రెండో టెస్టుకు ముందు ఆసీస్‌కు షాక్.. గాయంతో స్టార్ పేసర్ దూరం

ఆస్ట్రేలియా ప్రధాన పేసర్లలో ఒకడైన జోష్ హేజిల్‌వుడ్ బోర్డర్ గవాస్కర్ ట్రోఫీలో రెండో టెస్టుకు దూరమయ్యాడు. పక్కటెముకల గాయంతో బాధపడుతున్న ఈ పేసర్.. ఆడిలైడ్ వేదికగా జరగాల్సిన పింక్ బాల్ట్ టెస్టుకు దూరమైనట్లు క్రికెట్ ఆస్ట్రేలియా ప్రకటించింది. అతడి స్థానంలో ఇద్దరు అన్ క్యాప్డ్ ప్లేయర్లను ఆస్ట్రేలియా తమ జట్టులోకి చేర్చింది. అందులో సీన్ అబాట్, బ్రెండన్ డెగాట్‌లు ఉన్నారు. డిసెంబర్ 6 నుంచి భారత్-ఆస్ట్రేలియా జట్ల మధ్య రెండో టెస్టు జరగనుంది.

కాగా బోర్డర్ గవాస్కర్ ట్రోఫీలో తొలి టెస్టులో 295 పరుగుల తేడాతో ఓడిపోయిన ఆస్ట్రేలియాకు హేజిల్‌వుడ్ దూరమవడం నిజంగా ఎదురుదెబ్బే. అతడు అందుబాటులో లేకపోవడం ఆ జట్టుకు ఇబ్బందిగా మారింది. ఎందుకంటే భారత్‌తో డే నైట్ టెస్టులో అతడికి మెరుగైన రికార్డు ఉంది. 2021 బోర్డర్ గవాస్కర్ ట్రోఫీలో ఆడిలైడ్ వేదికగా భారత్-ఆస్ట్రేలియా జట్లు పింక్ బాల్ టెస్టు ఆడాయి. ఇందులో హేజిల్‌వుడ్ 5 ఓవర్లలో కేవలం 8 పరుగులు మాత్రమే ఇచ్చి.. 5 వికెట్లు పడగొట్టాడు. దీంతో భారత్ 36 పరుగులకే కుప్పకూలి ఘోర పరాజయాన్ని మూట గట్టుకుంది.

ఇక ప్రస్తుత బోర్డర్ గవాస్కర్ ట్రోఫీలోని అతడు శుభారంభం చేశాడు. పెర్త్ టెస్టు తొలి ఇన్నింగ్స్‌లో 29 పరుగులు ఇఛ్చి నాలుగు వికెట్లు పడగొట్టాడు. రెండో మ్యాచులోనూ 21 ఓవర్లలో కేవలం 28 రన్స్ మాత్రమే ఇచ్చి.. ఒక వికెట్ తీశాడు. అయితే పక్కటెముకల గాయంతో బాధపడుతున్న హేజిల్‌వుడ్.. కేవలం రెండో టెస్టుకు మాత్రమే అందుబాటులో ఉండడా.. లేదా సిరీస్‌లో మరిన్ని మ్యాచులు ఆడడా.. అనేది తేలాల్సి ఉంది.

ఇక ప్రైమ్‌మినిస్టర్స్ లెవెన్ జట్టుతో భారత్ వార్మప్ మ్యాచ్ ఆడుతోంది. ఇవాళ, ఈ మ్యాచ్ జరుగుతోంది. పింక్ బాల్ టెస్టుకు మందు మంచి సన్నాహకంగా ఈ మ్యాచ్‌ను టీమిండియా ఉపయోగించుకోనుంది. అయితే ప్రైమ్ మినిస్టర్ జట్టులో ఉన్న బోలాండ్‌ను.. ఆస్ట్రేలియా బోర్డు రెండో టెస్టు కోసం ఎంపిక చేసింది. ఈమ్యాచ్‌లో అతడు సత్తాచాటితే రెండో టెస్టు తుది జట్టులో అతడు చోటు దక్కించుకునే అవకాశం ఉంది.

భారత్-ఆస్ట్రేలియా జట్ల మధ్య తొలి టెస్టులో టీమిండియా 295 పరుగుల తేడాతో గెలుపొందింది. రెండో టెస్టు డిసెంబర్ 6 నుంచి ప్రారంభం కానుంది. తొలి టెస్టులో గెలిచిన భారత్ 1-0 ఆధిక్యంలో ఉంది.

ఆస్ట్రేలియాతో టెస్టు సిరీస్ షెడ్యూల్..

డిసెంబర్ 06-10: రెండో టెస్టు (డే/నైట్)- అడిలైడ్

డిసెంబర్ 14-18: మూడో టెస్టు- బ్రిస్బేన్ డిసెంబర్ 26-30: నాలుగో టెస్టు- మెల్‌బోర్న్ జనవరి 03-07: అయిదో టెస్టు- సిడ్నీ