ఎర్రకోట ఇచ్చేయండి.. ఢిల్లీ హైకోర్టులో మొఘల్ వారసుల పిటిషన్

 ఢిల్లీలోని ఎర్రకోటను అప్పగించాలని మొఘల్ వారసులు వేసిన పిటిషన్‌ను ఢిల్లీ హైకోర్టు కొట్టివేసింది. గతంలోనే ఈ పిటిషన్ దాఖలు చేయగా.. తాజాగా పిటిషనర్లు మరోసారి కోర్టును ఆశ్రయించారు. అయితే బ్రిటీష్ వారు స్వాధీనం చేసుకున్న ఎర్రకోట కోసం 150 ఏళ్ల తర్వాత కోర్టుకెక్కడం పట్ల ఢిల్లీ హైకోర్టు తప్పుపట్టింది. ఇన్నేళ్ల తర్వాత కోర్టును ఆశ్రయించడం వల్లే ఈ పిటిషన్‌ను కొట్టివేస్తున్నట్లు ఢిల్లీ హైకోర్టు స్పష్టం చేసింది. ఈ పిటిషన్‌పై విచారణ సందర్భంగా ధర్మాసనం కీలక వ్యాఖ్యలు చేసింది. ఇప్పుడు ఎర్రకోటను తిరిగి మొఘల్ వారసులకు అప్పగించడం వీలుకాదని ఢిల్లీ హైకోర్టు తేల్చి చెప్పింది.

ఎర్రకోటను తమ పూర్వీకులు కట్టించారని.. అందుకే దాన్ని తమకు అప్పగించాలని మొఘల్ చక్రవర్తి బహదూర్ షా జాఫర్-II ముని మనవడి భార్య సుల్తానా బేగం.. 2021లో ఢిల్లీ హైకోర్టులో ఒక పిటిషన్‌ దాఖలు చేశారు. గతంలో తమ పూర్వీకుల దగ్గరి నుంచి బ్రిటిష్ ఈస్టిండియా కంపెనీ అక్రమంగా ఎర్రకోటను లాగేసుకుందని.. ఆ పిటిషన్‌లో పేర్కొన్నారు. ఈ నేపథ్యంలోనే ఎర్రకోటను తిరిగి తమకే అప్పగించాలని ఆ పిటిషన్‌లో కోర్టుకు విజ్ఞప్తి చేశారు. అయితే 2021లో పిటిషన్ దాఖలు చేసిన సుల్తానా బేగం.. మళ్లీ ఇప్పుడు రెండున్నరేళ్ల తర్వాత మళ్లీ కోర్టుకు వెళ్లారు. మొదటి స్వాతంత్ర్య యుద్ధం తర్వాత మొఘలుల ఆస్తులను.. వారు నిర్మించిన కట్టడాలను(ఎర్రకోటతో సహా) బ్రిటిష్‌ పాలకులు ఆక్రమించుకున్నారని సుల్తానా బేగం పేర్కొన్నారు.

దాంతో భారత్ విడిచి వేరే దేశం పారిపోయిన అప్పటి మొఘల్‌ చక్రవర్తి బహదూర్ షా జాఫర్-II 1862 నవంబరు 11వ తేదీన మృతి చెందినట్లు పిటిషనర్ తెలిపారు. ఆ తర్వాత మొఘల్ చక్రవర్తి నిర్మించిన ఎర్రకోటను భారత ప్రభుత్వం స్వాధీనం చేసుకుందని తెలిపారు. అందుకే తమ ఆస్తిని తిరిగి తమకు ఇప్పించాలని కోరారు. ఒకవేళ ప్రభుత్వం ఎర్రకోటను అప్పగించడానికి సిద్ధంగా లేకపోతే.. తమకు తగిన పరిహారం ఇచ్చేలా కేంద్ర ప్రభుత్వాన్ని ఆదేశించాలని పిటిషనర్ పేర్కొన్నారు.

ఇక ఈ పిటిషన్‌పై విచారణ జరిపిన ఢిల్లీ హైకోర్టు తాత్కాలిక ప్రధాన న్యాయమూర్తి జస్టిస్ విభు బఖ్రు, జస్టిస్ తుషార్ రావు నేతృత్వంలోని ద్విసభ్య ధర్మాసనం.. సుల్తానా బేగం చేసిన పిటిషన్‌ను తోసిపుచ్చింది. ఈ క్రమంలోనే బ్రిటిష్ పాలకులు ఎర్రకోటను స్వాధీనం చేసుకున్న 150 ఏళ్ల తర్వాత ఇప్పుడు కోర్టును ఆశ్రయించడాన్ని బెంచ్‌ తప్పుబట్టింది. ఇక ఈ వ్యవహారంలో కోర్టును ఆశ్రయించడంలో జరిగిన తీవ్రమైన ఆలస్యం కారణంగా ఆమె పిటిషన్‌ను కొట్టివేస్తున్నట్లు ఢిల్లీ హైకోర్టు స్పష్టం చేసింది. 2021లో ఈ వ్యవహారంపై పిటిషన్ దాఖలు చేశానని.. అయితే తన కుమార్తె చనిపోవడం వల్ల తాను తీవ్రంగా కుంగిపోయి అప్పటి నుంచి మళ్లీ కోర్టును ఆశ్రయించలేకపోయినట్లు సుల్తానా బేగం చెప్పినా కోర్టు పట్టించుకోలేదు.