వీళ్లు బాదం పప్పు ఎట్టి పరిస్థితుల్లో కూడా తినకూడదు.. దూరంగా ఉంటేనే ఆరోగ్యానికి మేలు

కరోనా తర్వాత చాలా మందిలో మార్పు వచ్చింది. చాలా మంది ఆరోగ్యంపై ఎక్కువ శ్రద్ధ తీసుకుంటున్నారు. ముఖ్యంగా తమ ఆహారంలో డ్రై ఫ్రూట్స్‌ని చేర్చుకుంటున్నారు. డ్రై ఫ్రూట్స్‌తో ఆరోగ్యానికి మేలు జరుగుతుందని భావిస్తున్నారు. డ్రై ఫ్రూట్స్‌లో ముఖ్యంగా ఎక్కువ మంది బాదం పప్పును తింటున్నారు. బాదం పప్పు తినడానికి రుచిగా ఉంటుంది. చిన్నా, పెద్దా తేడా లేకుండా చాలా మంది దీన్ని ఇష్టంగా తింటారు. అంతేకాకుండా బాదం పప్పు వల్ల ఎన్నో ఆరోగ్య ప్రయోజనాలు ఉన్నాయి. బాదం పప్పును నానబెట్టి తినడం వల్ల శరీరానికి ఎంతో మేలు జరుగుతుంది. అయితే, ఎన్నో లాభాలున్నప్పటికీ బాదం పప్పును కొందరు తినకూడదు.

బాదం పప్పుతో ఆరోగ్య ప్రయోజనాలు..

​బాదం పప్పులో పోషకాలు మెండుగా ఉన్నాయి. బాదంలో ప్రోటీన్లు, ఫైబర్, విటమిన్ ఇ, పొటాషియం, మెగ్నీషియం, ఫాస్ఫరస్ వంటి పోషకాలు ఉన్నాయి. వీటిలో యాంటీ ఆక్సిడెంట్లు ఎక్కువగా ఉన్నాయి. బాదం పప్పులో ఉండే ఎల్ కార్నిటైన్, న్యూట్రియంట్లు మెదుడును చురుగ్గా ఉంచుతాయని నిపుణులు చెబుతున్నారు. బాదం పప్పులో మోనోశాచురేటెట్ ఫ్యాట్స్ ఉన్నాయి. ఇవి గుండె ఆరోగ్యానికి మేలు చేస్తాయి. చర్మ, జుట్టు సంరక్షణలో బాదం పప్పులు కీలక పాత్ర పోషిస్తాయి. వీటిని రోజూ తినడం వల్ల రోగనిరోధక శక్తి పెరుగుతుంది. ఎముకలు బలంగా మారుతాయి. అయితే, కొన్ని ఆరోగ్య సమస్యలతో బాధపడేవారు వీటికి దూరంగా ఉండాలి. వారెవరో ఇక్కడ తెలుసుకుందాం.

హై బీపీ సమస్య..

ఈ రోజుల్లో చాలా మంది హై బీపీ సమస్యతో బాధపడుతున్నారు. అధిక రక్తపోటు వల్ల వివిధ సమస్యలు కూడా వచ్చే ప్రమాదముంది. అయితే, ఈ సమస్యతో బాధపడేవారు బాదం పప్పుల్ని తినకూడదంటున్నారు. వీటిలో మెగ్నిషియం ఎక్కువగా ఉంటుంది. మెగ్నిషియం బీపీ లెవల్స్‌పై ప్రభావం చూపే అవకాశం ఉంది. అందుకే అధిక రక్తపోటు సమస్యతో బాధపడుతూ.. మెడిసిన్ తీసుకునేవారు బాదం పప్పు జోలికి పోకూడదంటున్నారు నిపుణులు.

కిడ్నీలో రాళ్లు..

​కిడ్నీలో రాళ్ల సమస్యతో బాధపడేవారు బాదం పప్పు ఎక్కువగా తినకూడదు. ఎందుకంటే బాదం పప్పులో ఆక్సలేట్ ఎక్కువగా ఉంటుంది. ఆక్సలేట్ స్థాయిలు పెరిగితే కిడ్నీలో లేదంటే పిత్తాశయంలో రాళ్లు ఏర్పడతాయి. అందుకే ఇప్పటికే ఈ సమస్యలతో బాధపడేవారు బాదం పప్పు ఎక్కువగా తినకూడుదు. ఒకవేళ తినాలనిపిస్తే వైద్యుణ్ని సంప్రదించడం మేలు.

జీర్ణ సమస్యలు..

ఈ రోజుల్లో చాలా మంది అజీర్తి, కడుపు నొప్పి, ఉబ్బరం, గ్యాస్ వంటి సమస్యలతో బాధపడుతున్నారు. ఇలాంటి వాళ్లు బాదం పప్పులు ఎక్కువగా తినకూడదు. బాదం పప్పులో ఫైబర్ ఎక్కువగా ఉంటుంది. అంతేకాకుండా ఇవి వేడి స్వభావాన్ని కలిగి ఉంటాయి. వీటిని తినడం వల్ల కడుపులో గందరగోళం ఏర్పడే అవకాశం ఉంది. కడుపు నొప్పి, గ్యాస్ సమస్యలు మరింత తీవ్రమయ్యే ఛాన్స్ ఉంది.

ఊబకాయం..

అధిక బరువు లేదా ఊబకాయ సమస్యతో బాధపడేవారు బాదం పప్పుల జోలికి పోకూడదు. బాదం పప్పులో కేలరీలు, సంతృప్త కొవ్వులు ఎక్కువగా ఉంటాయి. ఇవి త్వరగా బర్న్ కావు. దీంతో.. వీటిని ఎక్కువగా తినడం వల్ల బరువు మరింత పెరిగే ప్రమాదముంది. అందుకే వీటిని ఎక్కువగా తినకూడదు.

మైగ్రేన్ సమస్య..

మైగ్రేన్ సమస్య ఉన్నవారికి తలనొప్పి ఎక్కువగా వస్తుంది. ఇలాంటి వారు బాదం పప్పుల్ని తినకూడదంటున్నారు ఎక్స్‌పర్ట్స్. బాదం పప్పులో విటమిన్ ఇ ఎక్కువగా ఉంటుంది. దీంతో.. తలనొప్పి, అలసట, మైకం వంటి సమస్యలు వచ్చే ఛాన్స్ ఉంది. అందుకే ఈ సమస్యలతో బాధపడేవారు బాదం పప్పు ఎక్కువగా తినకూడదు.

అలర్జీ సమస్యలు..

చర్మంపై దురద, ఎర్రటి మచ్చలు, శ్వాస కోస సమస్యలతో బాధపడేవారు బాదం పప్పు ఎక్కువగా తినకూడదు. బాదం పప్పు తినడం వల్ల ఈ సమస్యలు తీవ్రమయ్యే అవకాశం ఉంది. శ్వాస తీసుకోవడంలో ఇబ్బందులు రావచ్చు. ఇక, ఇతర వ్యాధులకు మెడిసిన్ తీసుకునేవారు బాదం పప్పు ఎక్కువగా తినకూడుదు. ఇవి మందులతో రియాక్షన్ జరిపే అవకాశం ఉంది. మీరు బాదం పప్పు ఎక్కువగా తింటే ఒకసారి వైద్యుణ్ని సంప్రదించడం బెటర్.