మారిపోనున్న అమరావతి రూపురేఖలు.. రూ.15000 కోట్లతో ఏం చేస్తామో చెప్పిన ప్రభుత్వం

ఏపీ రాజధాని అమరావతి నిర్మాణంలో కీలక ముందడుగు పడింది. రాజధాని నిర్మాణం కోసం ప్రపంచ బ్యాంకు, ఏడీబీ ఇచ్చే రూ.15000 కోట్లు నిధుల వినియోగంపై ప్రతిపాదనలకు ఆమోదం లభించింది. ఏపీ రాజధాని నిర్మాణానికి సహకరిస్తామన్న కేంద్ర ప్రభుత్వం.. బడ్జెట్ సందర్భంగా అమరావతికి 15000 కోట్లు సాయం చేస్తామని ప్రకటించిన సంగతి తెలిసిందే. అయితే ఈ మొత్తాన్ని ప్రపంచ బ్యాంక్, ఆసియా అభివృద్ధి బ్యాంకుల సహకారంతో ఏపీకి అందించనుంది. ఈ నేపథ్యంలో ఈ రూ.15000 కోట్లు ఎలా వినియోగిస్తామనే దానిపై ప్రభుత్వం ఉత్తర్వులు జారీ చేసింది. ఈ మేరకు ఏపీ పురపాలక శాఖ ప్రత్యేక ప్రధాన కార్యదర్శి జి.అనంత రాము ఉత్తర్వులు జారీ చేశారు.

ప్రపంచ బ్యాంకు, ఏడీబీ సంయుక్తంగా 15 వేల కోట్లు రుణ సహకారం అందిస్తాయన్న ప్రభుత్వం.. ఈ నిధులను ఉపయోగించి అమరావతిలో మౌలిక వసతులు కల్పిస్తామని.. హరిత నిర్మాణాలు, ఉపాధి అవకాశాలు మెరుగ్గా ఉండేలా చర్యలు తీసుకుంటామని తెలిపింది. అమరావతికి వరద ముప్పు రాకుండా ఉండేలా కాలువలు, రిజర్వాయర్ల నిర్మాణం చేపట్టాలని.. రోడ్లు, డక్ట్‌లు, డ్రైన్ల నిర్మాణాలు చేపట్టాలని సీఆర్‌డీఏను ఆదేశిస్తూ ఏపీ ప్రభుత్వం ఉత్తర్వులు జారీ చేసింది. అలాగే సురక్షిత తాగునీరు అందుబాటులో ఉండేలా ప్రాజెక్టులు చేపట్టాలని ఉత్తర్వుల్లో పేర్కొంది. అమరావతి అభివృద్ధికి సీఆర్‌డీఏ పంపిన ప్రతిపాదనలను కేంద్ర ఆర్థిక వ్యవహారాల శాఖ ఇప్పటికే ఆమోదించినట్లు ప్రభుత్వం తెలిపింది.

మరోవైపు అమరావతి అభివృద్ధి కోసం ప్రపంచ బ్యాంకు, ఏడీబీల నుంచి ఆర్థిక సాయం పొందేందుకు సీఆర్‌డీఏ కమిషనర్‌కు అధికారం ఇస్తూ ప్రభుత్వం ఉత్తర్వులు ఇచ్చింది. అలాగే విడతల వారీగా ఈ బ్యాంకుల నుంచి నిధులు పొందేందుకు ప్రత్యేక ఖాతా ఏర్పాటు చేయాలని ఏపీ ప్రభుత్వం నిర్ణయించింది. అమరావతి నిర్మాణం కోసం బడ్జెట్‌లో కేటాయింపులతో పాటుగా ప్రత్యేక కార్యాచరణ చేపట్టనున్నారు. ఇక ప్రభుత్వ ఆదేశాల ప్రకారం సోమ, మంగళవారాల్లో ప్రపంచ బ్యాంకు, ఆసియా అభివృద్ధి బ్యాంకుల నుంచి రుణ సహకారంపై సీఆర్‌డీఏ కమిషనర్ ఒప్పందం చేసుకోనున్నారు. ఇక ఇప్పటికే అమరావతి రాజధాని మాస్టర్ ప్లాన్‌ను సిద్ధం చేసిన ఏపీ ప్రభుత్వం.. 12 జోన్లలో అమరావతిని అభివృద్ధి చేయాలని భావిస్తోంది.