బంగ్లాదేశ్‌లో హిందువులపై దాడులు.. లోక్‌సభలో జైశంకర్ కీలక ప్రకటన

షేక్ హసీనా ప్రభుత్వం పడిపోయి.. మహ్మద్ యూనస్ నేతృత్వంలో బంగ్లాదేశ్‌లో తాత్కాలిక ప్రభుత్వం ఏర్పడినప్పటి నుంచి.. అక్కడ మైనారిటీలపై భీకరమైన దాడులు జరుగుతున్నాయి. మరీ ముఖ్యంగా హిందువులపై, హిందూ ఆలయాలు, వ్యాపారాలు, ఇళ్లపై తీవ్ర హింసాత్మక ఘటనలు చోటు చేసుకుంటున్నాయి. బంగ్లాదేశ్‌లో మైనారిటీలపై జరుగుతున్న హింసపై.. భారత్‌తోపాటు ప్రపంచవ్యాప్తంగా తీవ్ర ఆందోళనలు వ్యక్తం అవుతున్నాయి. అదే సమయంలో మహ్మద్ యూనస్ ప్రభుత్వం.. ఈ హింసాత్మక ఘటనలను అడ్డుకోవడంలో తీవ్రంగా విఫలం అవుతోందనే విమర్శలు రోజురోజుకు వెల్లువెత్తుతున్నాయి. ఈ క్రమంలోనే తాజాగా ప్రస్తుతం జరుగుతున్న పార్లమెంటు శీతాకాల సమావేశాల్లో భాగంగా విదేశాంగ మంత్రి జైశంకర్ లోక్‌సభలో బంగ్లాదేశ్‌లో హిందువులపై జరుగుతున్న హింసపై స్పందించారు.

బంగ్లాదేశ్‌లో మైనారిటీలు, హిందువులపై జరుగుతున్న దాడులతో పరిస్థితి తీవ్ర ఆందోళనకరంగా మారిందని జైశంకర్ వెల్లడించారు. ఈ హింసను అడ్డుకునేందుకు బంగ్లాదేశ్ తాత్కాలిక ప్రభుత్వం చర్యలు తీసుకుంటుందని ఆశిస్తున్నట్లు తెలిపారు. మైనారిటీలు, హిందువుల భద్రతకు తగిన భద్రత కల్పిస్తుందని భావిస్తున్నామన్నారు. ఇదే విషయంపై ఇటీవల బంగ్లాదేశ్‌కు వెళ్లిన భారత విదేశాంగశాఖ కార్యదర్శి విక్రమ్‌ మిస్రీ.. అక్కడి నేతలతో చర్చించినట్లు జైశంకర్ గుర్తు చేశారు. మరోవైపు.. భారత్‌, పాకిస్తాన్‌ మధ్య మంచి సంబంధాలు నెలకొనాలంటే.. అక్కడ పూర్తిగా ఉగ్రవాదం నశించిపోవాలని తెలిపారు. అప్పుడే పాక్‌తో భారత్‌ చర్చలకు ముందుకు వస్తుందని జైశంకర్ స్పష్టం చేశారు.

బంగ్లాదేశ్‌లో రిజర్వేషన్లకు వ్యతిరేకంగా కొన్ని నెలల క్రితం విద్యార్థులు చేపట్టిన ఉద్యమం కాస్తా మాజీ ప్రధాని షేక్‌ హసీనా పదవికి రాజీనామా చేసి దేశం విడిచి పారిపోయేలా చేసింది. ఆ తర్వాత బంగ్లాదేశ్‌లో మహ్మద్ యూనస్ నేతృత్వంలో తాత్కాలిక ప్రభుత్వం ఏర్పడింది. అయితే అప్పటి నుంచే హిందూ మైనార్టీలపై తీవ్రంగా దాడులు జరగడం ఉద్రిక్త పరిస్థితులకు కారణం అవుతున్నాయి. ఇక ఇటీవల ఇస్కాన్‌ ప్రతినిధి చిన్మయ్‌ కృష్ణదాస్‌ అరెస్ట్‌తో పరిస్థితి తీవ్ర స్థాయికి చేరింది. ఆయనకు న్యాయ సహాయం అందించేందుకు ముందుకు వచ్చిన లాయర్‌ను హత్య చేయడంతో పరిస్థితి చేయిదాటిపోయింది. ఈ ఘటనలతో భారత్‌లోని ఇద్దరు దౌత్యవేత్తలను బంగ్లాదేశ్‌ వెనక్కి పిలిపించింది. తదుపరి ఆదేశాలు ఇచ్చేవరకు వారిద్దరూ ఢాకాలోనే ఉండాలని తెలిపింది. ఇక షేక్ హసీనా రాజీనామా తర్వాత ఆగస్టు 5వ తేదీ నుంచి అక్టోబరు 22వ తేదీ మధ్య బంగ్లాదేశ్‌లో మైనారిటీలపై 88 మతపరమైన హింసాత్మక ఘటనలు జరిగినట్లు అక్కడి ప్రభుత్వం తాజాగా ఒక నివేదికను విడుదల చేసింది.

ఇక బంగ్లాదేశ్‌లో జరుగుతున్న మైనారిటీ హింసపై అమెరికా స్పందించింది. బంగ్లాదేశ్‌లోని పరిస్థితులను అమెరికా అధ్యక్షుడు జో బైడెన్‌ నిశితంగా పరిశీలిస్తున్నారని వైట్‌హౌస్‌ వెల్లడించింది. బంగ్లాదేశ్‌లోని హిందువులు, మైనారిటీలకు భద్రత కల్పించాలని ఇప్పటికే ఆ దేశ నాయకులకు అమెరికా చెప్పినట్లు వైట్‌హౌస్‌ ప్రతినిధి జాన్‌ కిర్బీ వెల్లడించారు. అక్కడి తాత్కాలిక ప్రభుత్వంతో కలిసి పనిచేసేందుకు సిద్ధంగా ఉన్నట్లు చెప్పారు. ఇక అమెరికాకు కాబోయే అధ్యక్షుడు డొనాల్డ్ ట్రంప్ కూడా.. బంగ్లాదేశ్‌లో జరుగుతున్న మైనారిటీ హింసపై తీవ్ర ఆందోళన వ్యక్తం చేశారు.