ట్రంప్ గెలుపుతో అబార్షన్ ట్యాబ్లెట్లకు భారీగా డిమాండ్.. ఒకేరోజు 10వేల మాత్రలు ఆర్డర్

ఇటీవల జరిగిన అమెరికా ఎన్నికల్లో రిపబ్లికన్ పార్టీ అభ్యర్థి, మాజీ అధ్యక్షుడు డొనాల్డ్ ట్రంప్ విజయం సాధించారు. అయితే ఆయన వచ్చే ఏడాది జనవరి 20వ తేదీన అమెరికా 47వ అధ్యక్షుడిగా ప్రమాణ స్వీకారం చేయనున్నారు. ఇక అమెరికా అధ్యక్షుడిగా మరోసారి డొనాల్డ్ ట్రంప్ వైట్‌హౌస్‌లోకి అడుగుపెట్టడంతో.. ఆయన గతంలో చేసిన పాలనకు సంబంధించి.. మళ్లీ కొన్ని భయాలు, అనుమానాలు నెలకొన్నాయి. దీనికితోడు ఎన్నికల ప్రచారంలో భాగంగా ట్రంప్ చేసిన వ్యాఖ్యలు, అమెరికాలో తీసుకురానున్న మార్పుల నేపథ్యంలో ప్రస్తుతం ఆయన విజయం సాధించడంతో.. అందుకు అనుగుణంగా అమెరికన్లు కూడా ముందస్తుగానే జాగ్రత్తలు పడుతున్నారు. ఇందులో భాగంగానే ట్రంప్ విజయం తర్వాత అమెరికాలో ఒక్కసారిగా అబార్షన్ ట్యాబ్లెట్లకు భారీగా డిమాండ్ పెరిగింది.

అయితే అమెరికా అధ్యక్ష ఎన్నికల్లో డొనాల్డ్‌ ట్రంప్‌ విజయం సాధించడంతో.. ఆయన అధికారంలోకి వచ్చిన తర్వాత మహిళలకు ఉన్న అబార్షన్ హక్కులను తొలగిస్తారని వదంతులు, ఊహాగానాలు ప్రస్తుతం అమెరికాలో వెల్లువెత్తుతున్నాయి. ఈ నేపథ్యంలోనే అబార్షన్ ట్యాబ్లెట్ల కొనుగోళ్లు ఒక్కసారిగా అమాంతం పెరిగినట్లు సంబంధిత వ్యాపారులు అంచనా వేస్తున్నారు. దీంతో అబార్షన్ పిల్స్ కోసం అమెరికన్లు.. మెడికల్ షాపుల ముందు క్యూలు కడుతున్నారు. ఇది ఎంతలా ఉందంటే 24 గంటల వ్యవధిలోనే 10 వేల మందికి పైగా ఈ అబార్షన్ ట్యాబ్లెట్ల కోసం ఆర్డర్ చేసినట్లు అక్కడి మీడియా వెల్లడించింది. అది రోజూ వచ్చే ట్యాబ్లెట్ల కంటే 17 రెట్లు అధికం అని సంబంధిత వర్గాలు పేర్కొంటున్నాయి.

  ఇక ఇందులో మరో షాకింగ్ న్యూస్ ఏంటంటే అబార్షన్ ట్యాబ్లెట్ల కోసం గర్భిణీలతోపాటు గర్భం దాల్చని కానివారు కూడా ఎగబడుతున్నట్లు తెలుస్తోంది. గర్భం రాని మహిళలు ముందస్తు ప్రిస్కిప్షన్‌ కోసం సంప్రదిస్తున్నారని ఓ ఎన్జీవో తెలిపింది. ఇక ఓ ఎన్జీవో మరిన్ని వివరాలు వెల్లడించింది. తమకు వచ్చిన 125 ఆర్డర్లలో 22 మంది గర్భిణీలు కానివారేనని ఆ సంస్థ తెలిపింది. ఇక అమెరికా ఎన్నికలకు ముందే అబార్షన్ ట్యాబ్లెట్లు ఎక్కడ దొరుకుతాయి అనే విషయాల కోసం రోజూ 4వేల నుంచి 4500 మంది తమ వెబ్‌సైట్‌ చూసేవారని.. అయితే ఎన్నికల ఫలితాలు వచ్చిన తర్వాత వీటిని చూసేవారి సంఖ్య అమాంతం పెరిగిందని మరో స్వచ్ఛంద సంస్థ వెల్లడించింది. ఇప్పుడు ఒక్క రోజులోనే 82 వేల మందికి పైగా వెబ్‌సైట్‌ను చూస్తున్నారని చెప్పింది. అబార్షన్ ట్యాబ్లెట్లతోపాటు గర్భ నిరోధక పరికరాలు, వేసక్టమీ ఆపరేషన్ల గురించి కూడా తెలుసుకునేందుకు అమెరికన్లు ప్రయత్నాలు చేస్తున్నట్లు పేర్కొంది.

డొనాల్డ్ ట్రంప్ అమెరికా అధ్యక్ష పగ్గాలు చేపట్టిన తర్వాత మహిళలకు ఇప్పటివరకు ఉన్న అబార్షన్‌ హక్కుపై నిషేధం విధిస్తారని భావిస్తున్న చాలామంది ఇప్పుడే అబార్షన్ ట్యాబ్లెట్లు కొనుగోలు చేసి.. వాటిని నిల్వ చేసుకున్నట్లు నేషనల్‌ అబార్షన్‌ ఫెడరేషన్‌ అధ్యక్షుడు బ్రిటనీ ఫోంటెనో అనుమానం వ్యక్తం చేశారు. అయితే అమెరికాలో ఇలా అబార్షన్‌ ట్యాబ్లెట్లను ముందుగానే కొని.. వాటిని నిల్వ చేసుకోవడం ఇదేం మొదటిసారి కాదు. 2022 మే నెలలో కూడా అబార్షన్‌కు వ్యతిరేకంగా చట్టం తీసుకువస్తారనే ప్రచారం జోరుగా సాగింది. దీంతో ఆ సమయంలో అబార్షన్ ట్యాబ్లెట్ల డిమాండ్ 10 రెట్లు పెరిగినట్లు స్థానికులు వెల్లడించారు.