అద్భుత ఆఫర్.. తగ్గేదేలే అన్న జనం.. సినిమా క్యూలైన్ మించేలా

భారీ డిస్కౌంట్, బంపరాఫర్, ఆషాడం సేల్, శ్రావణం సూపర్ బొనాంజా, ఓపెనింగ్ ఆఫర్, బిగ్ బిలియన్ డేస్.. ఏంటి ఇవన్నీ అనుకుంటున్నారా.. భారతదేశంలోని సగటు మధ్య తరగతి జీవికి కొత్తగా పరిచయం చేయాల్సినక్కరలేని పేర్లివి. సగటు మిడిల్ క్లాస్ మనిషి మెంటాలిటీ ఎలా ఉంటుందంటే ఏదైనా ఖరీదైన వస్తువు కొనాలంటే.. పండుగ సీజన్ వరకూ వేచి చూస్తుంటారు. ఎందుకంటే ఏదైనా ఆన్‌లైన్‌లో ఆఫర్ రాకపోతుందా అని. అలాగే ఏదైనా తక్కువకు వచ్చిందంటే చాలు ఠక్కున అక్కడకు వెళ్లిపోతారు. నిత్యజీవితంలో మనందరం చూసే, చేసే పని ఇదే. ఇప్పుడీ ఉపోద్ఘాతం ఎందుకంటే.. అనకాపల్లి జిల్లా నర్సీపట్నంలో ఓ ఘటన జరిగింది. ప్రస్తుతం ఈ వీడియో వైరల్ అవుతోంది.

అనకాపల్లి జిల్లా నర్సీపట్నంలో అన్‌లిమిటెడ్ మల్టీక్యూజెన్ రెస్టారెంట్ పేరుతో డిసెంబర్ 15న ఓ రెస్టారెంట్ ప్రారంభించారు. నర్సీపట్నం బస్టాండ్ సమీపంలో ఈ రెస్టారెంట్ ప్రారంభించారు. అయితే రెస్టారెంట్ ప్రమోషన్‌లో భాగంగా నిర్వాహకులు బంపరాఫర్ ఇచ్చారు. రూ.4లకే చికెన్ బిర్యానీ అంటూ ప్రకటించారు. చికెన్ ప్రియులకు శుభవార్త.. 4 రూపాయలకే చికెన్ బిర్యానీ అంటూ సోషల్ మీడియాలో ప్రచారం చేశారు. రెస్టారెంట్ ఓపెనింగ్ ఆఫర్‌లో భాగంగా డిసెంబర్ 15న ఈ ఆఫర్ అందుబాటులో ఉంటుందని ప్రకటించారు. అది కూడా డిసెంబర్ 15వ తేదీ ఉదయం 10 గంటల నుంచి 12 వరకేనంటూ ప్రచారం చేశారు.

రెస్టారెంట్ నిర్వాహకుల ప్రమోషన్ ఫలించింది. నాలుగు రూపాయలకే చికెన్ బిర్యానీ.. అందునా ఆదివారం కావటంతో మాంసప్రియులు రెస్టారెంట్ ముందు క్యూ కట్టారు. ఉదయం 10 గంటల నుంచి ఆఫర్ అని ప్రకటించడంతో ముందుగానే అక్కడకు చేరుకున్నారు. పిల్లల దగ్గర నుంచి పెద్దల వరకూ అందరూ రెస్టారెంట్ ఎదుట భారీగా క్యూ కట్టారు. ఆఫర్ గురించి తెలుసుకున్న వాహనదారులు సైతం క్యూలైన్లలోకి చేరిపోయారు. దీంతో రెస్టారెంట్ ఉన్న రోడ్డులో ట్రాఫిక్ అంతరాయం ఏర్పడింది. దీంతో పోలీసులు జోక్యం చేసుకుని సరిదిద్దారు. మరోవైపు ఇక చెప్పిన ప్రకారమే ఉదయం 10 నుంచి 12 గంటల వరకూ 4 రూపాయలకే చికెన్ బిర్యానీ అందించారు రెస్టారెంట్ నిర్వాహకులు.