కృష్ణారెడ్డి కోరాడు. ఈ విషయంలో స్నేహితుల మధ్య వాగ్వాదం జరిగింది.

దీంతో ఆగ్రహం వ్యక్తంచేసిన అతడి స్నేహితులు.. కృష్ణారెడ్డిపై దాడి చేశారు. అనిల్‌, అతడి స్నేహితులు కలిసి ఎమ్మెల్యే బావమరిదిపై చేయిచేసుకున్నారు. దీనిపై గుంటూరు నగరంలోని పట్టాభిపురం పోలీస్ స్టేషన్‌లో కృష్ణారెడ్డి ఫిర్యాదు చేయడంతో పోలీసులు కేసు నమోదు చేసి దర్యాప్తు చేపట్టారు. నిందితులను అరెస్ట్ చేసిన పోలీసులు వారిని ప్రశ్నిస్తున్నారు. దాడి సమయంలో వారంతా మద్యం సేవించి ఉన్నారని పోలీసులు తెలిపారు. ఎమ్మెల్యే బావ మరిది కృష్ణారెడ్డితోపాటు అతడి స్నేహితుడు మాధవరావుపై దాడి చేశారని చెప్పారు.

ఇటీవల జరిగిన అసెంబ్లీ ఎన్నికల్లో మాచర్ల నియోజకవర్గం నుంచి టీడీపీ అభ్యర్థి జూలకంటి బ్రహ్మారెడ్డి... వైఎస్ఆర్సీపీ ఎమ్మెల్యే పిన్నెల్లి రామకృష్ణారెడ్డిపై విజయం సాధించిన విషయం తెలిసిందే. ఎన్నికల పోలింగ్ సమయంలో ఈవీఎంను ధ్వంసం చేసిన ఘటనలో పిన్నెల్లిపై కేసు నమోదు అయింది. ఈ కేసులో అరెస్టై జైలుకు వెళ్లిన ఆయనకు ఇటీవల హైకోర్టు బెయిల్ మంజూరు చేసింది. హైకోర్టు ఆదేశాల మేరకు పిన్నెల్లి రామకృష్ణారెడ్డి విడుదలైన సంగతి తెలిసిందే.

ఇక, జూలకంటి బ్రహ్మారెడ్డి తల్లిదండ్రులు సైతం ఎమ్మెల్యేలుగా పని చేశారు. బ్రహ్మారెడ్డి తండ్రి జూలకంటి నాగిరెడ్డి 1972 అసెంబ్లీ ఎన్నికల్లో స్వతంత్ర అభ్యర్థిగా విజయం సాధించారు. టీడీపీ ఆవిర్బావం తర్వాత 1983లో ఆయను ఆ పార్టీలో చేరారు. అనంతరం గురజాల ఎమ్మెల్యేగా టీడీపీ నుంచి గెలుపొందారు. బ్రహ్మారెడ్డి తల్లి జూలకంటి దుర్గమాంబ 1999 ఎన్నికల్లో మాచర్ల ఎమ్మెల్యేగా పోటీచేసి విజయాన్ని అందుకున్నారు.