సొంత పంటను నాశనం చేసిన రైతులు.. కారణం తెలిస్తే శెభాష్ అనాల్సిందే!

ఆంధ్రప్రదేశ్‌లోని అల్లూరి సీతారామరాజు జిల్లాలో ఆసక్తికర ఘటన జరిగింది. రైతులే స్వయంగా తమ చేతులతో.. తాము సాగుచేస్తున్న పంటను నాశనం చేశారు. అనంతరం వాటిని కుప్పపోసి తగలబెట్టారు. అయితే గిట్టుబాటు ధర రాని కారణంగా.. నష్టాలు వస్తున్నాయనే బాధతో వారు ఈ పని చేయలేదు. ప్రభుత్వం చేపట్టిన కార్యక్రమాల కారణంగా.. రైతులు ఈ పని చేశారు. వివరాల్లోకి వెళ్తే.. అల్లూరి సీతారామరాజు జిల్లా కొయ్యూరు మండలంలో రైతులు స్వచ్ఛందంగా గంజాయి పంటలు ధ్వంసం చేశారు. సుమారుగా15 ఎకరాల్లో పండించిన గంజాయిని రైతులు ధ్వంసం చేసి తగలబెట్టారు. గంజాయి సాగు, అక్రమ రవాణాపై ప్రభుత్వం అనేక అవగాహన కార్యక్రమాలు చేపడుతోంది. ఈ క్రమంలోనే గంజాయి వల్ల కలిగే అనర్థాలను తెలుసుకున్న రైతులు.. తాము సాగుచేస్తున్న గంజాయిని స్వయంగా ధ్వంసం చేశారు. దీనిపై పోలీసులు వారిని అభినందించారు.

ఆంధ్రప్రదేశ్‌లో గంజాయి సాగు, రవాణా అనేది ఇబ్బందికర సమస్యగా మారిన సంగతి తెలిసిందే. రాష్ట్రంలో జరుగుతున్న అనేక నేరాల వెనుక కూడా ఈ గంజాయి హస్తం ఉంటోంది. గంజాయి మత్తులోనే ఎక్కువ నేరాలు జరుగుతున్నాయని ప్రభుత్వం చెప్తోంది. ఈ క్రమంలోనే గంజాయి సాగు, రవాణాను అరికట్టేందుకు అనేక చర్యలు తీసుకుంటోంది. మన్యం, ఏజెన్సీ ప్రాంతాల్లోనే గంజాయి సాగు ఎక్కువగా జరుగుతూ ఉంటుంది. ఈ నేపథ్యంలో గంజాయి సాగు వలన కలిగే అనర్థాలపై ఆ ప్రాంత రైతులకు ప్రభుత్వ అధికారులు, పోలీసులు అవగాహన కల్పిస్తున్నారు. గంజాయి సాగు వదిలి వచ్చే రైతులకు లాభదాయకంగా ఉండే ప్రత్యామ్నాయ పంటలను సూచిస్తున్నారు. ప్రత్యా్మ్నాయ పంటల సాగుకు అవసరమైన విత్తనాలు అందించడంతో పాటుగా వారికి అండగా నిలుస్తున్నారు. ఈ క్రమంలోనే ఏజెన్సీ ప్రాంత వాసుల్లో మార్పు వస్తోంది.

మరోవైపు ఆంధ్రప్రదేశ్‌లో గంజాయి, డ్రగ్స్‌పై ఉక్కుపాదం మోపేందుకు ఈగల్‌ను ఆంధ్రప్రదేశ్ ప్రభుత్వం ఏర్పాటు చేసింది. ఈగల్ డిపార్ట్‌మెంట్ కోసం 459 మంది సిబ్బందిని ఏర్పాటుచేసింది. అలాగే అమరావతి కేంద్రంగా రాష్ట్రస్థాయి నార్కోటిక్స్‌ పోలీసుస్టేషన్, ప్రతి జిల్లాలో నార్కోటిక్స్‌ కంట్రోల్‌ విభాగాలు ఉంటాయి. ఈగల్ డిపార్ట్‌మెంట్ అధిపతిగా.. ఐజీ ఆకే రవికృష్ణను నియమించారు. ఇందులో భాగంగా అమరావతిలో రెండు, విశాఖపట్నం, పాడేరు కేంద్రాలుగా మరో రెండు రాష్ట్రస్థాయి టాస్క్‌ఫోర్స్‌ బృందాలు పనిచేస్తాయి. ఈ మేరకు ఈగల్ ఇప్పటికే రంగంలోకి దిగిన సంగతి తెలిసిందే.