వైసీపీకి డబుల్ షాక్.. అవంతి బాటలోనే మరో మాజీ ఎమ్మెల్యే రాజీనామా

వైఎస్సార్ కాంగ్రెస్ పార్టీ, వైసీపీ అధినేత వైఎస్ జగన్ మోహన్ రెడ్డికి గురువారం డబుల్ షాకులు తగిలాయి. గురువారం ఉదయం మాజీ మంత్రి అవంతి శ్రీనివాస్ వైసీపీకి రాజీనామా చేస్తున్నట్లు ప్రకటించారు. అవంతి శ్రీనివాస్ రాజీనామా ప్రకటన వెలువడిన గంటల్లోనే.. వైసీపీ నేత, భీమవరం మాజీ ఎమ్మెల్యే గ్రంధి శ్రీనివాస్ కూడా వైసీపీకి రాజీనామా చేస్తున్టట్లు ప్రకటించారు. వైసీపీ సభ్యత్వానికి, పార్టీ పదవులకు రాజీనామా చేస్తున్నట్లు గ్రంధి శ్రీనివాస్ వెల్లడించారు. ఈ మేరకు రాజీనామా లేఖను వైసీపీ అధినేత వైఎస్ జగన్ మోహన్ రెడ్డికి పంపుతున్నట్లు వెల్లడించారు. గ్రంధి శ్రీనివాస్ టీడీపీ వైపు చూస్తున్నట్లు వార్తలు వస్తున్నాయి. అయితే ఈ విషయంలో క్లారిటీ లేదు.

మరోవైపు 2019 ఎన్నికల్లో గ్రంధి శ్రీనివాస్ జనసేన అధినేత పవన్ కళ్చాణ్ మీద సంచలన విజయం సాధించారు. 2019 ఎన్నికల్లో పవన్ కళ్యాణ్ గాజువాక, భీమవరం నుంచి పోటీ చేసిన సంగతి తెలిసిందే. అయితే రెండుచోట్లా జనసేనానికి పరాజయం ఎదురైంది. భీమవరంలో వైసీపీ తరుఫున పోటీ చేసిన గ్రంధి శ్రీనివాస్.. పవన్ కళ్యాణ్ మీద 8 వేల పైచిలుకు ఓట్ల మెజారిటీతో గెలుపొందారు. దీంతో గ్రంధి శ్రీనివాస్ గెలుపు అప్పట్లో సంచలనం రేపింది. అయితే భీమవరం నుంచి అప్పటికే గ్రంధి శ్రీనివాస్ ఒకసారి ఎమ్మెల్యేగా గెలుపొందారు. 2004లో కాంగ్రెస్ పార్టీ తరుఫున ఎమ్మెల్యేగా గెలిచిన గ్రంధి శ్రీనివాస్.. ఆ తర్వాత రెండు పర్యాయాలు ఓటమి పాలయ్యారు. 2019లో తిరిగి భీమవరంలో విజయం సాధించారు.

ఇక ఇటీవల జరిగిన 2024 ఎన్నికల్లో వైసీపీ తరుఫున భీమవరంలో పోటీచేసిన గ్రంధి శ్రీనివాస్ ఓటమి పాలయ్యారు. జనసేన అభ్యర్థి పులపర్తి రామాంజనేయులు గ్రంధి శ్రీనివాస్ మీద విజయం సాధించారు. ఎన్నికల ఫలితాల అనంతరం గ్రంధి శ్రీనివాస్ రాజకీయ కార్యక్రమాలకు దూరంగా ఉంటున్నారు. దీంతో వైసీపీ నేతలు బుజ్జగించే ప్రయత్నం కూడా చేశారు. అయితే ఈ చర్చలేవీ ఫలించలేదు. ఈ క్రమంలోనే వైసీపీకి గ్రంధి శ్రీనివాస్ రాజీనామా చేస్తున్నట్లు ప్రకటించారు. మరోవైపు నవంబర్ నెలలో గ్రంధి శ్రీనివాస్ ఆస్తులు, కార్యాలయాలపై ఐటీ దాడులు జరిగిన విషయం తెలిసిందే. భీమవరం, ఏలూరు, నాగాయలంక, సింగరాయకొండతో పాటుగా చెన్నైలోని గ్రంధి శ్రీనివాస్ ఇల్లు, బంధువుల నివాసాలలో ఆదాయ పన్ను శాఖ అధికారులు సోదాలు నిర్వహించారు.