ఏపీలో రిలయన్స్ రూ.65 వేల కోట్ల పెట్టుబడి.. 2.5 లక్షల కొత్త ఉద్యోగాలు

ఆంధ్రప్రదేశ్‌ ప్రభుత్వం పెట్టబడులపై ఫోకస్ పెట్టింది.. దేశవ్యాప్తంగా పలు ప్రముఖ కంపెనీలతో చర్చలు జరుపుతోంది. ముఖ్యమంత్రి చంద్రబాబుతో పలువురు పారిశ్రామివేత్తలు భేటీ కాగా.. ఇప్పటికే పలు కంపెనీలు పెట్టుబడులు పెట్టేందుకు ముందుకు వచ్చాయి.. మరికొన్ని కంపెనీలు, వ్యాపారవేత్తలు ఏపీకి వచ్చేందుకు ఆసక్తి కనబరుస్తున్నారు. అయితే తాజాగా రిలయన్స్ ఇండస్ట్రీస్ లిమిటెడ్ (RIL) భారీ పెట్టుబడులకు ముందుకొచ్చింది. వచ్చే ఐదేళ్లలో.. రాష్ట్రంలో ఏకంగా రూ.65వేల కోట్లతో.. 500 కంప్రెస్డ్ బయో గ్యాస్ ప్లాంట్స్ (CBG) ఏర్పాటు చేసేందుకు సిద్ధమైంది. క్లీన్ ఎనర్జీ కింద గుజరాత్ కాకుండా వేరే రాష్ట్రానికి వస్తున్న అతి పెద్ద పెట్టుబడి ఇదే.

రిలయన్స్ ఇండస్ట్రీస్ లిమిటెడ్ ఏర్పాటు చేయబోయే ఒక్కో ప్లాంట్‌కు రూ.130 కోట్ల పెట్టుబడితో.. అది కూడా రాష్ట్రంలోని బంజరు భూముల్లో ఏర్పాటు చేయనున్నారు. ఈ ప్లాంట్లు ఏర్పాటైతే రాష్ట్రంలో ప్రత్యక్షంగా, పరోక్షంగా 2లక్షల 50వేలమందికి ఉద్యోగ, ఉపాధి అవకాశాలు దొరుకుతాయని ప్రభుత్వం అంచనా వేస్తోంది. రిలయన్స్ ఇండస్ట్రీస్ లిమిటెడ్ క్లీన్ ఎనర్జీ ఇనిషియేటివ్‌కు నేతృత్వం వహిస్తున్న అనంత్ అంబానీ.. ఏపీలో ఉద్యోగ కల్పనపై ఏపీ కేబినెట్ సబ్ కమిటీకి నాయకత్వం వహిస్తున్న మంత్రి నారా లోకేష్ ముంబైలో సమావేశమై ఈ పెట్టుబడులకు సంబంధించిన ప్రణాళికల్ని ఖరారు చేశారు. ఆంధ్రప్రదేశ్ ముఖ్యమంత్రి నారా చంద్రబాబు నాయుడు సమక్షంలో.. ఆంధ్రప్రదేశ్ పరిశ్రమలశాఖ, రిలయన్స్ మధ్య ఈ పెట్టుబడులకు సంబంధించి ఇవాళ విజయవాడలో ఎంవోయూ జరగనుంది.

ఆంధ్రప్రదేశ్ ప్రభుత్వం ఇటీవల ఇంటిగ్రేటెడ్ క్లీన్ ఎనర్జీ పాలసీ కింద జీవ ఇంధన ప్రాజెక్టులకు ప్రోత్సాహకాలను తీసుకొచ్చింది. రిలయన్స్ ఏర్పాటు చేయబోయే కంప్రెస్డ్ బయో గ్యాస్ ప్లాంట్స్‌కు ఐదేళ్ల పాటూ స్థిర మూలధన పెట్టుబడిపై 20% రాయితీ.. అలాగే స్టేట్ జీఎస్టీ పూర్తి రీయింబర్స్‌మెంట్. ఐదేళ్లపాటు ఎలక్ట్రిసిటీ డ్యూటీ (విద్యుత్ సుంకం) ఇవ్వనున్నారు. ఈ పెట్టుబడులు రాష్ట్రానికి వస్తున్నట్లు మంత్రి లోకేష్ కన్ఫం చేయగా.. రిలయన్స్ సంస్థ మాత్రం అధికారికంగా ఎలాంటి ప్రకటన చేయలేదు.

రాష్ట్రంలో యువతకు ఉద్యోగాలు కల్పించడం తమ ప్రభుత్వ ప్రధాన లక్ష్యమన్నారు మంత్రి నారా లోకేష్. అంతేకాదు రాష్ట్రానికి మరిన్ని పెట్టుబడుల్ని ఆకర్షించడానికి, ఉద్యోగాలను సృష్టించడానికి ప్రభుత్వం ఇంటిగ్రేటెడ్ క్లీన్ ఎనర్జీ పాలసీ ద్వారా మరిన్ని ప్రోత్సాహకాలతో ముందుకు వచ్చిందన్నారు. ఇప్పటికే రిలయన్స్ సంస్థ రాష్ట్రంలో పెట్టుబడులు పెట్టిందని.. భవిష్యత్‌లో కూడా మరిన్ని పెట్టుబడులు వస్తాయని ఆశాభావం వ్యక్తం చేశారు. రిలయన్స్ సంస్థ సీబీజీ (కంప్రెస్డ్ బయో గ్యాస్ ప్లాంట్స్)లను రాష్ట్రంలో విస్తరించాలనుకున్నట్లు చెప్పారు. రాష్ట్రానికి మరిన్ని పెట్టుబడులు వచ్చేలా ప్రణాళిక రూపొందించామన్నారు.. కేవలం 30 రోజుల్లోనే ఎంవోయూ చేసుకుంటున్నట్లు చెప్పారు. ఏపీ ప్రభుత్వం రాష్ట్రానికి వేగంగా పెట్టుబడులు తెస్తుంది అనే దానికి రిలయన్స్ ప్రాజెక్ట్ ఉదాహరణగా చెప్పారు. రూ.65వేల కోట్ల పెట్టుబడులతో రిలయన్స్‌తో ఎంవోయూ చేసుకోవడం ఆనందంగా ఉందని.. వారికి ప్రభుత్వం తరఫున అవసరమైన సహకారాన్ని అందిస్తామన్నారు.

రిలయన్స్ పెట్టుబడుల ద్వారా రాష్ట్రంలో 2లక్షల50వేల మందికి ఉద్యోగాలు రావడం ఆనందంగా ఉందన్నారు లోకేష్. ఇది కచ్చితంగా రాష్ట్రానికి గేమ్ ఛేంజర్‌గా అభివర్ణించారు. అంతేకాదు రిలయన్స్ ప్రభుత్వ బంజరు భూములను పునరుద్ధరించడమే కాకుండా రైతులతో కలిసి పని చేయబోతుందట. అన్నదాతల ఆదాయాన్ని పెంచే దిశగా పంటల సాగులో వారికి శిక్షణ ఇవ్వబోతున్నట్లు తెలుస్తోంది. రైతులు తమ ఆదాయాన్ని ఎకరాకు ఏటా రూ.30,000 పెంచుకునేలా వారికి అవసరమైన శిక్షణ ఇవ్వనున్నట్లు సమాచారం.