పేరెంట్స్ టీచర్స్ మీటింగ్‌లో హత్తుకునే సన్నివేశం
Andhra Pradesh Telugu | Suryaa Desk | Published : Sun, Dec 08, 2024, 06:31 PM
స్కూళ్లో పేరెంట్స్ టీచర్స్ మీటింగ్ అంట.. అందరూ రెడీయై వచ్చేస్తున్నారు. మరి మనమెలా..? పక్కన కూర్చునే పావని వాళ్లమ్మని తీసుకుని వస్తోందంట.. ముందు వరుసలో కూర్చునే లక్ష్మి వాళ్ల నాన్నతో కలిసి వస్తుందట.. మరి మనకెలా? అందంగా ముస్తాబు చేయడానికి అమ్మ లేదాయె.. బాధ్యతగా తీసుకెళ్లేందుకు నాన్న బంధం కరువాయె.. మరి ఇప్పుడెలా? పాఠశాలలో జరుగుతున్న పేరెంట్స్ టీచర్స్ మెగా మీటింగ్ సందర్భంగా.. దెందులూరులోని బాలసదన్‌లో ఉన్న బాలికల మనోవేదన ఇది. తల్లిదండ్రుల సమావేశాన్ని ప్రభుత్వం పండగలా నిర్వహిస్తూ ఉంటే.. అయినవాళ్లు తోడులేరనే బాధ ఆ పసిమనసులను మెలిపెడుతోంది. అలా బాధపడుతున్న బాలసదన్‌లోని బాలికలకు అమ్మగా మారారు ఏలూరు జిల్లా కలెక్టర్ వెట్రిసెల్వి.
వివిధ కేసులలో రక్షించిన వారిని, అనాథలుగా మారిన వారికి ఏలూరు జిల్లాలోని బాలసదన్‌లో ఆశ్రయం కల్పిస్తుంటారు. అలా ఆశ్రయం పొందుతున్న బాలికల్లో 17 మంది దెందులూరు జిల్లా పరిషత్ బాలికల ఉన్నత పాఠశాలలో చదువుకుంటున్నారు. ఇక శనివారం ఏపీ ప్రభుత్వం రాష్ట్రవ్యాప్తంగా 45 వేలకుపైగా పాఠశాలల్లో పేరెంట్స్ టీచర్స్ మెగా మీటింగ్ నిర్వహించిన సంగతి తెలిసిందే. ఈ క్రమంలోనే దెందులూరు జిల్లా పరిషత్ బాలికల ఉన్నత పాఠశాలలోనూ మీటింగ్ జరిగింది. అయితే ఈ సమావేశంలో బాలసదన్‌లోని బాలికలకు ఏలూరు జిల్లా కలెక్టర్ వెట్రిసెల్వి అమ్మ పాత్ర పోషించారు.
ఉదయం ఎనిమిది గంటలకు బాలసదన్ చేరుకున్న కలెక్టర్.. తమతో కాసేపు మాట్లాడారని.. తమతో పాటుగానే టిఫిన్ తిన్నారని.. ఆ తర్వాత తన వాహనంలోనే స్కూలుకు తీసుకెళ్లారని.. ఓ అమ్మలాగా తమ గురించి ఉపాధ్యాయులతో మాట్లాడారంటూ ఓ బాలిక చెప్బింది చెమ్మగిల్లిన కళ్లతో.. తమ చదువు గురించి ఉపాధ్యాయులను అడిగి తెలుసుకున్నారని ఆనందంగా చెప్పింది. వాహనంలో తీసుకెళ్తున్న సమయంలోనూ బాలసదన్‌లో ఎలా ఉంటుందంటూ అడిగారని చెప్పింది. ఇక పేరెంట్స్ టీచర్స్ మీటింగ్ సమయంలో తల్లిదండ్రుల గ్యాలరీలో కూర్చున్న కలెక్టర్ వెట్రిసెల్వి.. విద్యార్థుల చదువు సంధ్యల గురించి ఉపాధ్యాయులను ఆరా తీశారు. ప్రతి విద్యార్థి ప్రోగెస్ రిపోర్టులను పరిశీలించారు. అనంతరం ఎన్విరాన్‌మెంటల్ సైన్స్ గురించి మరింత శ్రద్ధ తీసుకోవాలని ఉపాధ్యాయులకు సూచించారు. మరోవైపు వెట్రిసెల్వి వ్యవహరించిన తీరుపై ప్రశంసలు వ్యక్తమవుతున్నాయి. బాలసదన్‌లోని విద్యార్థుల గురించి, వారి బాగోగుల గురించి ఆరా తీయడాన్ని.. మీటింగ్‌లో వారికి అమ్మలా వ్యవహరించడాన్ని పలువురు అభినందిస్తున్నారు.
|
|